Қызылорда қаласының әкімі Асылбек Шәменов

шаһардың инфрақұрылым мәселесін шешуді басты назарға алды

Ұланғайыр атырапта өз тарихын жазған қазақ халқы қазір заманауи нысандарға мұқтаж. Адамның жақсы өмір сүруіне бағытталған, заманның талабы саналатын нысандар елімізде бой көтере бастады. Түрлі қажеттілікті өтейтін нысандардың жұмысы халықтың еңбекпен қамтылуына, өз қажетіне сай дүниелерді тұтынуына септігі мол. Атқарылып жатқан шаруа­лар жетіп артылады.

Қызылорда қаласы күн сайып ұлғайып, жылдан-жылға құрылыс жұмыстарының қарқын алып жатқандығын байқаймыз. Қала әкімі Асылбек Шәменов тұрғын үй коммуналдық шаруашылығын жаңғырту, отандық өндірісті дамытуға байланысты қала аумағында жасалып жатқан істердің сапасын бақылап, жылдар бойы қордаланған инфрақұрылым мәселесін шешу мақсатында бірқатар нысандарды аралап, жұмыстарымен танысты.

Тұрғындардың негізгі мәселесі – тұрғын үй. Әр отбасының жеке баспанасы болып, өзгенің есігін сығаламай, өз үйінде еркін жүруін пәтер жалдайтын барлық адам қалайды. Мемлекетіміз де тұрғын үй мәселесін шешу үшін тиімді жобалар жасауды жалғастыруда. Сыр жерінде де баспана тақырыбы өзектілігін жоғалтпады. Қарашаның қалауы бір бөлмелі болсын, пәтерге қол жеткізгісі келіп, еңбектеніп жүргендері белгілі. Мемлекет тарапынан соғылып жатқан үйлердің көптігі көп адамның пәтер алуына мүмкіндік береді. Қызылорда қаласында да тұрғын үй құрылыс жұмыстары жүргізілуде.

Алдымен құрылысы жақында ғана басталған сол жағалаудағы 84 пәтерлі 7 қабатты 6 тұрғын үйдің аумағына қала басшысы барып, жұмыс барысын бақылады. Тұрғын үйдің құрылысы, жасалып жатқан жұмыс барысын тиісті  бөлім басшысы Айдын Әнуар баян етсе, мердігер компания «Аман құрылыс» ЖШС-нің директоры Ә.Маштаев 2024 жылдың желтоқсан айында нысан пайдалануға берілетінінен хабардар етті. Құрылыс жұмыстары сәттілік тілеп, жасалып жатқан жұмыстың үнемі өз бақылауында болатынын қала әкімі Асылбек Шәменов мердігер компания басшысына ескертті.

– Мемлекет басшысы ондаған жыл бойы жинақталған инфрақұрылым мәселелерін шешу және тұрғын үй-коммуналдық шаруашылығын жаңғыртуды қолға алуды тапсырғанын білесіздер. Бұл ретте, салынып жатқан 7 қабатты үйлердің орны бөлек әрі жауапкершілігі де жоғары екенін ұмытпаған жөн. Сондықтан тұрғындар өміріне қауіпсіздігі мен барлық техникалық мүмкіндіктерін мүлт жібермеу керек,– деген шаһар басшысы қаланың сол жағалауында салынып жатқан басқа да көпқабатты 10 үйдің құрылыс жұмыстарын да аралап көрді.

Сұлтан Бейбарыс көшесінің Н.Назарбаев даңғылынан басталып, Тәуелсіздік даңғылына дейінгі аралықтағы абаттандыру жұмыс­тарын да бақылады. Көшенің бір шақырымға созылған бұл бөлігі 6 жолақты, көшенің бойына әсемдік сыйлау үшін екі субұрқақ, скверлер және балалар ойын алаңдары салынады. Осы уақытқа дейін көптеген жобаны жүзеге асырып жүрген «Техоснастка-Ремсервис» ЖШС-нің жұмысты сапалы жасайтынына шаһар басшысы сенім білдірді. Сонымен қатар Н.Назарбаев даңғылынан Қызыл­орда-Құмкөл трассасына дейінгі қайта жаңғырту жұмыстарын да қала әкімі өз көзімен көрді. Бұған дейін көліктердің қозғалысы тоқтамайтын республикалық маңызы бар көше тұрғындарды алаңдатушы еді. Ендігі кезекте бұл мәселе де өз шешімін табатын болады. Бұл жұмысты қолға алған «УАД» ЖШС аймақтағы жөндеу жұмыстарын сапалы жүргізіп келе жатқан мердігер компания. Қала әкімі Асылбек Шәменов Сұлтан Бейбарыс көшесін абаттандыру керектігін, жұмыс қазан-қараша айында толық аяқталуы тиіс екендігін айтып өтті.

Спортпен шұғылданатын тұрғындар кез-келген адамға үлгі болары анық. Жасөспірімдер де спортқа қызығып, салауатты өмір салтын ұстануы үшін алдыңғы буын ағаларына көз тастауы қажет. Үлкен кісілердің де спортпен айналысуы дәріптелуі тиіс. Осы орайда Тасбөгет кентінде денешынықтыру-сауықтыру кешені салынып жатыр. Қала әкімі құрылыстың жұмыс барысын бағамдады. 2024 жылдың наурыз айында аяқталуы тиіс маңызды жобалардың бірі болып саналатын нысанның құны – 542,1 млн. теңгені құрайды. Жауапты мердігер «Интегрострой» ЖШС.

