Сыр елі жырдың елі ғана емес, спорт бәйгелерінде де көк туымызды желбіретіп, ел намысын үстем ететін арда перзенттер туатын киелі мекен. Әлемдік жарыстарда байрағымызды биіктен көрсетіп, ел мерейін асқақтатқан да біздің оғландар. Қамшыбек Қоңқабаев, Бауыржан Жауынтаев, Мақсат Исақабылов секілді даңқты саңлақтар легін атап бастасаңыз, тауыса алмайсыз. Ел мен жердің аты сынға түскен сәттерде сырбойылық спортшылар талай самғады, намысты қолдан бермеді. Егемендік алған жылдардан бері спорттық инфроқұрылым нысандары да көбейіп, қала, облыс тұрғындарына спортпен шұғылдану үшін жағдай жақсарды. Әр жылдары спорт саласын басқарған өз ісінің мамандары Сыр спортының ілгерленуіне еңбек етіп, бүгінгідей ауыз толтырып айтарлықтай нәтижелерге жеткізді.
Шілде айы Сыр спорты саласы үшін жемісті де жеңісті ай болды деп толық айта аламыз. Біздің мықтылар бірнеше мәрте өңір атын, ел атын жеңіс төрінен көрсетті. 15-25 шілде аралығында көршілес Өзбекстан мемлекетінің Ташкент қаласында өткен ауыр атлетикадан 20 жасқа дейінгі жастар арасында Азия чемпионаты болып өтті. Азия елдерінің бағы мен бабы сай келген шын мықтылары қатысқан жарыста жерлесіміз Айсамал Сансызбаева жұлқи көтеру сайысы бойынша алғашқы мүмкіндікте 104 кг зілтемірде асыра көтерсе, серпе көтеру сайсында 130 кг темірді әуеде қалықтатты. Қос сайыс нәтижесімен 234 кг көтеріп, жеңіс төрінде 2-орынға жайғасты. Сол секілді тағы бір дарынды спортшы қызымыз Динара Қыпшақбай 81 кг-ға дейінгі қатысушылар арасында жұлқи көтеруден 89 кг еңсеріп, серпе көтеру сайысы бойынша 111 кг тартатын зілтемірді серпіп, қос сайыс нәтижесін қосқанда 200 кг көтерді. Динара да мерейлі мезетте 3-орынды қанжығасына байлап, қазақ елін қуанышқа бөледі. Сонымен қатар чемпионатта сырбойылық жерлесіміз Төлеген Азамат 61 кг-ға дейінгі спортшылар арасында серпе көтеруден 150, жұлқи көтеруден 112, қос сайыс нәтижесімен 262 кг ауыр темірді көтеріп, қола жүлде иегері атанды. Бұл жеңісімен Азамат ХДСШ (Халықаралық дәрежедегі спорт шебері) нормативін орындады. Осы сәтте ел есімін Азия құрлығы мемлекеттерінің арасында тағы да дүркіреткен дарабоздарды дайындаған жаттықтырушыларды да айта кеткеніміз жөн болар. Спортшылар Альберт Хакимулин, Азамат Мақаш, Мұхаммед Тұрысбеков, Арман Абдраев, Айдос Базарбайұлы секілді өз ісінің кәсіби мамандарынан дәріс алған, шындалған.
Қуаныш үстіне қуаныш құралып 16-25 шілде аралығында Сербия елінің Белград қаласында өткен шахматтан «SVETOZAR GLIGORIC MEMORIAL» халықаралық турнирінде де сырбойылық спортшылар есе жібермеді. Тактикаға құралған үстел ойынында білім мен білік қатар сыналатыны белгілі. Оқ бойы озып, қарсыласқа есе бермеген біздің мықтылар Назерке Нұрғали мен Әсел Серікбай ел мерейін үстем етті. Атаулы турнирге әлемнің 28 мемлекетінен 320 сен тұр мен атайын дейтін кәсіби мықтылар қатысқан. Турнир қорытындысы бойынша Назерке Нұрғали І орын иеленді. Еске сала кетейік, сырбойылық мақтанышымыз Назерке шахматтан әлем чемпионы атанған шын талант. Ал, жас гроссмейстер Әсел Серікбай да жеңісті жолдың ізінен жаңылмай, жалпы есепте 3-орынға жайғасты.
Сыр самбошылары да шілде айын жақсы қорытындылады. 21-24 шілде аралығында Ақтау қаласында Самбодан 2006-2007 жылы туған кіші жасөспірімдер арасында ҚР чемпионатында қызылордалықтар 6 алтын, 6 күміс, 5 қола жүлде иеленді. Командалық есепте де ұлдар арасында 2-орын, қыз балалар арасында 1-орынға шығып, ел чемпионатында Сыр халқының мерейі үстем болды. Боз кілемде облыс намысын қорғап, жеңіс биігінен көрінген біздің жастарды қалай мақтасақ та артық болмас. Республикалық, халықаралық, әлемдік бәйгелерде де асығы алшысынан түсіп, халқын қуанышқа бөлей берсін деген ниетіміз бар.
Алматы облысы, Текелі қаласында 19-24 шілде аралығында Маутинбайктен Қазақстан Республикасының Ұлттық чемпионаты өтті. Қос дөңгелекті велошабандозымыз Алина Саркулова чемпионат қорытындысында Кросс кантри шорт-трек бағдарламасынан 2-орын, Кросс кантри олимпик бағдарламасынан 2-орын иеленіп, қос күміс медаль иегері атанды. Алинаның жаттықтырушысы – Р.Мұратбеков.
Күрестің дзюдо түрімен айналысатын спортшыларымыз да шілде айының 18-21 шілде аралығында Тайланд мемлекетінің Бангкок қаласында атой салып, мерейімізді үстем етті. Дзюдо күресінен өткен Азия чемпионатында Сыр спортшылары Акбар Алтай 73 кг салмақ дәрежесінде 1-орын, қыздар арасында Дина Мұханбет 57 кг дәрежесінде 3-орын иеленді. Боз кілем шеберлерін шыңдап, спорт бәйгесіне дайындаған жаттықтырушылар – К.Қалиұлы, Р.Бурлов, Р.Мұстафаев, С.Жүсіпбекова, Ж.Аманкелді.
26 шілде күні Талдықорған қаласында ауыл жасөспірімдерінің IV жазғы ойындары басталды. Ерекше айта кетуіміз керек, спорт сайысы төрт жылда бір мәрте болатын байрақты бәйге. Оған еліміздің барлық облыстарынан спортшылар қатысады. Сайыста асық ату, қол күресі, баскетбол, волейбол, грек-рим күресі, дзюдо күресі, еркін күрес, қазақ күресі, тоғызқұмалақ, үстел теннисі, шағын футбол, көгалдағы хоккей секілді спорттың 12 түрінен бақ сынасатын болады. Бұл жарыста да сырбойылық саңлақтар олжа салып, облыс намысын үстем ететініне сенім білдіреміз.
Сыр спорты – дамудың даңғыл жолына түскен айтулы сала. Спорт жанашырлары мен кәсіби мамандар барда сырбойылық спортшы жастарымыз әлі де талай әлемдік сайыстарда ел атын төрткүл дүниеге шығара берері сөзсіз. Байрақты бәйгелерде ордалық оғландардың оқ бойы озық шығуына тілектеспіз.
Шернияз ЖАЛҒАСБЕКҰЛЫ
