Қызылордада қарбыздан улану көп кездесіп жатыр

Жаз маусымы басталысымен ішек инфекциясы ауруларының тіркелу көрсеткіші басқа кезеңдерге қарағанда арта бастайды. Оған себеп – ыстық ауа райында тамақ өнімдерінің тез бұзылуы, мерзімінен ерте піскен жеміс-жидектерді мөлшерден тыс қолдану. Осы жайында облыстық санитарлық-эпидемиологиялық бақылау департаментінің басшысы Динара Жанабергенова хабардар етті.

– 2023 жылдың 5 ай қорытындысымен облыс көлемінде жіті ішек инфекцияларының 371 жағдайы тіркеліп, аурушандық көрсеткіші 100 мың халыққа шаққанда 44,8 промильді құрады. Бұл көрсеткіш 2022 жылдың осы мерзімімен салыстырғанда 8 жағдайға өскен. Облыс көлемінде тіркелген жұқпалы жіті ішек ауруларының 94% Қызылорда қаласында анықталды. 89% – 14 жасқа дейінгі балалар арасында, оның ішінде 75,1% – 2 жасқа дейінгі балалар үлесінде.

Санитариялық-эпидемиологиялық бақылау қызметінің мамандары мораторийге байланысты жеке кәсіпкерлерге тексеріс жүргізе алмайды. Тек тұтынушылардың сұрауымен ғана «Ұлттық сараптама орталығы» облыстық филиалымен бірлесіп нитрат мөлшерін тестометрмен анықтап бере алады. Дәл осындай іс-шара маусым айында өткізілген «Қауіпсіз тағам таңда» акциясында жүзеге асырылған болатын. Облыс бойынша халық көп жиналатын сауда орындарында тағамнан улану, қауіпсіз азық-түлікті таңдау, инфекциялық аурулардың алдын алу бойынша санитариялық дәрігерлер түсіндірме жұмыстарын жүргізіп, сатушылар мен тұтынушыларға өнімді ақысыз түрде нитрат деңгейіне тестілеу қызметі көрсетілді, – деді Динара Олжабайқызы.

Маусым айының алғашқы күндерінен бастап облыстық жұқпалы аурулар ауруханасына мерзімінен бұрын піскен бақша өнімдерімен (қарбыз) байланысты жіті ішек инфекциясына шалдыққан 21 жағдай есепке алынғандығын да айтып өтті. Себебі, нитратпен улану деңгейі жоғары және гербицид, пестицидтердің мөлшерден тыс болуы да денсаулыққа кері әсер етеді. Қарбызды мөлшерінен көп жеуге де болмайды. Ересек адамдар үшін бір күндік норма 500 грамм, 4-6 жастан асқан балаларға 150 грамм. 2 жасқа толмаған бөбектерге қарбыз беруге болмайды. Сонымен қатар жеміс-жидектерді, қарбыз-қауынды сақтау және жеткізу ережесінің бұзылуы да осы өнімнен ауырып қалуға себеп болатындығын айтты. Сол себепті сақтық сараларын жасап, ауру белгілері байқалса, медициналық көмекке жүгінуге кеңес берді.

Қ.ӨТЕБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған