Қызылордалық «Қайсар» құрамасы жеңіс тұғырында

Бүгінде футбол ең танымал спорт түріне айналды. Тіпті, аяқ доптың ойынына келгенде ішкен асын жерге қоятындар көп. Ал, ойыншыға жан дауысы шыққанша жүрекпен сәттілік тілейтін жанкүйерлердің өзінен футболға деген ерекше ынта байқалып-ақ тұрады. Әсте, футбол деген құр бекер доп қуалап яки қызылтанау болып жүгіріп, ақ тер көк тер болып секектеу емес. Себебі, құрама қызған ойында құласа да, қайта тұруға, жығылса да, жеңіске жетуге жұмылады. Тартыста табандылығын танытып, «бәріміз біріміз үшін, біріміз бәріміз үшін» деген ұранды ұстанып, қарсыласты шаң қақтыруға қауқарлы болуда маңызды мұндайда. Алаңда ауыз ашылып, аңтарылмай қарсы топтың қақпасына гол салып, есепті еселеткеннің ғана еншісіне жеңіс бұйырады.

Әлемдік ойындарда әлсіздік танытпай, үздік атанып, үмітті ақтауды үлкен мақсат еткен айбындылардың абыройы асқақ болары да хақ. Жеңіс төрінде жалауды желбіретіп, әнұранды шырқаудың өзі ел мәртебесін биіктетіні тағы рас. Осы орайда, ел намысын қорғауда аянбаған, сынақтарда сынып қалмаған қызылордалық құрама «Қайсардың» жеткен жетістігі жұрт есінде. Биылғы біріншілікте бәсі жоғары болған құрама премьер-лигаға жолдама алды. Ерекше екпінмен ептілігін байқатқан «Қайсар» жігіттерінің ала доптың аламанында асығы алшысынан түсті. «Жетісу» құрамасымен болған тоқсан минуттық тартысты ойында «Қайсар» 55 ұпаймен жолдама алып, Сыр елін сүйінші хабарға бөледі. Қайратын қайраған қуат иелері алаңдағы қозғалысын жіті қадағалап, шабуылдаушы ұрымтал тұсты дөп тауып, қорғаушы мен қақпашы өздеріне жүктелген міндетті мінсіз орындап, есе жібермеуге тырысты. Сол үздік ойынның әр сәтін жібермеуге, қолдау мен қолпаштауға келген жанкүйерлер ойыншыларға жігер бергені жасырын емес. Осы тұста  облыс әкімі Нұрлыбек Нәлібаев орталық стадионда өткен екі құраманың қызған ойынын тамашалап, жанкүйер болды.

Көптің көңілінен шыққан ойын аяқталғаннан кейін белгілі футболшы, Сыр елінің мақтанышы Мақсат Байжановтың үлкен спортпен қоштасу рәсімі өтті. Шараға арнайы Қазақстан кәсіпқой футбол лигасының президенті Шох Рохус Рохусович, сала басшылары, Сыр спортының жанкүйерлері қатысты. Облыс әкімі Мақсат Байжановтың еңбек жолы жастарға үлгі екенін айтып, қайсарлықтарды премьер-лигаға шығуымен құттықтады. Сонымен қатар, спорт жанашырлары үшін ақжолтай жаңалықты жеткізіп, жаңа стадион салу бастамасы қолға алынатынын айтты.

– Ресейдің Краснодар қаласында былтырғы жылы бір жыл ішінде 10 мың орындық 12 миллион долларға жабық стадион салынған екен. Келесі жылы біз де сондай жаңа стадион құрылысын бастауға ниеттіміз. Бұл ұсынысты жерлестерім, ірі компаниялар және кәсіпкерлер қолдайды деп сенемін.

Бүгін Сыр спортының саңлағы, доп додасының дарабозы Мақсат Байжановтың үлкен спортпен қоштасу рәсіміне жиналып тұрмыз. Мақсаттың спорттық межесі өз мерейімен айшықтылады. Ол жеңісті де, жеңілісті де бастан кешірген, бірақ жеңісі үстем, көргені көп, түйгені мол тарланбоз жігіт.

Байжановтың бабы ел біріншілігінде 500-ге жуық ойын өткізіп, 80-ге жуық гол соққан мергендігімен де көрінді. Сондай қысылтаяң шақта команда жауапкершілігін арқалаудың аманаты ауыр болады. Міне, Мақсаттың мықтылығы осынысымен озық тұр. Сол себепті жанкүйерлер оны құрметтейді, қаншама жас буын оған қарап бой түзеуге тырысады. Сыр спорты жасай берсін! Алға «Қайсар»! Алға Қазақстан! – деді Н.Нәлібаев.

Аталған матчта команда капитаны Мақсат Байжанов мансабындағы соңғы ойынын өткізген болатын. Осы уақытқа дейін жеңіс пен жеңілістің жіңішке жолында жігері жасымай, бабы мен бағы қатар шапқан спорт сайыпқыранына құрмет көрсетіліп, облыс әкімі Сыр жұртшылығы атынан автокөлік кілтін табыстап, лебізін білдірді.

Иә, мансабында мақтанға салынбай, мақсатқа жетуді көздеген футболшының жеткен жетістігі көп-ақ. Бойында намыс оты маздаған жігіттің шыққан шыңы да биік екені шындық. Мақсат Байжанов кәсіби футболшы ретінде 2002 жылы «Қайсар» футбол клубынан бастап Қазақстан премьер-лигасының 7 клубында өнер көрсетті. Атап айтқанда, «Қайсар», «Ертіс», «Ақтөбе», «Локомотив», «Атырау», «Жетісу», «Шахтер» командаларында ойнады. Техникалық жағынан тәжірибелі ойыншы ретінде Қазақстан Ұлттық құрамасында 30 кездесу өткізді. Екі рет ел чемпионы, екі рет Қазақстан кубогының иегері болды. Чемпиондар және Еуропа лигасына қатысқан алғашқы қызылордалық футболшы екенін де ел біледі. Сондай-ақ, Серік Жейлітбаев атындағы сыйлықтың иегері.

Сайып келгенде, спортқа көп көңіл бөлініп жатқаны жұртшылықты қуантады. Себебі, әлем көрермендерін сүйсіндіріп, елге деген сүйіспеншілігін сөндірмеген сайыпқырандардың басым жетістігі спорт саласынан. Ендеше, тұтас халықтың көңілін тұман етіп тұнжыратпай, қуанышқа бөлеуде қадамын нық басып жатқан әр спортшыға сәттілік тілейміз. Жеңісімен жолдамаға ие болған «Қайсар» құрамасының да жақсы жаңалыққа жеткізетініне кәміл сенімдіміз.

Замира АХМЕТ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған