Ызғарлы суық қыс мезгілінен кейін жанға жылулық сыйлайтын көктемнің алғашқы айында аруларға сыйлық сыйлау жігіттердің дәстүріне айналған. Әлемнің барлық мемлекетінде бұл мереке аталып өтпесе де, арулардың көңілі түспек емес. Керісінше бұл мереке тойланатын мемлекеттерде қыздарға, аналарға ерекше ілтипатпен қарап, бір күнге тиесілі жақсылықтың барлығы да осы мерекенің себепшілеріне арналады. 8 наурыз мерекесінің басты сыйлығы жұпар иіс аңқыған гүлдер. Баланың анаға, азаматтың жарына, шәкірттің ұстазға деген ыстық ықыласы мен жылы лебіздері мерекенің көркін ашады. Түрлі әсем ән мен мың бұралған биі бар концерттік бағдарламалар арулардың мерекесіне сыйлық іспеттес.
8 наурыз күні 1910 жылы Дания мемлекеті, Копенгаген қаласында өткен халықаралық әйелдер конференциясында бекітілді. Нақтырақ айтсақ, 1910 жылдан бері үзілмей тойланып келе жатқан мереке әйелдерге деген құрметтің шексіз көрінісі. Ғасырдан астам уақыт бұл мереке қаншама нәзік жандыларға құрмет көрсетудің үлгісі ретінде үміт отының жағылуына себепші болды.
Бүгінде әр отбасының қуанышты мерекесіне айналған бұл күнді тойлау үрдіске айналды. Біздің мемлекетіміз де атаулы бұл мерекені жоғары деңгейде атап өтеді. Мемлекеттік мерекеде арулардың бәрі бір күндік демалысқа шығып, отбасы ортасында мерекені тойлай алады.
Халықаралық әйелдер күніне орай облыс әкімі Нұрлыбек Нәлібаев аналармен кездесіп, еркін форматта пікірлесіп, «Алтын алқа» иегерлерін марапаттап құттықтады, әйел затының адам өмірінде үлкен рөл атқарар маңызды тұлғалар екенін айтып өтті.
— Барша қазақтың ортақ мақтанышы, сұлулық пен ерліктің символына айналған Тұмар ханым, Ақжүніс, Қыз Жібектің, ел басына іс түскен қиын кезеңдерде басын оққа байлаған Әлия, Мәншүк, Хиуаз ұлт батырларының есімдері тарих төрінде алтын әріптермен жазылып қалды. Несібесін жерден көріп, ерен еңбектің үлгісін көрсеткен жерлестеріміз Сәлима Жұмабекова, Шырынкүл Қазанбаева, Ұлбала Алтайбаева, Жадыра Таспамбетова секілді апаларымыз бен ұлт руханиятын, мәдениетін, өнерін асқақтатқан Роза Бағланова, Сәбира Майқанова, Мәдина Ералиева сынды майталман тұлғаларымыздың Сырдың шежірелі тарихындағы орны ерекше. Аймақтың дамуына ерекше атсалысқан жандардың, оның ішінде әйел-аналарымыздың қалай құрметтесек те жарасады,- деді Н.Нәлібаев.
Өңір басшысы мереке қарсаңында ұлағатты ұстаз, Қызылорда облысының құрметті азаматы Алма Ақдәулетованы мерейлі 90 жас мерейтойымен құттықтады. «Алтын алқа» иегері, 10 перзент тәрбиелеп өсірген, 28 немере, 26 шөбере сүйген тыл ардагері Раш Искакова өз жерлестерін жиында құттықтап, тілегін білдірді.
Қызылорда облысының құрметті азаматы, «Парасат», «Құрмет» ордендерінің иегері Алмагүл Божанова өз пікірін айтса, «Серпер» жастар сыйлығының иегері Қарлығаш Айтжанова ана туралы монолог оқып, аналардың алғысын алды.
Жиын соңында облыс әкімі Н.Нәлібаев Президент Жарлығымен «Алтын алқа» алған аналарға марапаттарын табыстады.
Қаншама жүрекке жылулық беретін 8 наурыз мерекесі – барша ер-азаматтардың жақындарына деген өз сезімдерін жасырмай көрсететін күн. Бұл күн мейірімге толған жүректердің қауышып, өкпе-ренішті ұмыттыруға таптырмас мүмкіндіктің күні. Түрлі әшекей бұйымдар, хош иісті иіссуларды қыз-келіншектерге сыйлау науқаны 8 наурыз күні жүзеге асады. Ақын-жазушылардың қазақ аналарын тектіліктің туын ұстаған тұлға ретінде көрсетуі – мерекеден бөлек нәзік жандылардың үнемі құрметтеліп жүретінінің айғағы. Өмірге перзент әкеліп, отбасының ұйытқысы болатын аналардың жүзінен күлкі кетпеуі үшін мемлекеттің қамқорлығы өз алдына. Сол себепті барша нәзік жандыларды қадірлеп, көңілдеріне қаяу түсірмеу – өз-өзімізге құрметіміз.
Қазақбай
ӘНДЕШҰЛЫ
