Сыр өңірінде нәтижелі жұмыстар қолға алынды

Үкімет отырысында Қызылорда мақтаулы бес аймақтың қатарына енді

«Ыстығы төбеңізді күйдіретін, желі бетіңізді қақтайтын Қызылорда өңірінде сумен қамту қарқынды түрде жүруде» десек, сенбеуіңіз мүмкін. Бірақ статистика солай сөйлейді. Сумен қамту бойынша өңіріміз алдыңғы қатарда. Ауызсуды тұрғындарға уақытылы ұсынып, кедергісіз жұмыс жасауда.

ҚР Премьер-министрі Әлихан Смайыловтың төрағалығымен өткен жиында қалалар мен ауылдық елді мекендерді сумен жабдықтау, орта мерзімді кезеңге арналған азық-түлік қауіпсіздігін қамтамасыз ету жоспарын іске асыру мәселелері қаралды. «Қызылорда облысы қалалық елді мекендерді сумен қамту бойынша 100 % көрсеткішке қол жеткізді» деп ведомство басшысы айтты. Солтүстік Қазақстан, Маңғыстау, Атырау, Жетісу, Батыс Қазақстан, Ұлытау, Ақтөбе, Алматы облыстары да үздіктер қатарында. Ауылдық елді мекендерді ауыз сумен қамту бойынша 98,1 % көрсеткішпен Қызылорда облысы аймақтар арасында 5-орынға тұрақтаған.

Ауыз суды тұтынатын халықтың талабы дұрыс бағытта жасалу үстінде. Таза, тұщы суды тұтынған халықтың сырқаттануы да екіталай. Сапа көрсеткіші жағынан Сыр өңірі алдыңғы қатардан табылары сөзсіз.

Облыс әкімі Нұрлыбек Нәлібаев Үкімет отырысынан кейін Премьер-министр берген тапсырмаларды пысықтау үшін жиын өткізді. Елді мекендерді өңір басшысы 2025 жылдың соңына дейін Үкімет 100 пайызға ауызсумен қамтамасыз ету міндетін қойғанын айтып, ауызсу жеткізілмеген ауылдарға тиісті шаралар жүргізіп, жұмысты тез арада бастау­ды тапсырды.

– Бүгінгі күні облыстағы 230 ауылдық елді мекеннің 198-і немесе тұрғындардың 98,1 пайызы орталықтандырылған су жүйесіне қосылған. Дегенмен, Арал, Қазалы, Қармақшы және Шиелі аудандарында барлығы 32 ауылдық елді мекенде ішкі су құбыры салынбаған. Бұл ауылдар тасымал арқылы немесе тікелей скважинадан ауызсу пайдалануда. Біз белгіленген уақыт – 2025 жылды күтпеуіміз керек. Ішкі су жүйелерін салу жоспарланған барлық елді мекендердің жобалау құжаттарын биыл аяқтау қажет,– деді Нұрлыбек Машбекұлы.

Күн тәртібіндегі екінші мәселе – Қазақстан Республикасының азық-түлік қауіпсіздігін қамтамасыз етудің 2022-2024 жылдарға арналған жоспарының Сыр өңірінде іске асыру барысы. Аймақтың өнім өндіру әлеуеті жоғары екенін, егін шаруа­шылығын әртараптандыруға бетбұрыс жасау керектігін облыс әкімі атап өтті. Осы себепті, Қызылорда қаласы және аудан әкімдеріне майлы, көкөніс, бақша, жемшөп дақылдарының алқаптары көктемгі егін егу кезеңінде кеңейту тапсырылды. Азық-түлік түрлері мен өндірісін әртараптандыру арқылы молайтып, «Байқоңыр» ӘКҚ» АҚ-мен жергілікті ауыл шаруашылығы тауар өндірушілері бірлесіп, қаржылық заем беру керек. Көкөніс өнімдерін өндіріп, тұрақтандыру қорына өткізу жұмыстарын ұйымдастыру тиісті басшыларға міндеттелді.

Ішкі өнімдер үнемі сұраныста болуы керек. Себебі, өзіміздің өнімді пайдалансу арқылы жергілікті шаруалардың жұмысын жүргіземіз. Ауыл шаруа­шылығын дамытсақ, сыртқа экспорттау арқылы ішкі нарықтағы экономикамыздың әлеуетін көтеріп алған болар едік. Диқаншылықпен айналысу қазақ халқынан жат құбылыс емес. Көктем шыға жер жыр­тып, дақылдарды егіп бастайтын диқаншылар да егін егуін тоқтатпақ емес. Сырдария бойын мекен етіп, жер-ананың жақсылығын көріп, пайдаға жаратып жүрген шаруалардың жұмыстары енді қыза түспек.

Әр ауданда облыс диқандары өндірген өнімдерді сақтайтын қоймалардың қуаттылығын ұлғайту үшін қажеттілікке қарай салу керектігі айтылды. Азық-түлік өндірісіне инвесторлар тарту шараларын қабылдау ауыл кешеніндегі инвестициялық салымдардың көлемін ұлғайту мақсатында міндеттелді. Қызылорда қаласындағы ет комбинаты, Жаңақорған мен Қармақшы аудандарындағы құс фабрика құрылыстарын 2023 жылдың соңына дейін аяқтау жөніндегі тапсырма облыстық кәсіпкерлік және өнеркәсіп басқармасына берілді.

Сыр шаһарында жасалып жатқан жұмыстардың жақсы нәтижемен аяқталып жатқанынан барша жұрт хабардар. Сыр елінің шешілуге тиісті мәселелері біртіндеп жүзеге асып, мемлекет тарапынан қолдау тауып атқарылуда. Бұдан кейін де айтулы жұмыстар жасалып, өңіріміздің дамуы ілгері жүре бермек.

Қ.ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған