Облыс әкімі қаладағы құрылыс жұмыстарымен танысты

Бүгінде өңіріміздегі өзекті мәселелер оң шешімін табуда. Аймақ басшысының тікелей қатысуымен қала, аудан, ауылдық округтегі түйткілді жұмыстар күн тәртібіне енгізіліп, қызу шаралар басталып кеткен. Өңіріміздегі бірқатар нысандар құрылысы басталып, кейбірі аяқталуға жақын. Тұрғындардың талап-тілегін тікелей барып тыңдайтын аймақ басшысы қаламыздағы бірқатар нысандардың құрылыс жұмыстарымен танысты.

Қызылорда қаласындағы құрылыс нысандарын облыс әкімі Нұрлыбек Нәлібаев аралады. Жасалып жатқан істермен танысып, көркейту және абаттандыру жұмыс­тарымен танысты. Бірінші мәселе, әуе қатынасының жолға қойылуы. Бұл ретте әуежайдың тигізер пайдасы көп, себебі еліміздің мегаполис қалаларына жылдам жеткізіп, ыңғайлы мүмкіндіктер қарастырылған. Осыған байланысты, ең алдымен облыс әкімі «Қорқыт ата» әуежайына барып, жолаушылар терминалы құрылысын бақылады. «Болат Өтемұратов» жеке қоры жобаға демеушлік етеді, құрылыс жұмысын келесі жылдың мамыр айында аяқтау жоспарланған. Тапсырыс беруші мердігер мекеме «Accent Development Solutions» ЖШС, құрылыстың жалпы құны 15 млрд. теңгені құрайды.

Аймақ басшысы Сұлтан Бейбарыс көшесінің жөндеу жұмыстарымен де танысты. Сұлтан Бейбарыс көшесінің бір шақырым бөлігі тұрғындардың өтініші бойынша қайта жаңғыртылып, абаттандыруда. Бұл жөндеу жұмыстары облыс орталығының көр­кеюі үшін де маңызы зор. Көшені 6 жолақты етіп кеңейтіп, мердігер мекеме субұрқақтар орнатады. Жылдың аяғына дейн құрылыс жұмыстары аяқталады.

Сонымен қатар, аймақ басшысы «Сырдария» шағын ауданындағы №1,2 үйлердің қасбеттерін заманауи үлгідегі панельмен қаптау жұмыстарын көрді. Аймақтың бірқатар ірі кәсіпкерлері биыл облыс әкімінің бастамасымен көпқабатты тұрғын үйлердің қасбеттерін жаңартуға қаражат бөлген еді. Нәтижесінде қаламыздың көшелері ажарланып, көркейе түспек. Қалаға келген турис­тер үшін бірінші кезекте көзге көпқабатты тұрғын үйлер түсері анық. Ескірген ғимараттарды жаңалап, жаңаша көрік беру оң бастама. Тұрғындар үшін де жергілікті басшылықтың, аймақтағы ірі кәсіпкерлердің қолдауымен жасалып жатқан бұл жұмыстар үлкен қуаныш.

– Ең бірінші кезекте жұмыс сапасына мән беру керек. Мейлі, ол ғимарат құрылысы, жол құрылысы болсын, су немесе газ жүргізсін, ең бастысы – сапа. Сондықтан жұмыс барысын күнделікті бақылау керек. Жобаны мақұлдау сатысынан бастап толық аяқталғанға дейін жіті қадағалаңыздар,– деген аймақ басшысы жасалып жатқан жұмыс­тардың бірінші кезекте сапасына мән беру керектігін ескертті.

Қаламыздың Абай, Н.Назарбаев даңғылдары мен Ғ.Мұратбаев көше бойындағы көпқабатты үйлерінде де осындай жұмыстар қарқынды жасалуда. Тұрғын үйлердің аулаларында жөндеу жұмыстары жүргізіліп, балаларға арналған ойын алаңдары жасалады.

Теміржол арқылы өтетін, ұзындығы 55 метрді құрайтын жаяу жүргіншілер көпірі Ғ.Мұратбаев пен Яссауи көшелерінің қиылысында салынбақ. Көпір мәселесі өзекті екендігін айтқан Нұрлыбек Машбекұлы әзірленген жобаның сапасына жоғары баға берді. Халықтың ойындағы түйткілді мәселелерге бюджетті жоспарлауда мән берілетінін алға тартты. Бюджет қаражатын және уақыт үнемдеу мақсатында аталған жоба демеушілердің қаржысы есебінен жасалды. Жобаны жасаған компания өкілдеріне Нұрлыбек Машбекұлы өз алғысын айтты.

Сол жағалаудағы құрылыс алаңдарымен де облыс әкімі танысып, аралап шықты. Өткен жылы тамыз айында облыстық қан орталығының құрылысы сол жағалауда басталған болатын. 100 келушіге арналған ем­ханасымен бірге 300 төсектік көпбейінді ауру­хана келер жылы наурыз айында ашылмақ.

Өткен айда облыс әкімі аудандардағы бірқатар нысандардың құрылысымен тікелей танысып, тұрғындармен кездесу өткізген болатын. Жергілікті өңір басшылығымен тұрғындардың тікелей байланыста болуы көп жайды өз көзімен, оң шешімін табуына ықпал етеді. Халықтың талабының, басшылықтың жігерінің арқасында аймағымыз көркейе түспек.

Қ.ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған