«Біз табиғаттың өзін қайта түлететін ұрпақпыз. Жер, су, ауа – адам баласының ұрпағынан ұрпағына мұра болып келе жатқан мол қазына… Әрбір ағашты, әрбір бұтақты, жалғыз дәнді де ыждағаттылықпен сақтау, қамқор болу – басты міндеттің бірі» деп Ы.Жақаев айтпақшы, табиғаттың тарту еткен тосын сыйларын таптамай, түлетуге тырысудың өзі салмақты іс. Әсіресе, қоршаған ортаға қиянат қылмай, жанашырлық танытуды адам жастайынан қолға алса, жасыл желекті мемлекеттің қатарына еніп қалармыз. Білім ордаларының оқушыны тек білім нәрімен сусындатпай, тәлім мен тәрбиені қатар беріп, жақсылыққа баулып бейімдеуі санасында салмақтылық қалыптастыратыны сөзсіз. Әсте, елгезек балалар айтқанды екі еткізбей орындайды. Сондықтан да тұмса табиғаттың тілін тауып, тал егуде ептілік таныта білсе, Жер-ана да жомарттығын жасайтыны хақ.
Қазіргі таңда білім ошақтарында «Жасыл мектеп» жобасы жүргізіліп жатқаны бәріне мәлім. Жүйелі жобаның аясында оқушылардың экологияға қызығушылығы артып, тіпті тың тақырыптар төңірегінде зерттеу жұмыстарын жүргізіп, жаңалық ашуда жаңашылдық танытып келеді. Зерделі зерттеуде зеректік танытатын жас буынның мектеп қабырғасында жасаған тәжірибелері жемісін беруде. Оған осы уақытқа дейін «Жасыл мектеп» жобасы негізінде оң нәтижесін берген талдаулары дәлел. Аталған жобаның оқушыға тигізер пайдасы болмаса зияны жоқ. Яғни, балалар табиғатқа бір қадам жақындап, оған жанашыр болуды жүзеге асырса, екіншіден, ғылым жолында өздерінің бағыттарын қалыптастырады. Тіпті, зейінді оқушылар ғылыми конференцяларда өз ойын ашық әрі анық жеткізіп, ептілігі мен еркіндігін, белсенділігін көрсетуде. Осы ретте, «Ұлағат» жеке мектебінде «Жасыл мектептер» жобасы аясында «Жасыл мектеп жаратылыстану саласындағы ғылым мен білім дамуының өзекті жобасы» тақырыбында облыстық ғылыми-тәжірибелік конференция өтті. Облыстық конференцияға Қызылорда қаласы бойынша білім бөлімінің басшысы Ерлан Боданов қатысты.
– «Жасыл мектеп» жобасының мақсаты – балаларды экомәдениет пен қоршаған ортаны қорғауға баулу. Ол табиғатты аялауға, тәжірибелік сабақты көбейтіп, мектеп бағдарламасын түрлендіруге бағытталған. Бүгінде қалада бірнеше мектептер «Жасыл мектеп» жобасы аясында жылыжай жұмысын жасауда. Қоршаған ортаны қорғау мәселелерін шешуде оқушылардың әлеуметтік белсенділігі артады. Ауыл шаруашылығы дақылдарын егіп, оны баптауға машықтанады. Бұл – балалар үшін өте пайдалы іс,– деді Ерлан Теңізбайұлы.
Облыстық ғылыми-тәжірибелік конференцияда «Дені саудың жаны сау» бағытында дұрыс тамақтану – «Экофес» көрмесі ұсынылды. Сонымен қатар, конференцияға қатысушылар «Ұлағат» жеке мектебінің үйірме жұмыстарымен танысты. Биология ғылымдарының кандидаты, бастауыш «Жасыл мектептер» жобасының ғылыми жетекшісі Рахат Хамитұлының баяндамасын тыңдап, кері байланыс жасады.
Асылында, табиғатты танудың ең сенімді құралы – бақылау мен тәжірибе екенін ескерсек, білім ошақтарының бағыты айқын жобаларды қолға алғаны қуантады. Оқушылар тәжірибе жүргізуден тайсалмай, табиғатқа үздіксіз бақылау жүргізсе, жағымды жаңалықтар көбейе түспек.
Замира ҚОНЫСЖАН
