Өнер – адамзат тарихындағы үлкен жетістіктердің бірі. Өнерлі адамның қай ғасырда болмасын, үлкен сый-сыяпатқа ие болып, кез келген жерде сыйлы қонақ болатыны анық. Өнер ұлт таңдамайды, тек қана өнерді түсініп, қабылдап, сезетін жүрек болса болғаны. Ән өнері, би өнері, сөз өнері, қолөнер секілді түрлі бағытқа бөлінген өнердің өз мамандары баршылық. Қазақ халқының әрбір перзенті бойына бір өнерді серік етіп туады. Кезінде өмір сүріп кеткен ұлтымыздың дарынды перзенттерінің еңбектері бүгінде жас ұрпаққа таныс. Негізі халқымыздың болмысына жақын дәстүрлі өнер. Ұлттық аспаптарымыздың сүйемелдеуі арқылы көмейінен жыр төккен таланттарымыз Сыр бойынан көптеп кездеседі. «Сыр елі жыр елі» дегендей, жаны жырға құмар жас өрендеріміз біздің өңірімізде үлкен абыройға ие.
Қызылорда облысында өнерді дәріптеу шаралары жиі ұйымдастырылып тұрады. Осы орайда «Ел іші-өнер кеніші» байқауының салтанатты ашылу рәсімі қалалық мәдени және демалыс паркінде өтті. Қала әкімінің орынбасары Жанмұрат Сейілов маусым айының соңына дейін Қызылорда аспанын ән мен жырға бөлейтін дәстүрлі байқауды ашып беріп, өнер сайысын бастайтын Ақсуат ауылдық округінің өнерпаздарына сәттілік тіледі.
— Қазақ халқының сонау ықылым заманнан келе жатқан салт-дәстүрі, әдет-ғұрпы, мәдениеті мен бар болмысы өнермен байланысты. Сондықтан өнердің қай түрі болмасын, ата-бабамыздан қалған асыл мұрамыз, таусылмас қазынамыз. Осы қастерлі қазынамызды насихаттауды мұрат еткен өнер додасына қатысушы кент және ауылдық округтердің мәдениет үйлеріне, талантты да талапты көркемөнерпаздарына сәттілік, шығармашылық табыс тілеймін,- деді қала әкімінің орынбасары Жанмұрат Жақсымұратұлы.
Қызылорда қаласы әкімдігінің қолдауымен өткізілетін «Ел іші – өнер кеніші» атты дәстүрлі өнер байқауы биыл он бірінші рет байрағын көтерді. Бұл байқау ауылдық мәдениет үйлері мен клубтары арасында әріптестік байланысты нығайтып, шығармашылық бәсекелестік қалыптастыру, әр ауылдан талантты өнерпаздарды анықтау, төл мәдениетімізді, ұлы өнерімізді дәріптеу арқылы мәдениет үйлерінің жұмысын жандандыру мақсатында өткізіліп отыр.
Байқау шымылдығын түрген ақсуаттық өнерпаздар тақырыптық қойылым және концерттік бағдарламасын ұсынып, қала тұрғындары мен қонақтарына ерекше әсер сыйлады.
Өнер байқауы 30 маусымға дейін қалалық мәдени және демалыс паркінде жалғасады. Бекітілген кесте бойынша кент және ауылдық округтердің өнерпаздары өз өнерлерін көрсетеді.
Халқымыздың көңілін көтеріп, жандарына тыныштық сыйлайтын бұл байқаудың берері мол. Ата-бабаларымыз салып кеткен сара жолды жалғастырып жүрген жастарымыздың еңбегі бір төбе. Ұлттық аспабымызды қолына алып, қуатты сөздерін жырмен қатарласа төккен өнерпаздарымыз марапаттарға лайық. Жыл сайын өткізетін байқау өз жолынан жаңылмай, жалғасын таба бермек.
Қ.МАТАЙ
