ҚР Энергетика министрінің 2024 жылғы 21 қазандағы бұйрығына сәйкес электр энергиясының тарифтеріне өзгерістер енгізілді. Соған байланысты 2024 жылдың 1 қарашасынан бастап тарифтер қымбаттайтыны айтылды.
Айтар болсақ, «бірінші топ (Б.Нұржанов атындағы Екібастұз ГРЭС-1) – кВт/сағ үшін 8,05 теңгеден 8,27 теңгеге дейін; екінші топ (Еуразиялық энергетикалық корпорация) – 7,40 теңгеден 7,98 теңгеге дейін; тоғызыншы топ («Астана-Энергия» АҚ) – 8,49 теңгеден 9,28 теңгеге дейін; 12-топ («Қазақстан алюминийі» АҚ) – 6,05 теңгеден 7,87 теңгеге дейін; 18-топ («Степногорск ЖЭО» ЖШС) – 22,58 теңгеден 28,97 теңгеге дейін; 28-топ («Жаңажол ГТП» ЖШС) – 11,44 теңгеден 11,85 теңгеге дейін; 39-топ («З-Энергоорталық» АҚ) – 13,79 теңгеден 15,09 теңгеге дейін; 48-топ (ТНК «Қазхром» АҚ) – 7,59 теңгеден 10,67 теңгеге дейін» деп көрсетілген.
Сонымен қатар, тізімге жаңа компаниялар қосылды, олардың тарифтерін алғаш рет бекітіпті. Олар үшін кВт/сағ үшін 43,92 теңге тарифпен 56-топ; 56,63 теңге тарифпен 57-топ; 26,08 теңге тарифпен 58-топ; 22,56 теңге тарифпен 59-топ; 60-топ тарифі 3,07 теңге болады екен.
Бір қызығы, Қызылордада электр энергиясының қалай, қашан қымбаттап жатқанын білмейміз. Айтыла да бермейді. Тұтынушылар жарығы өшіп қалмасын деп, көрсетілген соманы төлеуге асығады. Расын айтсақ, осы күні әр кВт/сағ үшін 24,66 теңге төлеп жүрміз. Ал, Алматыда 25,94 теңге. Көп айырмашылық жоқ. Сонда тағы қымбаттамақ па, ешкім түсіндіріп айтпайды.
Тағы бір жұмбақ мекеме, «Трансгаз» мекемесі. Олармен дауласу үшін уақыт пен жүйке керек. Олар да қымбаттатқаннан алдарына жан салмайды. Нақты айтсақ, биыл шілде айынан бастап газ тұтынушыларына газ бағасының қымбатталғаны айтылмады. 16,32 теңгеден 19,87 теңгеге бір-ақ секірді. Пайызға шаққанда 22 %-ға қымбаттап тұр. Себебін сұрағанымызда, «Статусқа жазылды» деген жауап алдық. «Статус ақпарат құралына қашан айналып үлгірген әлде бұқаралық ақпарат құралдары арқылы хабарласақ, қарсылыққа тап боламыз деп ойлады ма екен?» деген сұрақ туындайды. «Енді қарашада бұлар не істейді екен?» деп күтіп отырмыз.
Келесі «қымбаттатқыш мекеме» байланыс операторлары. Ұялы телефон үшін ай сайын бірдеңе шығарады. Жақында «абонентттік ақы желтоқсаннан бастап 11 мың теңге болады» деген хабарлама келді. Оған дейін 9500 теңге болып келген. Антимонополия деген мекемені ұмыттық қазір. Монополистердің бәрін нарық реттеп отыр, өздері біледі. «Жарық жаққыңыз келмесе, газсыз күн көргіңіз келсе, байланыссыз отыруды қаласаңыз, өзіңіз біліңіз» дегенге саяды әрекеттері.
Жарық пен газ, одан қалды жанар-жағар май қымбаттаса, одан әрі не болатыны түсінікті. Базардан хабар ала бер.
Негізі мемлекетіміз бар, заңы бар, галстук таққан билігі бар, бірақ халқы осылай «бір түрлі» өмір сүреді…
Ұ.Досалы
