2023 жылдың 1 қыркүйегінен бастап 7,7 мың білім беру ұйымында 3,9 млн. бала білім алады, оның ішінде 364 мың бала – бірінші сынып оқушылары. Бұл туралы Оқу-ағарту министрі Ғани Бейсембаев мәлімдеді. Отырыс барысында білім беру жүйесінде жүргізіліп жатқан шаралар туралы баяндалды. Оның педагогтер мен оқушыларға және ата-аналарға да қатысы бар. Бала тәрбиесіне тек педагог емес, бірінші кезекте ата-ана жауапты. Ал, сапалы білім беруде ұстаздың ролі зор.
Былтыр Қызылорда облысында бастауыш сынып оқушылары ыстық тамақты мектеп асханаларында тегін ішкен болатын. Биылғы оқу жылында да ел бойынша 1-4 сынып оқушылары тегін тамақпен қамтылмақ.
«Мемлекет басшысының тапсырмасы бойынша биыл 1 қыркүйектен бастап аз қамтылған отбасылардан шыққан 1,5 миллионнан астам оқушыны, сондай-ақ әлеуметтік мәртебесіне қарамастан бастауыш сынып оқушыларын тегін тамақтандырумен қамту жоспарланған»,- делінген Оқу-ағарту министрлігі Балалардың құқықтарын қорғау комитетінін мәліметінде.
Республика бойынша тегін тамақтану құны орта есеппен 577 теңгені құрайды, ең жоғары баға Алматы қаласында – 800 теңге. Астанада да өсіп тұр.
«Алдыңғы жылдары 1-4 сынып оқушыларын тегін тамақпен қамту 56,6% құрады. Бұл Астана, Алматы және Шымкент қалаларының, Павлодар, Батыс Қазақстан, Қарағанды, Ұлытау, Қызылорда және Атырау облыстарының оқушылары болды. Мемлекет басшысының тапсырмасын орындау мақсатында қалған өңірлердің оқушыларын тегін тамақпен қамтамасыз ету бойынша жұмыстар жүргізілді. Осылайша жаңа оқу жылынан бастап 100% көрсеткішке қол жеткізілетін болады», — деді Балалардың құқықтарын қорғау комитеті басқармасының басшысы Дана Мақтаева.
Бүгінде министрлік мектептегі тамақтану сапасын арттыру мәселесін пысықтап жатыр. Себебі қоғамда әр түрлі пікір айтылуда. Мәселен, депутат Мұрат Әбенов әлеуметтік желіде тамақтану құнының әр облыста әркелкі екенін сынға алды. Ал, бала денсаулығы үшін астың сапасы бірінші кезекте болуы тиіс.
А.Сайлауов