Азаматтардың тұрмысын жақсарту мақсатында мемлекет басшысы берген тапсырмалардың маңыздылығын айтқан шаһар басшысы кешеннің сапасы мен қауіпсіздігі негізгі мәселе болу керектігін тілге тиек етті. Осы күні «Саяхат» шағын ауданындағы Ш.Бәкірова көшесінде де қызу жұмыс жүргізілуде. «Қызылорда-Траст» ЖШС бір шақырымға жуық көшенің орташа жөндеу жұмысына жауапты компания болып бекітілген.

Сүт өнімдері – үнемі сұраныста болатын өнімдердің бірі. Оның үстіне адам саны артып келе жатқан Қызылорда қаласы үшін аса қажет. Осы орайда қала әкімі Белкөл кентіндегі сауын фермасымен танысты. «Абай» шаруа қожалығына тиесілі нысан кәсіпкер Мұрат Нұрсейітовтің өз қаржысына салынуда. Аумағы 15 гектар сүт фермасында бір мезетте 450 бас сиыр сауылады. Алдағы жылдың қыркүйегінде нысан толық іске қосылғанда, 300 адам жұмыспен қамтылады. Жұмыссыздықты азайтуға үлес қосатынын, жобаның маңызды екенін айтқан қала әкімі Асылбек Шәменов кәсіпкерге сәттілік тіледі. Сонымен бірге мемлекет басшысының «Отандық өндірісті дамытуға негізгі басымдық берілуге тиіс. Агроөнеркәсіп кешенінің өнімділігін арттырудың маңызы зор. «Қазақстанда жасалған» өнімдер бәсекеге қабілетті және қолжетімді бағада болуы керек» деген тапсырмасын тілге тиек етіп, осы бағытта жұмыс жасайтын кәсіпкерлерді әрдайым қолдауға дайын екенін білдірді.

Асылбек Шәменовтың қала аумағындағы сапары барысында көптің сынына ұшырап жүрген Бәйтерек тұрғын ауданын да қалыс қалдырмады. Қызылжарма каналы арқылы Бәйтерек ықшам ауданына өтетін көпір құрылысымен таныс­ты. Ұзындығы 47, ені 10 метр болатын көпірдің жай-күйін қала­лық тұрғын үй-коммуналдық шаруа­шылығы, жолаушылар кө­лігі және автомобиль жолдары бө­лі­мінің басшысы Ж.Файзуллаев, жау­апты мердігер компания «Стан­дарт Ойл» ЖШС-нің директоры А.Ертаев баяндап, көпірдің сапалы әрі уақытылы ел игілігіне табысталатынын баяндады, тамыз айынан бастап Қызылжарма каналын асып өтетін көпірдің дайын болатынын айтты.

Қорқыт ата тұрғын ауданына қала әкімі бастаған топ барып, Күлтегін көшесіне орташа жол жөндеу жұмыстарының қызу жүргізіліп жатқанының үстінен түсті. Бір шақырымнан асатын көшені мердігер мекеме «Қызылорда-Траст» ЖШС директоры Н.Көшеков маусым айында аяқтауды меже етіп алыпты.

Өңірімізде барлық проблемалар кезекпен өз шешімін табуда. Халықтың өмір сүру сапасын жақсарту мақсатында елді мекендерді сапалы ауыз сумен және табиғи көгілдір отынмен қамтамасыз ету күн тәртібінен түскен емес. Қазіргі таңда Сыр өңірінің барлық аудан орталықтары көгілдір отынмен қамтылған. Елді мекендерге газ тарту жұмыстары да

жүргізіліп жатыр. Осындай жұмысты қалаға қарасты Қосшыңырау ауылдық округінен де көруге болады. Ауылдық округке қала әкімі газ қосу жұмысының сапасын бақылау үшін арнайы барды. 662,7 миллион теңге – Абай, Досан ауылдарына газ тарту жұмыстарына бөлінген қаржының құны. «Ремстрой» ЖШС ел асыға күткен шаруаны «желтоқсан айына дейін жасап бітіреміз» деп уәдесін беріп отыр.

Қала әкімі Қызылжарма ауылдық округіндегі Ә.Сайлыбаев көшесінде жүргізіліп жатқан орташа жол жөндеу жұмыстарымен танысуға арнайы барды. Ұзындығы жарты шақырымды құрайтын көшеде жөндеу жұмыстары наурыз айында басталған болатын. Мердігер компания «Орда Автодор» ЖШС-іне мамыр айына дейін жұмысты бітіру тапсырылды.

Сонымен қатар, Титов тұрғын ауданындағы Жанкент көшесінің тұрғындары маусым айынан бастап жаяу жүргіншілер жолының игілігін көрмек. «Қызылорда жолдары» ЖШС 1 шақырымға жуық тротуар құрылысымен айналысуда. «Қызылорда жолдары» мердігер мекемесінің міндетіне тағы бір жұмыс тапсырылған. Ол – Шанхай тұрғын ауданындағы 8-наурыз көшесіндегі орташа жол жөндеу жұмыстары. Бұл шағын ауданда құны 253,9 млн теңгені құрайтын 18 көше жөнделмек.

Қаладағы жасалып жатқан жұмыстардың реті осындай. Қала әкімі Асылбек Шәменов тікелей бақылап, талап ете отырып, тапсырмалар беруі жұмыстардың нәтижелі әрі сапалы болуына өз әсерін тигізеді. Жыл сайын жасалатын жұмыстардың арқасында Қызылорда қаласы көркейіп, тұрғындар қаланың сұлулығымен мақтанатын күн де алыс емес. Тұрғындардың игілігіне берілетін нысандардың көптігі көңіл қуантады. Бүгінде қаланың даму перс­пективасына сенім мол.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған