«Қызылорда қысқы спорт түрлерінен спортшылар дайындай ала ма?» деген сұрақ жиі қойылады. Қыста қар сирек жауатын өңірде шаңғы спорты туралы айту қиын, десек те Қызылорда қаласындағы тұрғындардың спортпен шұғылдануына барлық жағдай жасап отырған маңызды нысандардың бірі «Қайсар» спорт кешенінің жұмыс істейтінін білесіз бе? Ал, спорт кешенінің құрамындағы мұз айдыны мекемесі осыдан 13 жыл бұрын, 2013 жылы пайдалануға берілген. Бүгінде мұнда қала тұрғындары мен жастар бос уақыттарын тиімді өткізіп, қысқы спорт түрлерімен айналысуға мүмкіндік алып отыр.
Спорт кешенінің директоры Т.Әбдіғаппарұлының айтуынша, мұз айдынының сапасын сақтау, келушілерге қолайлы жағдай жасау және спорттық құрал-жабдықтарды уақытылы жаңарту мекеме жұмысының басты бағыттарының біріне айналған. Десек те соңғы уақытта мұз айдыны төңірегінде әр түрлі алып қашпа әңгімелер айтылады. Осы әңгімелердің тиегін ағыту үшін біз мекеме директорына бірнеше сұрақ қойдық.
– Спорт кешені мемлекеттен қаражат ала ма?
– Біздің мекеме өз табысы есебінен жұмыс істейді. Коммуналдық төлемдер де өз қаражатымыздан төленеді. Кей тұрғындар «мемлекет қаржыландырады, сондықтан қызмет тегін болуы керек» деген пікір айтады. Бұл қате пікір. Мұз айдыны – өзін-өзі қаржыландырып отырған мекеме.
– Мұз айдынының қызметін пайдаланушылар сын айтып жатады. Соның бірі конькилердің уақытылы ауыстырылып тұрмайтындығы. Бұған не айтасыз?
– Бізде конькилер уақытылы жаңартылып отырады. Жақында 300 жаңа коньки сатып алынды. Конькидің пайдалану мерзімі шамамен бір жыл болғандықтан, белгіленген уақыт келгенде жаңасына ауыстырылады. Рас, кейбір келушілер коньки өлшемдері сәйкес келмейтіні жөнінде шағымданады. Бұл мәселені шешу үшін әртүрлі өлшемдегі конькилер жеткілікті мөлшерде қарастырылған.
– Мұздың сапасын қалай сақтайсыздар?
– Мұз сапасын сақтау үшін арнайы екі техника жұмыс істейді. Олар мұз бетін тұрақты түрде тазалап, тегістеп отырады. Кейде келушілер мұздың сапасына қатысты пікір білдіреді, бірақ мұз күнделікті арнайы техникалардың көмегімен өңделіп, талапқа сай жағдайда ұсталады.
– Мұз айдынының сыйымдылығы жеткілікті ме?
– Мұз айдынының сыйымдылығы талапқа сәйкес келеді. Бір мезгілде 50-60 адамға дейін қабылдай аламыз. Кей кездері демалыс күндері келушілер саны артып, «адам көп» деген шағымдар түседі. Дегенмен қауіпсіздік талаптарын сақтай отырып, белгіленген мөлшерден артық адам кіргізілмейді.
– Қандай спорт түрлерінен секциялар бар?
– Кешенде қысқы спорт түрлерінен мәнерлеп сырғанау, шорт-трек және шайбалы хоккей, командалық спорт түрлерінен баскетбол, волейбол, сондай-ақ көркем гимнастика және грек-рим күресі секілді спорт секциялары жұмыс істейді.
Сонымен қатар, мұз айдыны әлеуметтік жауапкершілік бағытындағы жұмыстарға да белсенді қатысады. Қайырымдылық қорының қолдауымен аптасына бір рет бірқатар әлеуметтік мекемелердің тәрбиеленушілері мен қызмет алушыларына коньки тебуге арналған тегін талондар беріледі. Атап айтқанда, бұл мүмкіндік Қызылорда облысының білім басқармасына қарасты «Отбасы үлгісіндегі балалар ауылы» мекемесіне, Қызылорда облыстық кәмелетке толмағандарды бейімдеу орталығына және Қызылорда облысының білім басқармасына қарасты Талсуаттағы облыстық балалар және жасөспірімдерді оңалту орталығының тәрбиеленушілеріне ұсынылады. Мұндай игі бастама балалар мен жасөспірімдердің бос уақытын тиімді ұйымдастыруға, олардың спортқа деген қызығушылығын арттыруға және салауатты өмір салтын насихаттауға бағытталған.
Байқағанымыз, «Қайсар» спорт кешені тек спорттық нысан ғана емес, сонымен қатар тұрғындардың денсаулығын нығайтуға, жастардың бос уақытын тиімді өткізуіне және әлеуметтік қолдауды қажет ететін топтарға қамқорлық көрсетуге үлес қосып отырған маңызды орталық екен. Кешеннің жүйелі жұмысы мен әлеуметтік бастамалары спорт саласындағы маңызын арттыра бермек.
Жеңісбек Мұратбек
