Парасаттылығымен пайымдап, байсалдылықпен байламға келіп, ерікті еңбек жолында ерінбей әрекет еткен адам ғана – абыройдың асқар биігінен көрінетіні сөзсіз. Әдептілік әдебін әдетке айналдырған жан да асқан ақылдылығымен түйдектелген түйткілдің түйінін шешетіні белгілі. Осы орайда, ұстаздық ұлы жолын ұмытпай, өзін білім саласымен байланыстыра білген Ақзира Қасымованың шыңға шыққаны шындық. Алғашқы еңбек жолын мұғалім болудан бастап мектеп басшысы лауазымына дейін көтеріліп, кейін облыстық білім басқармасының басшысы боп бекітілуі ізденісі мен ізгілігінің нәтижесі. Тәжді вирустың кең таралған уақытында қызметке тағайындалса да, қиындыққа қарамастан табандылық танытты. Басшылық қызметінде қажырлылық көрсеткен А.Бақтыбайқызы білім саласының жандануына өз үлесін қоса білді. Сындарлы сындардан сүрінбей өтіп, әрбір жарқын жоба мен жүйелі жоспардың жетекшісіне айналғаны жасырын емес.
Білімге келгенде біліктілігімен белді бекем буған басшы әр білім ордасында болған тағылымды шаралардың бірінен қалмай, қолдау көрсетті. Талантты оқушылардың талпынысын байқап, дарындылардың даңғыл жолға түсуіне де ықпал етті. Салмағы басым білім саласының ауыр жүгін арқалап, бала болашағына қатысты нақты шешімдер шығаруы – көшбасшылық қасиеті мен еңбекқорлығының үлгісі. Ұстаздардың, әсіресе жас мамандардың жұмысына ерекше көңіл бөліп, әр қадамына сәттілік тіледі. Қысқасы, Ақзира Қасымова екі жыл тізгінін ұстаған бұл саланың жеткен жетістігі һәм шыққан биігі көп. Бүгінде біз ерен еңбегін сөз етіп отырған басшы жаңа қызметке ауысып, қала әкімінің орынбасары болып тағайындалды. Демек, әр қадамын нық басып, әр сөзін дөп сөйлейтін жан жаңа ортаны жатсынбай, жүктелген жауапкершілікті адал орындап, жағымды жаңалықтармен қуантатынына сенім мол. Қызылорда қаласының қалыпты дамуына септігін тигізері хақ. Олай болса, Ақзира Бақтыбайқызын жаңа қызметімен құттықтай отырып, сәттілік пен табыс тілейміз!
«Ұстаз мәртебесі» газеті
