Ауыл – адал ниетті, аңғал жұрттың шоғырланған мекені. Ойы арамдықтан ада, қиындықты да, қайғыны да күліп қарсы алып, тағдырдың тауқыметіне морт сынбай шыдас беретін халықты да ауылдан табасыз. Ұлан-ғайыр даланы мекен етіп, қалаға бейнетін жіберетін ауыл тұрғындарына көңіл бөлу – баршамыздың парызымыз. Мемлекет тарапынан да қазіргі таңда түрлі бағдарламалар жасалып, ауылдың жағдайын көтеру үшін жұмыстар атқарылып жүр. Жағдайы тұралап кеткен ауылдардың болашақта гүлденіп, ерекше рең алатынына сеніміміз мол.
Ауылдың жағдайын көтеріп, қаладағы жағдайды ауылға апару – ежелден келе жатқан халықтың арманы. Халықтың тілегі қабыл болғандай, Жаңақорған ауданында 2 ауыл табиғи газға қосылды. Қара отынмен әбігерге түскен қарашаның алдағы уақытта көгілдір отынды тұтынатыны көңіл қуантады. Бүгінде ауыл жағдайын көтеру үшін облыс әкімшілігі тарапынан түрлі жұмыстар атқарылуда. Жоғарыда айтқанымыздай, Жаңақорған ауданына қарасты Бірлік және Қыраш елді мекендерінде бүгін ғана газ құбырын қосу рәсімі болды. Іс-шараға облыс әкімі Нұрлыбек Нәлібаев қатысып, тұрғындарды құттықтады.
«Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Өткен жылы 14 газдандыру жобасын жүзеге асыруға 8,7 млрд. теңге бөлініп, игерілді. Нәтижесінде 6 ауылды газға қостық. Осылайша өңірдің газдандыру деңгейі 70 пайызға жетті. Бұл – 26 елді мекен, 583 мыңға жуық тұрғын табиғи газбен қамтылды деген сөз. Биылға республикалық бюджеттен 7,4 млрд. теңге бөлініп, 2022 жылы басталған 7 жоба жалғасты және 12 жаңа жобаның құрылысы басталады. Оның ішінде, Жаңақорған ауданынының Жайылма, Шалқия, Құттықожа, Төменарық, Кейден ауылдарына көгілдір отын кіргізу жұмыстары басталады. Бұдан бөлек, өткен жылы құны 3,4 млрд. теңгені құрайтын Жаңақорған кентіндегі 10/0,4 кВ электржелілік жүйені жаңғырту жұмыстары қолға алынған. Соның арқасында кенттегі 70 шақырымға жуық электр желісі жаңарып, қосымша жаңадан 23 трансформатор орнатылады, – деді аймақ басшысы.
Қоғам қайраткері Бекмырза Еламанов ауыл тұрғындарын құттықтаса, Ақүйік ауылдық округінің ардагерлер кеңесінің төрағасы Сәулебек Бейсенбаев өз алғысын айтып, бата берді.
Ақүйік ауылдық округіне қарасты Бірлік ауылына газ құбырын «Gas Energy Construction» ЖШС жүргізген болатын. 440 тұрғын үй мен 5 әлеуметтік нысанды республикалық және облыстық бюджеттен бөлінген қаржымен газдандырды. 124 тұрғын үй мен 6 әлеуметтік нысанды қамтитын Қыраш ауылы да көгілдір отынмен қамтамасыз етілді, бұл шараға да облыс басшысы қатысты. Ауыл тұрғындарын қуанышты жаңалықпен өңір басшысы құттықтады. Қоғам қайраткері Ибрагим Әбибуллаев сөз сөйлесе, ауылдық округтің қоғамдық кеңес төрағасы Сұлтанхан Ақылбеков ақжарма тілегін айтып бата берді. Қыраш ауылының имамы Әбдімәлік Шахановтың үйіне облыс әкімі барып, газ тұтынған тұрғындардың қуанышына куә болды.
Қыстың қақаған суығында от жағып, әбіржімей көгілдір отынмен үйін жылытса халықтың қиындығы азайды деген сөз. Газдың көмегі көлемді екенін, халыққа қатты қажет болғандығын білетін өңір басшылығы мәселені реттеді. Биыл ғана Мемлекет басшысының қолдауы арқасында ауылдық жерлерде әлеуметтік нысандардың құрылыс жұмыстары қарқынды жүруде. Алдағы 3 жылда «Жайлы мектеп» ұлттық жобасы аясында облыста құны 100 млрд. теңгені құрайтын 15100 орынға арналған мектептің құрылысы жоспарда тұр. 10 мектептің құрылы биылғы жылға жоспарланған. Соның ішінде 2 мектеп Жаңақорған ауданының орталығынан салынады деп күтілуде.
2023-2024 жылдары облыста «Ауылда денсаулық сақтауды жаңғырту» ұлттық жобасы аясында 27 денсаулық сақтау нысаны бой көтермек. Дәрігерлік амбулаторияның құрылысы «Қаратөбе» ауылында биылға жоспарланса, «Талап», Әбдіғаппар ауылдарында келесі жылы құрылыс жұмыстары басталады. Жаңақорған ауданаралық ауруханасын көпбейінді аурухана деңгейіне көтеру жұмыстары 2025 жылға қарай жүзеге асады.
Жайылма, Өзгент ауылдарында 150 орындық клуб, Ақжол ауылында денешынықтыру-сауықтыру кешенінің құрылысы жүргізілуде. Шілде айында аталған нысандар халық игілігіне берілмек.
Сыр халқының қуанышы бұл жаңалықтармен тоқтамайды. Алдағы уақытта жоспарға сәйкес ел игілігі үшін жұмыстар басталмақ. Көгілдір отынға қол жеткізуді халық қаншама жылдар күтті. Күткен сенім ақталып көгілдір отын қос ауылға да жетті. Облысымыздың шалғай елді мекендеріне де болашақта газ құбырлары жүргізіліп, Сыр халқының барлық тұрғыны қуанатын күні де алыс емес секілді. Бастысы, сенімімізді жоғалтпайық.
Қ.ӨТЕБАЙ
