Бүгінде Сыр елінің еншісіне тиген жеңіс пен жүлде көп. Білімге бүйрегі бұрған жас буынның спортқа қызығушылығы жоғары, тіпті осы салаға қатысты мақсаты айқын, арманы асқақ десек артық айтқандық емес. Нәтижеге жету үшін шыбын жаны шырқырап, қиындықтың қиысқан жолынан қаймықпай өтіп, кептелген кедергіге де тосырқап қалмауы талпынысынан көрінеді. Жеңіс пен жеңіліске жету бір ғана қадам екенін ұғынғандар ұстамдылықпен ұтымды әрекет етуді қаперде ұстайды. Содан болар, додада діттегеніне жетіп, тартыста табандылық танытып, ел мерейін үстем етіп жүр. Жалаудың жерге жығылмай, көкте желбіреуін тілеген Сыр спортшыларының бойында намыс қайнап, жүрегінде Отанға деген сүйіспеншілік сайрап жатыр. Демек, рух асқақтағы асу алып, белесті бағындырар жолда ақсап қалмауға мүмкіндік береді. Білектілер биік шыңға шығуда шымырлық пен шыншылдықтың қажет екенін де жақсы біледі. Сондықтан жеңіске ұмтылатын кіл мықтылар жарыста алға ұмтылып, жетістіктерге жетуде.
Аяқ пен жұдырықтың өнеріне баланған таеквондода жаныңды көзіне көрсететін қауіп жоқ емес. Қарсылас аяқты сермеп тепкенде қорғаныс мықты болмаса, бірден сұлап түсесің. Сосын қайта тұрмақ түгілі жұдырық ала жүгіруге шама жетпесе, шаршы алаңда шалыс бастым деген сол болады. Сондықтан қара күшке ғана емес, ақыл-амалына жүгінетін таэквондо тарландары аяқтың аспаннан келмесі үшін бәрін саралап алады. 10-13 қараша аралығында Қарағанды қаласында өткен таеквондодан Ауған соғысының жауынгерлерін еске алуға арналған ХVІІ республикалық ашық турнирі өтті. Турнирде жеңіске лайық екендігін дәлелдеген Сыр спортшылары үш бірдей орынға ие болып, марапат мінберінен көрінді. Қызылорда облысының мүгедектерге арналған спорт клубының таеквондошылары жақсы нәтиже көрсетті. Жігіттермен қатар бағын сынаған қыздар да 1,2 және 3-орындарды иеленді. Қуатты балалардың бетінен қақпай, белін буып, бейімділігін байқап, қолдау көрсеткен жаттықтырушысы – Өміржан Мектепов.
Чемпионаттарда да асығы алшысынан түсетін спортшылар талай мәрте тұғырдан көрініп, елге жағымды жаңалық жеткізіп келеді. Әсте, олар қызу тартыста құр бекер ақ тер, көк тер болмайтыны ақиқат. Әлем төрінде егеменді еліміздің еңсесін көтеріп, қанға сінген қайсарлықтың қалпын көрсетеді. Елдің мақтанышына айналған спортшылардың өзіне тән өр мінезбен тығырықтан шығуы мықтылығынан. Иә, шын мықтыға ешкім де күмән келтірмейді. 9-15 қараша аралығында Қазан қаласында жекпе-жек сайыстан ересектер және әйелдер арасында Азия чемпионаты өтті. Чемпионатта Сыр спортшысы Бауыржан Сұлтанов 60 кг салмақ дәрежесінде 2-орынмен күміс жүлдеге ие болды.
Чемпионаттағы қуантарлық жеңістер мұнымен тәмамдалмақ емес. 30 қазан мен 13 қараша аралығында Иорданияның Амман қаласында бокстан Азия чемпионаты өтуде. Чемпионатта 92 кг аса ауыр салмақта өнер көрсеткен Қамшыбек Қоңқабаев күміс жүлдегер атанды. Әр елдің мықтылары жиналған ойында қайратты Қамшыбек Корея және Тәжікстан боксшыларын жеңіп, ақтық ойынға жолдама алған болатын. Финалда Қамшыбек Өзбекстанның былғары қолғап иегері, былтырғы бокстан Әлем чемпионатының ширек финалисі Лазизбек Муллажоновқа есесін жіберіп алды. Әлбетте, кейде «әттегең-ай» деп аһ ұратып, «қап» деп қапы қалатын кездер болады. Оның үстіне жеңіс пен жеңілістің қатар жүруі де өмір заңдылығы. Бастысы, спортшымыз сан соғып қалмай, үздік екенін аңғартып, ақтық ойынға дейін өнер көрсетті. Қайсар қыздардан қалыс қалмай, шама-шарқы келгенше тырысып бағып, үздікке ілінді. Яғни Гүлсая Ержан аталған чемпионатта әйелдер арасында 81 кг салмақ дәрежесімен күміс жүлдегер атанды. Айта кетейік, Гүлсая Вьетнам спортшысын жеңіп, ақтық ойынға шықса, финалда Үнді спортшысына есесін жіберіп алды. Дей тұрғанмен, чемпионатта жер шұқып қалмай, білік деңгейін көрстеудің өзі жеңіспен пара-пар.
Кикбоксингтің келешекке керек спорт екені айтылып келеді. Жұдырықпен соғу, тебу және аяқпен жұмыс істеуді қамтитын жекпе-жек өнерінің бұл түрі тасада қалып жатқан жоқ. Өйткені, осы спортпен шұғылдануды қолға алып, сондай-ақ жеңіске жетуді көздеген талай тарландар бар. Дегенмен, кикбоксинг қауіпсіз спорт деп қарастырылғанымен, жарақат алу қаупі де жоқ емес. Мәселен, деректерге сүйенсек, иық, арқа, жамбас, тізе және тобық буындарының жарақаттану ықтималдығы жоғары. Кикбоксингтен Сыр спортшыларының көрсеткен нәтижесі жақсы. 7-15 қараша аралығында Солтүстік Қазақстан облысында кикбоксингтен ересектер арсында Қазақстан кубогы өткен болатын. Жарыс қорытындысы бойынша Диас Карманов 1-орынға, Диас Иманмұса мен Алиасқар Утеуов 2-орынға, Дамир Айдосұлы 3-орынға ие болды. Жанашырлықпен қолдау көрсеткен жаттықтырушысы Қайрат Байқуатов.
Сонымен қатар, 8-9 қараша аралығында Әзірбайжанның Баку қаласында пара дзюдодан Әлем чемпионаты өтті. Чемпионатта ел намысын қорғап жүрген Қызылорда облысының спортшысы, Ұлттық құрама мүшесі, халықаралық дәрежедегі спорт шебері Олжас Оразалыұлы 73 келі салмақ дәрежесінде қола медальға ие болды. Айта кетейік, спортшының шеберлігі байқалып, бабы сыналатын, дайындық деңгейі көрсетілетін жарысқа 41 елден 400-ден астам спортшы қатысты. Жетістікке жеткен спортшының жаттықтырушылары – Жанарбек Сансызбаев және Руслан Беркімбай.
Иә, көңілге жылылық пен қуаныш сыйлайтын жеңіс пен жетістік легі осымен тоқтамайтынына кәміл сенеміз. Сыр спортшыларының кедергіден кесіп өтіп, жарыста жығылмай топ жарып жүргені бәріне мәлім. Ендеше бетке ұстар айбынды һәм айбатты ұл-қыздар барда жүзіміздің жерге қарамайтыны анық.
Замира ҚОНЫСЖАН
