СЫР ӨҢІРІНДЕ БОЙ КӨТЕРЕТІН ӘЛЕУМЕТТІК НЫСАНДАР

«Тәні саудың жаны сау» дегендей, ауырмаған адамның көңілі тоқ болып, кез-келген іске кірісіп кетіп, қоғамға өз пайдасын тигізіп бағады. Жаны мен қайғы болған жанның өз қиындығымен әуре болып, тіршіліктен күдерін үзгендей көп іске ынтасы болмайтыны да белгілі. Сырқат жандардың ауруын емдеп жазу – ақ халатты абзал жандардың міндеті. Бірақ заман талабына сай ауруханалардың болуы – басты мәселе. Шетелдің емдеу меке­мелеріне тәуелді науқастардың көп­тігі, еліміздің медицинасының әлі де дамуы керектігін көрсетеді. Сол себепті де еліміз денсаулық сақтауға баса назар ау­даруда. Осыған байланысты Сыр өңірінде де тың жаңалықтар барын өңір басшысы айтып өтті.

Жаңалықтың бастысы, биыл Қызыл­орда облысында мемлекеттік бағдар­ла­ма­лар аясында ондаған әлеуметтік нысан салынбақ. Бұл туралы VІІІ шақы­ры­лымдағы облыстық мәслихат сессиясында облыс әкімі Нұрлыбек Нәлібаев хабарлады.

– «Ауылда денсаулық сақтауды жаңғырту» ұлттық жобасы аясында 2023-2024 жылдары облыста 27 денсаулық сақтау нысаны бой көтереді. Қызылорда қаласында бір ауысымда 100 келушіге арналған емханасы және онкологиялық бөлімшесі бар 300 орындық көп бейінді аурухананың құрылысы басталды. Жобаның жалпы құны – 36,4 млрд. теңге», – деді аймақ басшысы.

Мұнан бөлек, облыс орталығында 200 төсектік жаңа перинаталдық орталық салынбақ. Бұл да қуанышты жаңалықтың бірі.

Медицинамен білім саласы да қатар жүреді. Бәсекеге қабілетті мамандар даярлау үшін білімге көңіл бөлу керек. Қазіргі таңда елімізде жоғары санаттағы мектептер саны артпаса кеміген жоқ. Түрлі бағытты қамтитын мектептер, оқушының потенциалын ашып, қоғамға дайын қылып ұсынатыны білім деңгейінің жоғары болуынан. Шетелдік білім жүйесінің керекті бөлімдерін еліміздің білім беру жүйесімен байланыстыра отырып, тың дүниелерді білім саласына енгізу жаңаша леп. Мемлекетіміздің барлық өңірі еліміздің дамуы үшін білім саласына мән беріп, қызмет етуі – болашақта жемісін беретін іс-әрекеттердің бастамасы. Қызылорда облысы да білім беру жүйесіне қызмет етуін тоқтатқан жоқ. Білімнің алғашқы бастауы мектеп болғандықтан, өңірімізде жаңалықтар болу үстінде. «Жайлы мектеп» ұлттық жобасы аясында алдағы 3 жылда облыста 15100 орынға арналған, құны 100 млрд. теңгеден асатын 21 мектеп бой көтермек. Биыл 10 мектептің құрылысы басталады.

ҚР Премьер-министрі Әлихан Смайыловтың өткен жылдың желтоқсан айында Қызылорда облысына жұмыс сапары кезінде аймақтың өзекті мәселелері көтерілген еді. Сол жолы Қызылорда қаласында дарынды балаларға арналған физика-математика мектеп-интернатын салу «Білімді қолдау» қоры қаражаты есебінен қаржыландырылатын болып шешім тапқан-ды. Бүгінде құрылыс басталды. Жобаның жалпы құны – 7,9 млрд. теңге.

Салауатты өмір салтын ұстанатын тұрғындар өңір үшін ең құрметке лайықты тұлғалар. Өз денсаулығына көңіл бөлетін адамдардың, аурудан алыс жүретіні, дәрі-дәрмекке тәуелді болмайтыны да белгілі. Осыған байланысты Үкімет басшысының алдында көтерген тағы бір мәселесі – сол жағалаудағы көпсалалы дене шынықтыру сауықтыру кешенінің құрылысы. Жергілікті бюджет есебінен жоба-сметалық құжаттама әзірленді. Жоба құны 6,9 млрд. теңге, құрылысы биыл басталады. Облысымызда өзге де әлеуметтік нысандар салынуда. Құны 1,6 млрд. теңгені құрайтын Неке сарайы тамыз айында пайдалануға берілмек. Жалпы құны 3,7 млрд. теңге болатын 1000 орындық Өнер орталығы желтоқсан айында, ал, сол жағалаудағы құны 2,7 млрд. теңгені құрайтын Қан орталығы 2024 жылы іске қосылады. Биыл бастау алған құрылыс қарқыны жоғары, бұрын-соңды болмаған жетістік.

Шынын айтуымыз керек, Сыр өңірі тұрғындар жағдайын жақсарту мақсатында жұмыс жасауда белсенді болып тұр. Себебі, «жұмыла көтерген жүк жеңіл» дегендей, жергілікті басшылық пен халық арасындағы тығыз байланыс сәтті жобалардың жасалынуына әкеледі. Алдағы уақыттарға жоспарланып отырған жұмыстар сәтті аяқталып, тұрғындар игілігіне берілетін күнді асыға күтеміз.

Қ.ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған