Өнер – барша адамның бойынан табыла бермейтін үлкен құбылыс. «Ақыл көпке жеткізер, өнер көкке жеткізер» демекші, өнерлі адамның биіктен орын тауып, жоғары бағаланатыны да осыдан болса керек. Адамзат тарихында өнерлі тұлғалардың тарих тақтасында есімдері әлі айтылатынын байқаймыз. Бұл дегеніміз қаншама жылдар, қаншама ғасырлар өтсе де, өнердің өшпейтінін көрсетеді. Өнердің ішінде адамды тұңғиыққа батырып, қиялмен қанаттандыратын музыка өнері. Музыкада тіл жоқ, алайда жанның жарасын жазатын музыканы кез келген ұлт түсініп, жанына жақын қабылдап жатады. Музыканың тылсым күші тыңдаушының жүрегін тебірентіп, бұл әлемнен көтеріп алып кететіндей күйде қалдырады.
Әлемдік тұлғалардың музыка туралы айтқан ойлары көп. Соның ішінде «Музыка арқылы біз өзімізді үлгілі өнерге бейімдеп өркендете аламыз. Музыканың моральдық мәні сол, біз оның әсерімен таза нәр аламыз, яғни шынайы сүйеміз немесе жиренеміз. Музыканың шын мәнінде біздің жан дүниемізді толқытып, көңілімізді көтеруге құдыреті әбден жетеді» деп Әбу Насыр әл Фарабидің айтқаны ойға бірінші оралады. Музыканың тылсым құдіретке ие екендігін осыдан аңғарсақ болады. Ұлтымыздың әнге жаны құштар перзенттері қазақтың музыка өнерін жоғары көтерді. Қазақ компазиторлары қазақ даласынан шабыттанып, нотаға түрлі әуенді түсіріп, елді рухтандырғаны белгілі. Атап айтсақ, Сыр топырағынан шығып, ұлтымыздың еңсесін тіктеуіне музыкамен өз септігін тигізген Кеңес Дүйсекеев туралы айта аламыз. Халқымызға түрлі әуенді ұсынған композитордың өнері үнемі жоғары бағаланады. ҚР Еңбек сіңірген қайраткері, «Құрмет», «Парасат» ордендерінің иегері Кеңес Дүйсекеев атындағы «Туған жер» атты І халықаралық әншілер конкурсы қаламызда болып өтті. Еліміздің барлық өңірі мен 7 мемлекеттен келген өнерпаздар бақ сынасты. Облыс әкімі Нұрлыбек Нәлібаев байқаудың салтанатты ашылу рәсімінде сөз сөйлеп, қатысушыларға өз тілегін білдірді.
— Мәдениет – ұлт өмірінің айнасы, халықтың рухани келбеті. Бұл ретте Мемлекет басшысы Қасым-Жомарт Кемелұлы Тоқаев әлемдік деңгейдегі бәсекеге қабілетті мәдениетті дамыту үшін елімізде креативті индустриялар базасын қалыптастырудың маңыздылығына баса назар аударып келеді. Мұны жан-дүниесімен сезінетін жанашыр жерлестеріміздің қолдауымен бірқатар мәдениет нысанының құрылысын бастауға мүмкіндік алдық. Өткен жылы ел ағаларымен бірге іргетасын қалаған көпфункционалды 1000 орындық «Өнер орталығын» жыл соңына дейін пайдалануға береміз. Өнер орталығында өтетін концерттердің кәсіби әрі жанды дауыста көрерменге жол тартуына септігін тигізетін симфониялық оркестрдің де тұсауын жаңа ғимаратта кесетін боламыз.
Өнерге құрмет мәңгілік болуы тиіс. Кеңес ағаны халық есінде мәңгі қалдыру үшін есімі Қызылорда облыстық филармониясына берілетін болады. Бұл – барша жерлестеріміздің құрметі мен сыйы, – деді аймақ басшысы.
Республикалық деңгейде өткізілетін бұл конкурс алғаш рет халықаралық деңгейде өткізіліп отыр. Халықаралық турнирді композитордың туған жерінен бастап өткізу Кеңес Дүйсекеевке деген үлкен құрмет деп білеміз. Қазақстанның барлық өңірінен келген қатысушылардан бөлек Болгария, Польша, Армения, Өзбекстан, Тәжікстан, Қырғызстан секілді мемлекеттердің өнерпаздары байқауға қатысып, бақ сынады. Қатысушыларға отандық және шетелдік музыка мамандары қазылық етіп, өнерлеріне баға берді.
Қазақстанның еңбек сіңірген қайраткері, композитор Кеңес Дүйсекеев атындағы І халықаралық конкурс екі күнге созылды. Нәтижесінде, атыраулық әнші Дана Мәжитова бас жүлдені қанжығасына байлады. Ал, жүлделі І орынды «Тамсан» триосы (Ақтөбе) және Михаил Качмарек (Польша), ІІ орынды Айдын Жұмабаев (Астана), Азамат Бекбергенов (Ақтөбе), Абай Сериков (Қырғызстан), ІІІ орынды Алмагүл Батталиева (Алматы), Камила Талғатова (Шығыс Қазақстан облысы), Славея Иванова (Болгария) иеленді. Кенже Майлыбай (Қызылорда облысы, Қазалы ауданы) арнайы жүлде «Үміт» номинациясын алса, «Көрермендер көзайымы» номинациясы Муса Молдабаевқа (Өзбекстан), «Туған жер» номинациясы Ақылбек Табынбаевқа (Қызылорда) бұйырды.
Кеңес Дүйсекеев ұлт тарихында есімі үлкен әріппен жазылып, әндері мәңгіге ұмытылмайтын тұлға. Композитордың халықтың ыстық ықыласына бөленген «Домбыра туралы баллада», «Сәлем саған, туған ел», «Қаракөзайым», «Өкінбе сен» секілді әндері ұлтымыздың өшпейтін әндерінің тізіміне қоса аламыз. Аталған әндерді және басқа да шығармаларын елімізге белгілі әншілер Роза Рымбаева, Нағима Есқалиева, Мақпал Жүнісова, Ақжол Мейірбеков, Жұбаныш Жексенұлы секілді өнер жұлдыздары орындап жүр. Ұлтымыздың рухын көтеретін әндер халқымыздың мәңгілік мұрасына айналды. Сыр өңірінде болып өткен халықаралық конкурс Кеңес Дүйсекеевтің шығармаларын ел алдында дәріптеп, халыққа қайта жаңғырту мақсатында жүзеге асты дей аламыз. Сыр перзенті атындағы конкурс жылда жалғасын тауып, жас таланттарды жарыққа шығаратынына сеніміміз мол.
Қазақбай ӘНДЕШ
