Қаланың көркі – көпқабатты тұрғын үйлер

Облыс әкімі туған жерге жанашыр кәсіпкерлермен кездесті

Қаланың көркі зәулім ғимараттар, көпқабатты тұрғын үйлер екендігі даусыз. Көзге оттай басылып, түрлі-түсті үйлердің келуші қонақтарға да, тұрғындарға да ұнайтыны тағы бар. Қазіргі таңда ескірген ғимараттардың жөндеу жұмыстарына мемлекет тарапынан көңіл бөлініп-ақ жүр. Тұрғындардың талабы, қаланың әсемдігі үшін атқарылатын шаруалар кезегімен жасалуда. Бірлік бар жерде тірліктің барын қазақ халқы жақсы біледі. Сол себепті жергілікті басшылық та, тұрғындар да бір-бірімен пікір алмаса отырып, қаланы көркейтуге атсалысу қажет. Туған жердің қадірін сонда перзенті түсінеді. Адал еңбекпен биікке шығып, қоғамға сыйлы болып жүрген жандар арамызда да бар. Қаржы бөлу арқылы туған жерге деген құрметін көрсетуге даяр кәсіпкерлерді айтқанымыз жөн болар. Адам өз өлкесінен жырақ кетсе де, көңілі туып-өскен мекеніне ауып тұрады. Кәсіпкерлердің жасап жатқан игілікті қадамдары туған жерге тарту жасау­дан туындаған дүние.

Жергілікті басшылық та қаланы көркейту жұмыстарын белсенді атқаруда. Бөлінген қаржыны тиісті жерге жеткізіп, тұрғындардың жайлы өмір сүруі үшін қолынан келгенше жұмыс жасауда. Тұрғын үйлердің жаңа көрік алуы үшін жасалып жатқан жұмыстар туралы, Қызылорда қаласындағы көпқабатты үйлердің қасбеттерін жаңалауға қаржы бөлген кәсіпкерлермен облыс әкімі Нұрлыбек Нәлібаев кездесті.

Бұл жұмысқа жоба бойынша ауданы 40000 шаршы метр заманауи материалдар қолданылады. Тұрғын үйлердің тұрғындар көзіне ерекше түсіп, сәулеттік келбеті жарасымды болуы үшін соңғы үлгідегі сапалы материалдардың көмегі көп.

Қазір қала құрылысшылары мен кәсіпкерлердің қолдауымен әрлеу жұмыстары қарқынды жүзеге асуда. Абай даңғылындағы №46, №54, №62 үйлер, Сырдария шағын ауданындағы №1 және №2 тұрғын үйлердің сыртқы жұмыс­тары жасалуда. Негізі шілде айына дейін аяқталады деп жоспарланған. Осы тұрғыда жұмыстың сапалы болуына басымдылық берілу керектігін аймақ басшысы атап өтті. Туған жерді көркейту әр тұрғынның парызы екендігін айтып, жерлестерін белсене жұмыс жасауға шақырды. Кездесуден соң қолданылатын материалдардың түрлерімен, сапасымен танысты.

Халықтың жағдайын жасап, олар­дың талаптарымен санасу ке­рек­тігін мемлекет басшысы өз жол­­дау­­ларында айтып жүр. Қара­ша­ның мемлекет тарапынан қолдау көруі, биліктің халықтан алғыс алуды қос тарап әдетке айналдыру керек.

– Мемлекет басшысы Қасым- Жомарт Кемелұлы туған же­ріне жанашырлықпен қарайтын кәсіпкерлерді патриотизм мен әлеуметтік жауапкершіліктің үлгісін көрсетіп, ел экономикасын дамытуға үлес қосуға шақырған болатын. Бұл жұмыстарға жергілікті кәсіп­кер­лер, осы топырақтан түлеген меце­наттар белсенді араласуда. Қайы­­рымдылық шараларына, ата­меке­нін көркейтуге бар күш-жігерін салуда, – деді Нұрлыбек Машбекұлы.

Қаламыздың әсемдігі үшін атқарылатын шаруалардың тоқтау­сыз жалғасын тауып жатқандары тұрғындарды қуантады. Қалаға ағылып келетін адамдардың қарасы көп. Солардың қажеттілігін қамту үшін де тұрғын үйлердің салынып жатқандығы барша тұрғындарға мәлім. Тұрғын үй мәселесінде Сыр өңірінде ауыз толтырып айтатын жұмыстар жасалып жүр. Жергілікті кәсіпкерлердің көмегінің арқасында жөндеуді қажет ететін үйлердің қайтадан жаңарып салғандай болары сөзсіз.

Тоқтаусыз жұмыстардың арқасында ғана түйткілді мәселелер шеші­леді. Сыр өңірінде жүзеге асып жатқан шаруалардың бірі аяқ­талып, халықтың алғысына бөлен­се, енді бірінің жұмыстары жалғасуда. Халықтың жергілікті басшылықтың жұмыстарына көңі­лі толып жүргендігін, жасалып жатқан жұмыстардың нәтижесінен байқауға болады. Болашақта Сыр өңірінің еліміздегі ең әдемі облыс орталығы боларына сеніміміз мол.

Қ.ӨТЕБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған