Сапалы интернет – жылдам ақпараттандырудың тетігі

Дамушы мемлекеттердің алдыңғы қатарынан табылу үшін түйткілді мәселелерді пысықтап, жүйелі түрде шешіп отыру маңыз­ды рөл атқарады. Қазіргі таңда адамдардың басты қажеттілігін тудыратын ол – байланыс желілері. Ақпарат алудың көзі интернетке тікелей байланысты. Кітап ақтарып немесе ұзақ ізденіс процесс­терін талап ететін жұмыстармен басын ауыртқан адамдарды сирек көреміз. Себебі, интернет желісінің ұтымдылығын адамдар жақсы түсінген, меңгеріп те алған. Шалғай ауыл-аймақтарға интернет желісін толыққанды жеткізу, мектеп қабырғаcында интернет желісін толықтай дамыту – еліміз үшін негізгі міндеттердің бірі.

Бүгінде интернет жылдамдығын арттыру да өзекті мәселе, ақпаратты кедергісіз, жылдам әрі тез алу үшін де шешімін табар жұмыстар жүргізіліп жатыр.

Цифрлық даму министрлігінің «Қолжетімді интернет» пилоттық ұлттық жобасының орындалуы, инфляцияны бақылау, оның деңгейін төмендету туралы маңызды мәселелер бүгінгі Үкімет отырысында қаралды. Премьер-министр берген тапсырмаларды пысықтау үшін облыс әкімі Нұрлыбек Нәлібаев Үкімет отырысынан кейін жиын өткізді.

Облысымызда әлі күнге дейін шешімін таппаған сапалы интернет байланысының шешілуі мақсатында аймақ басшысы тиісті тапсырмасын берді. Облыста 295 мектептің 168-і талшықты-оптикалық желі арқылы секундына 20 мегабиттен жоғары интернетпен қамтылған. Мектептерде интернет жылдамдығын арттырып, жақсарту үшін облыстық білім басқармасына интернет провайдерлермен бірлесіп, шаралар қабылдау керектігі ескертілді. Сонымен қатар, «Қазақтелеком», «Транстелеком» провайдерлеріне Қызылорда қаласының әкімдігімен бірлесе отырып, талшықты-оптикалық интернет желісімен қала аумағын толықтай қамту тапсырылды.

– Президент 19 сәуірде өткен Үкіметттің кеңейтілген мәжілісінде инфляцияға арнайы тоқталып, орталық атқарушы органдарға және өңір әкімдеріне тапсырма берді. 2023 жылдың наурыз айында тұтыну бағаларының индексі өткен жылдың наурыз айына қарағанда 118,3%-ды құрады, респуб­ликада – 118,1%. Облыс­тық ауыл шаруашылығы және жер қатынастары басқармасына аудан және қала әкімдерімен, «Байқоңыр» әлеуметтік кәсіпкерлік корпорациясымен бірлесіп, жергілікті ауыл шаруашылығы құрылымдарымен күзгі өнімдерге осы бастан форвардттық келісім-шарт жасап, өнім қорын толықтыруды тапсырамын,– деп, инфляция мәселесінің күн тәртібіндегі өзекті мәселе әрі Мемлекет басшысының тікелей бақылауында екендігін облыс әкімі айтып өтті.

Облыс бойынша көкөніс сақтау қоймаларын салу, оларды кеңейту жауапты басқармаларға жүктелді. «Томат пастасын өндіретін зауыт құрылысы» жобасының белгіленген уақытта іске қосылуын, қажетті мұнай өнімдері қорымен тұрақты түрде қамтамасыз ету жүктелді.

Қазіргі заманның талабы болып табылатын интернет желісі өзекті мәселе тізімінің көшінде тұр дей аламыз. Қандай жағдай болмасын, еліміздің әр өңірінде 100 пайызды интернет желісін орнатып, бір-бірімен кедергісіз байланысып отыруы жұмыстардың ілгері басып, атқарылуына да өз әсерін береді. Ілгері дамуы үшін мемлекеттің атқарып жатқан істерінің бәрі де оң нәтижесін береді деп сенеміз. Өңір басшысының да айтулы мәселелерді қозғап, өзекті тақырыптарды саралай келе жұмыс жасауға міндеттер жүк-                                           теуі, Сыр шаһарының даму жолында келе жатқандығын көрсетеді. Берілген тапсырмалар нәтижесін беріп, шалғайдағы тұрғындардың алғысын алады деген үміттеміз.

Қ.ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған