Алда саяси дода. Саяси дегенмен бағдарламаларда әлеуметтік мәселелерге көп көңіл бөлінген. Оның да себебі жоқ емес. Қоғамда әлеуметтік мәселелер түпкілікті шешімін таппаған. Әр саланың майталмандары депутаттықтан үмітті. Арасында ұстаздар да бар.
Қызылорда облысы бойынша бірмандаттық аумақтық сайлау округтері бойынша 516 кандидат тіркеуден өткен.
Оның ішінде ҚР Парламенті Мәжілісіне №21 округ бойынша 10 кандидат, облыстық мәслихатқа 16 округ бойынша 49 кандидат, қалалық мәслихаттарға 23 округ бойынша 81 кандидат, аудандық мәслихаттарға 97 округ бойынша 311 кандидат тіркелді.
Ең үлкен бәсекелестік 6 округте Қызылорда қаласы мен Арал, Жаңақорған аудандарында 5 адамнан келеді. Тіркелген кандидаттардың ішінде 433-і ер, 83-і әйел адам. Ең жас кандидат 21 жаста (2001 жылғы), ең ересегі 66 жаста (1957 жылғы).
Қызылорда облысы мәслихатына партиялық тізім бойынша 6 партиядан 16 мандатқа 65 кандидат тіркелді. («Aманат» — 34, Ақ жол – 13, «Ауыл» — 4, «ҚХП» — 4, «Байтақ» — 3, «Республика» — 7 азамат).
Үгіт жүргізу үшін Мәжіліске бірмандаттық округ бойынша тіркелген кандидатқа республикалық бюджет есебінен аумақтық сайлау комиссиялары арқылы 950 мың теңге, облыстық мәслихатқа 550 мың теңге, қалалық және аудандық мәслихат кандидатына 350 мың теңге қаржы бөлінді.
Оқырмандарға құлаққағыс, біз де осы нөмірге үміткерлердің сайлауалды бағдарламаларын жариялап отырмыз.
