Сыр спортшыларының жетістігі артып келеді

Қазірде жастар саланың сан қырынан бағын сынап, өзіндік қызығушылығын ұштап, сол арқылы жетістікке жетуді көздейді. Білімді игеріп, оқуда озат атанғандар озық нәтижеге қол жеткізіп жатқандығы жасырын емес. Асылында, жаңашылдыққа жаны құмарлардың рухани әлемі де жұтаңданбайтыны анық. Ақыл-ойды айнымас серігіне айналдырғандар спортта да өзіндік орнын қалыптастырып келеді. Сондықтан Сыр жастарының қайтпас қайсарлығына қайран қалмау, табандылығына тәнті болмау мүмкін емес. Осы ретте, Сыр жұртшылығын ақжолтай жаңалықпен қуантып жүрген спортшыларға құрмет пен қолдау көрсетуді жөн көрген басшылық шет елден жеңіспен оралған жерлестерді жылы жүзбен күтіп алып, құттықтауын жеткізді.

Жақында ғана Әсел Серікбай Италияның Сардиния қаласында шахматтан өткен Әлем чемпионатында күміс медальға ие болып, облыс тарихында алғашқы болып гроссмейстер атағын алған болатын. Сыр елі тұғырдан таймаған талапты Әселді зор мақтанышпен күтіп алды. Күтіп алу шарасына облыс әкімінің орынбасары Н.Сақтағанов, облыстық мәдениет және спорт басқармасының басшысы Р.Рүстемов, спорт ұйым басшылары, спортшылар, Қорқыт ата атындағы университеттің әскери кафедрасы, жастар орталығы өкілдері, БАҚ өкілдері қатысты. Осы тұста Әселдің бапкері Василий Шимелков пен облыс аға жаттықтырушысы Риза Қошқарованың есімдерін ерекше атап өткен жөн. Салтанатты шарада облыс әкімінің орынбасары Нұрымбет Сақтағанов құттықтау сөз сөйлеп, өңірдегі шахмат спортының дамуы жайында сөз қозғады.

– Әселдің жеңісі барша қазақ елінің жеңісі, 17 дүркін Қазақстан, 3 дүркін әлем , 7 дүркін Азия чемпионы атанған алтын қызымыз Сыр елінің қоржынына бүгін тағы да бір марапат – күміс медаль қосып отыр. Оның үстіне Әсел Қазақстан бойынша 9-шы, ал Қызылорда облысы бойынша ең алғашқы болып «гроссмейстер» атағын иемденді. Біз әлем біріншілігінде ел абыройын асқақтатқан нәзік те қайсар қызымызды мақтан тұтамыз,- деді ол өз сөзінде.

Әсте, үлкен жетістіктен соң үзілістің керегі жоқ екендігін, талап жолында тоқтамау керектігін Сыр спортшылары дәлелдеп келеді. Спорттың сан түрінен өзін шыңдап, шынығуға келгенде кежегесі кері тартпайтын шымырлардың ісі кейінгіге үлгі болатындай-ақ. Себебі, бір жеңіске жеттім деп жер жаһанға жар салып, құрметті көтере алмай қалып, жер мен көкті тіреп тұрғандай масаттанатын жұғымсыз әрекетке бармайды. Керісінше, ел намысын биік қойып, жеңіс жолында бөгелмеуге тырысады. 21-23 қазан аралығында Талдықорған қаласында көгалдағы хоккейден ҚР чемпионаты өтті. Чемпионатта қыздар арасындағы құрама 2-орын иеленді. Осындайда болмысы нәзік қыздардың бойынан батылдықты бірден байқауға болады.

24-28 қазан аралығында Орал қаласында шорт-тректен жоғары және орта жастағы ұлдар мен қыздар арасында ҚР чемпионаты өтті. Орта жастағы қыздар арасында командалық эстафетадан 2000 метр қашықтықта Сыр спортшылары 1-орын алды. Жарыс барысында қайсарлығымен көзге түскен команда құрамында Жансая Есен, Ұлту Құрманбай, Айару Қайратқызы, Диляра Туралиева мен Кәусар Нәжім бар. Айта кетейік, Жансая Есен 500 метр қашықтықты  50.01 секунд нәтижесін бағындырып, қараша айында Астанада жастар арасында өтетін әлем біріншілігіне іріктеу сынына қатысу мүмкіндігін алды.

Сонымен қатар, жақында ғана «Нұрсәт» теннис орталығында шахматтан ардагерлер арасында ҚР чемпионатының ашылу салтанаты болып өтті. Чемпионатқа Астана, Алматы, Шымкент қалалары мен Солтүстік Қазақстан, Қостанай, Түркістан, Жамбыл, Павлодар, Ұлытау, Ақтөбе, Қызылорда облыстарынан 70-ке жуық шахматшы қатысып, бақ сынауда. Айта кетейік, жарыс 4 қарашаға дейін созылып, сол күні жеңімпаздар анықталатын болады.

Асылында, гір спорты оңай емес. Қайткенмен де, салмағы ауыр гірді көтеруде қажыр-қайрат пен күштілік ауадай қажет. Дегенмен, қиыннан қашпаған қуат иелері мұндай ауырлықты да ауырсынбай өз қабілетін көрсете білді. Яғни, 27-30 қазан аралығында Индияның Нью Дели қаласында гір спортынан Әлем чемпионаты өткен болатын. Чемпионатта 50-54 жас аралығындағы ардагерлер арасында Оразбек Медетбаев 3-орын меленді. Бұл әлем біріншілігіне 32 мемлекеттен 400 спортшы қатысты. Сондықтан, алыптар арасында топ жарып, үштікке ілінуде үздіктіктің үлесінде.

«Нұрсәт» теннис орталығында шахматтан «Қызылорда шуағы – 2022» атты балалар арасындағы республикалық турнирдың ашылу салтанаты өтті. Жарысқа Астана, Алматы, Шымкент қалалары мен Қостанай, Жамбыл, Түркістан, Қызылорда облыстарынан 187 жас шахматшы қатысты. Турнирдың бас төрешісі Тимур Қасымов. Бақ пен бап қатар сыналатын, қабілет байқалатын, дарын дараланатын жарыста қатысушыларға сәттілік тілейміз.

Балаларға арналған турнирлер мұнымен тоқтамақ емес. Өскелең ұрпақты өрелі, білімді һәм білекті етіп тәрбиелеуде шара мен жарыстардың маңызы зор. Осы ретте, бокстан республикалық турнирдің бастау алғанын тілге тиек етеміз. Ж.Баһадүр атындағы спорт-мектебінде балалар жылы аясында Жалаңтөс баһадүр Сейтқұлұлы атындағы бокстан 2009-2010 жылы туған жасөспірімдер арасындағы республикалық турнир болып өтті. Жарысқа Алматы, Шымкент қалалары мен Алматы, Ақтөбе, Атырау, Маңғыстау, Батыс Қазақстан, Түркістан, Жамбыл, Қызылорда облыстары және Сыр өңірінің аудандарынан құрылған 11 команда, 200-ден аса спортшы қатысуда. Жарыс 6 қарашаға дейін өтіп, қорытындысы белгілі болады. Шын мықтылардың жекпе-жегінде жеңіске лайық азаматтың анықталатыны анық.

Замира Қонысжан

Пікір үстеу

Э-пошта мекенжайыңыз жарияланбайды. Міндетті өрістер * таңбаланған