«Педколледждегі қыз» мюзиклі колледж студенттерінің шығармашылық әлеуетін көрсетті

Нартай Бекежанов атындағы облыстық музыкалық академиялық драма театрында Мәншүк Мәметова атындағы педагогикалық жоғары колледжінің студенттері жазушы, драматург, Қазақстанның еңбек сіңірген қайраткері Сұлтанәлі Балғабаевтың “Педколледждегі қыз” шығармасының желісімен қойылған мюзиклінің премьерасын сахналады. Лирикалық трагикомедияға әрі психологиялық драмаға негізделген шығарманы колледждің өнерпаз жастары жоғары деңгейде орындап шықты. Жаңа қойылымды көруге облыстық білім басқармасы басшысы Асқарбек Есжановтың өзі бастап келді. Сонымен бірге колледждің ардагер ұстаздары, оқу орны түлектері, ата-аналар мен студенттер көрермен болды.

“Педучилищедегі қыз” шығармасы ХХ ғасырдың 60-70 жылдарда автордың мектеп жасында орын алған оқиға желісіне құрылған. Бұл жайында автордың өзі: «Менің жазған прозалық шығармаларым негізінен туып-өскен Сыр бойы мен Сарысуда көрген-білгендерім туралы. Солардың бірі – «Педучилищенің қызы» дейтін әңгімем. Бұл әңгіменің жазылуында өзінше тарих бар. Сонау 1963 жылдың күзінде мектептің 11-сыныбында оқып жүрген бізді Қызылорда қаласының іргесіндегі Абай совхозына күріш жинауға алып барған еді. Ол жерде М.Мәметова атындағы педучилищенің қыздары да болды. Сөйтіп біраз уақытымыз көңілді, қызықты өтті. Мен кейін жазушы болғанда осы қызықты күндер туралы «Педучилищенің қызы» дейтін әңгіме жаздым», – деп еске алады.

Ал, колледж жанынан құрылған “Ассорти” студенттер театрының қолына бұл шығарма қалай түсіп жүр? Осыдан тура бір жыл бұрын журналист, әдебиеттанушы ғалым Бауыржан Омарұлының қарымды қаламгер Сұлтанәлі Балғабаевтың туындысына арнаған “Педучилищедегі қыз және біз” жазбасына куә болған колледж директоры Жақсыгүл Қоханқызы шығарма авторына қолқа салып, батасын берсе, студенттердің сахнаға алып шығуға ынталы екенін жеткізген. Аталған әңгіме желісіндегі шығарманы сахна қойылымына айналдыру бастамасын шығарма авторы да қолдап, өнерпаз жастарға батасын берген болатын. Драматург-жазушы Сұлтанәлі Балғабаевтың шығармасы желісінде жазылған “Педучилищенің қызы” мюзиклі осылайша сахналанып отыр.

Шығарма желісі күріштікте жиылған жастардың кездейсоқ жолығып, ғашық болған әдемі сезімін суреттейді. Жастық жалыны бойында қайнаған бозбала мен студент бойжеткеннің танысып, көңіл жарастыруынан ұшқындаған албырт сезімінен, жұптасудың сәті түспесе де кейін бала-шағалы болғанына қарамастан алыста қалған аруды өмір бойы жүрегінде әлдилеген жігіт сағынышынан туындайды.

Педколледж жастарынан құрылған өнер ұжымының осы күнге дейін қойған қойылымдарын көріп, балалардың театр өнеріне деген сүйіспеншілігіне, талантына, еркіндігіне риза болып жүрміз. Ал, «Педучилищедегі қыз» шығармасын тамашалап отырып, балалық шағымызға саяхаттадық. Біріншіден, әңгімені сахнаға лайықтап жазу оңай емес. Прозаны драматургияға айналдырған Дидар Өмірзақтың шығармашылық шеберлігіне таң қалдық. Екіншіден, балалар өз рольдерін алып шықты. Әрқайсысы сахнада еркін жүрді. Қойылымның ішінде өмір сүрді. Көрерменді сендіре алды. Ең бастысы, жалықпай көретін қойылым болды.

Кездейсоқ екеудің диа­логынан басталған сюжет күріштіктегі жастар жиынына ұласып, күлдіре отырып мұңайтып, кездесу мен қоштасу сәттерінің маңызын көркем жеткізген тұстарда көмейге тас тығылғандай көңілсіз де күйге түсірді. Сахна шымылдығы түрілгеннен бір деммен тамашалаған көрермендер мюзикльдің соңғы сәттерінде өнерпаздар өнеріне тәнті боп, түрегеп тұрып, ұзақ қол шапалақтады. Сахналық қойылым соңына жетсе де, көпшіліктің ыстық ықыласы зал ішін шуға бөледі.

Қойылымды қорытындылаған басқарма басшысы Асқарбек Темірбекұлы тамаша өнер көрсете білген барша студенттерді қанаттандырып, тәлім алушылардың жасап шыққан дүниелерінің жүрекке жеткендігін атап айтты және колледж студенттерінің шығармашылық қырына жоғары баға берді.

Б.Бағдатұлы

Пікір үстеу

Э-пошта мекенжайыңыз жарияланбайды. Міндетті өрістер * таңбаланған