Қызылорда қаласы әкімдігінің ұйымдастыруымен бұқаралық ақпарат құралдары қызметкерлері күні мерекесіне орай «Евразия» спорт кешенінде Қызылорда қаласы әкімінің Кубогі үшін қаламгерлер арасында шағын футболдан республикалық турнир өтті. Қала әкімі Асылбек Шаменов журналистер арасындағы дәстүрлі шағын футбол турнирінің ашылу салтанатына қатысты.
Қызылорда қаласы әкімдігінің ұйымдастыруымен биыл екінші мәрте байрағын көтерген бұл турнирдің мақсаты – салауатты өмір салтын насихаттау, әріптестік және достық қарым-қатынасты нығайту. Ала доп бәсекесінде Астана, Шымкент қалалары, Атырау, Түркістан облыстары мен Қызылорда қаласынан барлығы 8 команда бақ сынады.
Жаңалықтың жаршысы, жақсылықтың хабаршысы болып, қоғамдық ахуалдың алғы шебінде жүретін айрықша кәсіп иелерінің спорттан да құр алақан емес екенін тілге тиек еткен қала әкімі Асылбек Шаменов жарысқа қатысушы командаларға сәттілік тіледі.
Жеребе бойынша екі топқа бөлінген 8 команда алаңда өзара тартысты. Қызылордадан үш бірдей команда қатысып, өз өнерлерін көрсетті. Ойынның аты ойын, тартысты ойындар нәтижесінде жартылай финалға «Қазмедиа», «Qaz365.kz» және «Атырау» командалары шықты. Ақтық мәреде «Қазмедиа» командасы Қызылорда қаласы әкімінің Кубогі үшін өткен республикалық турнирдің чемпионы атанды.
Додада оза шапқан «Қазмедиа» командасын қала әкімінің орынбасары Дінмұхамед Ермеков қала әкімінің арнайы кубогімен, медальдармен және бір миллион теңге қаржылай сыйлықпен марапаттады. Ал, екінші орынды жеңіп алған «Qaz365.kz» командасына 700 мың, қола жүлдегер атанған «Атырау» командасына 350 мың теңге табысталды.
Турнирдің «Үздік ойыншысы» номинациясымен 6 гол салған Қайсар Жетпісбай (Атырау) марапатталса, «Қоғам ТВ» командасының ойыншысы Ержан Батыршаев “Үздік шабуылшы» деп танылды. «Шымкент» командасының ойыншысы Айбек Қабылша «Үздік қақпашы» атанса, турнирдің «Үздік қорғаушы» номинациясымен Түркістан облысынан келген Самат Сүлей марапатталып, қаржылай жүлделер тапсырылды.
Еліміздің түкпір-түкпірінен 100-ге жуық БАҚ өкілдерінің басын қосқан турнирде қатысушылар қонақжай Сыр елі жұртшылығына ризашылықтарын білдірді.
Қ.ӘНДЕШ
