Сыр елінде Ұлттық домбыра күні кең көлемде аталып өтті

Айтыс өнері – қазақ халқының еретеден келе жатқан асыл мұрасы, төл өнері. Тарихымыздан өзіндік орын алып, қазіргі уақытқа дейін насихатталып келе жатқан өнердің шоқтығы биік. Әдебиетімізде талай арқалы ақындардың болғанын, барлығы да халықтың сөзін сөйлеп, жыр додасына түскенін білеміз. Қазіргі ақындардың да арасында ата-баба жолынан жаңылмай, домбырасын күмбірлетіп, әділдіктің туын желбіретіп жүрген айтыскерлер жетерлік. Сыр өңірі – сал-серілерді, жыршы-жырауларды шығарған алтын көмбелі аймақ. Сол асыл қазыналарымыздың қазіргі ұрпақтары өнерді өлтірмей, таланттарын танытып жүр. Достық үйінде облыс әкімінің жүлдесі үшін өтіп жатқан «Айтыс олимпиадасы» атты облыстық балалар мен жасөспірімдер айтысы алаңында басқарма басшысы Мира Қазбекова «Ұлттық домбыра» күніне орай бұқаралық ақпарат құралдары өкілдеріне брифинг өткізді.

Брифингте басқарма басшысы «Ұлттық домбыра» күнінің тарихына тоқталып, қазіргі таңда облыстағы мәдениет үйлері мен клубтарында 100 домбыра үйірмесі жұмыс жасап, оған 1020 балалар мен жасөспірімдер қатысатындығын, мемлекеттік тапсырыс аясында ашылған 125 домбыра үйірмесі 2050 баламен қамтылғанын атап өтті.

Негізгі шаралар тізбегінде Қызылорда қаласында өнер жәрмеңкесі ұйымдастырылып, Жүсіп Қадірбергенұлының 150 жылдығына арналған «Қара өлеңнің шебері – Қаңлы Жүсіп» атты республикалық ақындар айтысы болды. Ұлттық домбыра күніне орай облыстың мәдениет ұйымдарында «Ұлы дала үні»,«Қазағымның үнісің сен, домбыра», «Домбыра думан», «Домбыра – ғасырлар мұрасы», «Аңыз домбыра, абыз домбыра» және көптеген танымдық шаралар, күйшілер байқаулары мен фестивальдер, өнер ұжымдарының концерттері, облыс музейлері мен кітапханаларында «Ел тірегі, ұлт мұрасы – домбыра», «Домбыра дастан, домбыра күй», «Ғасырлар пернесі», «Домбыра – қазақ халқының асыл мұрасы» атты көрмелер, музыкалық-өнер сағаттары өтті.

– Балаларды айтыс өнеріне баулу мақсатында облыс әкімінің жүлдесі үшін тұңғыш рет өткізіліп жатқан «Айтыс олимпиадасы» атты облыстық балалар және жасөспірімдер айтысына аудандар мен Қызылорда қаласынан 10 жас ақын қатысты. Сайыс нәтижесі бойынша тарихымыздың тамырын тереңге бойлатып, еліміздің руханиятын жаңа белеске жетелейтін қатарластарының арасынан оза шапқан Нұржігіт Биқожа мен Сымбат Жаппасбай жүлделі ІІІ орынды өзара бөлісті. ІІ орын сырдариялық Нұрахмет пен Шиелілік Дильназ Ержігітке берілсе, І орынды қызылордалық Ұлықбек Бектаев еншіледі. Ал тұңғыш рет облыс әкімінің жүлдесі үшін ұйымдастырылған «Айтыс олимпиадасының » бас жүлдесін жаңақорғандық тамаша талант Мұхамедали Абдуллаев еншіледі.

30 маусымда А.Тоқмағамбетов атындағы мәдениет үйінде Құрманғазы Сағырбайұлының 200 жылдығына және «Ұлттық домбыра» күніне арналып, «Күй мен күйші» атты халық аспаптар оркестрі күйші-концертмейстерлерінің республикалық фестивалі өткізіледі. Фестивальге республиканың 8 облысы мен Қызылорда қаласынан барлығы 12 күйші қатысады,- деді басқарма басшысы жаңалықпен бөлісіп.

Қызылорда облысы өнерлі жастарға құрметпен қарайды. Домбыра аспабының қазақ халқының бір бөлігі екендігін өңіріміз түрлі бағдарламалар арқылы көрсетіп жүр. Биыл домбыра күніне байланысты өткізілген шаралар халықтың көңілінен шығып, өнерлі жандар көпшілік ықыласына бөленді. Енді 1 шілде күні Президент саябағында өтетін «Күмбірле, қоңыр домбыра!» атты гала-концерт ұлттық құңдылығымызды насихаттауға арналмақ.

Қ.НАЙМАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған