Облыс әкімі тұрғындарды қабылдап, мәселесін тыңдады

Өңір басшысы Нұрлыбек Нәлібаев кезектілік тәртібімен жазылған азаматтарды жеке қабылдады. 13 адам қабылдауға тікелей келсе, 1 адам онлайн түрде өз өтінішін жеткізді. Қазіргі таңда өзекті мәселе болып тұрған тұрғын үй екендігін қабылдауға келген азаматтар айта отырып, тұрғын үй алу, жұмысқа орналасу, балаларының оқу ақысын төлеу үшін жәрдем сұрады. Облыс әкімі Нұрлыбек Машбекұлы әрбір азаматтың мәселесі алдағы уақытта толықтай зерттеліп, шешімі заң талаптарына сәйкес қарастырылатынын жеткізді. Қабылдауға келген өңір тұрғындарының кейбір мәселесін жауапты тұлғалар заң жүзінде түсіндіріп өтіп, шешу жолдарын ұсынды.

«Ягодка» саяжайындағы жеріне 49 жастағы жалғызбасты азаматша іргетас құюға көмек беруді сұрады. Қазіргі таңда денсаулығы емге мұқтаж екендігін ескертіп, дәрі-дәрмекпен, медициналық көмек­тер көрсетілуін өтінді. Сонымен қатар созылмалы аурулардың диагнозы бойынша қаланың бір топ тұрғындары ем алуға жолдау туралы мәселені айтты. қала маңына жақын орналасқан Махамбетов ауылының 70 жастағы тұрғыны жол сапасына, көшенің жарықтануына байланысты мәселе көтерді. Көшелерге тас жол төсеу және электр бағаналарын орнату жұмыстары бойынша қала әкімінің орынбасарына тапсырды.

Бүгінге дейін облыс әкімі 29 жеке қабылдау өткізіп, өңір тұрғындарының 600-ден астамының мәселесін қарады. Облыс әкімінің қабылдауына тұрғындар egov.порталы, e-otinish біріңғай базасы арқылы онлайн тіркеліп немесе жазбаша өтініш жазу арқылы әкімдікке келе алады.

Сыр халқының қордаланған проблемасын тыңдаған өңір басшысы алдағы уақытта аталған мәселелер бойынша тиянақты жұмыстар жасауды тиісті мекемелерге, қала басшылығына тапсырды. Қызылорда облысы мәселелерін халықпен тілдесу арқылы шешу – облыс әкімінің ұтымды шешімі. Аймақ басшысының қабылдауына келген әрбір қызылордалық мәселелерінің шешілуіне сенімді.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған