Татулық – әлем мемлекеттеріне керек қасиеттердің бірі. Жер шарын мекен етуші адамдардың өз қалаулары үшін бір-бірімен бет жыртысып, бір елдің басқа елге соғыс ашып жатқандарын жаңалықтардан көріп жүрміз. Адамдарға не үшін татулық жетіспей жүр? Шамасы, өзіндік күштің көптігіне масаттанып, өзгенің шекарасын бұзуды ойлайтындардың бары жасырын емес. Әлем тату болса, соғыс болмайтыны, соғыссыз әлемде баянды болашақтың қалыптасатынын көзі ашық адамдар түсінеді.
Қазақ халқы ерте кезден татулыққа жаны құштар. «Ынтымақ түбі – береке», «Ынтымақ жүрген жерде ырыс бар», «Бірлігі жоқ ел тозады, бірлігі күшті ел озады» сынды асыл сөзімен бірлікке шақыратынын байқауға болады. Қонақжайлығы бойынан кетпеген қазақ халқына көптеген ұлт пен ұлыстар алғысын айтады. Кеңес дәуірінде өзге ұлттарды жер аударып, қазақ жеріне әкеліп тастағанда, бір бөлмелі баспанасын бөлісіп, қонақжайлық көрсеткен қазақ халқының жақсылығы санадан өшпейді. Тәуелсіз ел болған тұста да, өзге ұлтты бөліп-жармай жақсылық жасаған халқымыз бүгінгі таңда сол өзге ұлттармен бір тудың астында өмір кешуде.
Жыл сайын елімізде 1 мамырда тойланатын Қазақстан халқының бірлігі күні Сыр топырағында, әр ауданда, қалада көшені шаттыққа толтырып, аталып өтті. Қызылорда қаласындағы мерекелік іс-шара «Сыр-Ана» монументі алаңында болды. Қазақ халқының, басқа да ұлттардың дәстүрлі қолөнер бұйым әшекей жұмыстары, ұлттық тағамдардың көрмесі ашылды. Мамыр мерекесінің сәнін «Гүлдер фестивалі» келтіріп, келген қонақтарға ерекше көңіл-күй сыйлады.
Облыс әкімі Нұрлыбек Нәлібаев аймақ тұрғындарын бейбітшіліктің, келісімнің мерейлі мейрамымен құттықтап сөз сөйледі.
— Ұлы мақсаттарды ұлықтаған, достыққа құшағын айқара ашқан Қазақстан халқы Президентіміз Қасым-Жомарт Кемелұлы Тоқаевқа сенім артып, дамудың жаңа көшін бастады. Мемлекет басшысы Қазақстан халқы Ассамблеясының «Әділетті Қазақстан: бірлік, тұрақтылық, даму» атты ХХХІІ сессиясында: «Халқымыз бірлік пен тыныштықтың қадірін біледі. Бұл – небір қиын-қыстау заманды өткерген, қазақ жерінен пана тапқан барша этностар үшін де қымбат құндылықтар. Осы құндылықтарды бағалай білгеннің арқасында жұртымыз бейбіт өмір сүріп жатыр. Бұл – теңдессіз жетістік»,- деп, елдегі тұрақтылық пен келісімнің негіздерін атады.
Бүгінде елімізде 130-дан астам, облысымызда 35 ұлт пен ұлыс өкілдері тату-тәтті өмір сүруде. Олар Әділетті Қазақстанның қалыптасып, өсіп-өркендеуі, бәсекеге қабілетті болуы жолында аянбай еңбек етуде. Айналамызда болып жатқан жағдайларға зерделей қарасақ, бейбітшілік пен тыныштықтың қадірі арта түсері анық. Сондықтан біз бірлігімізді болаттай берік етіп сақтауымыз қажет,- деді аймақ басшысы.
Сыр еліндегі барлық ұлт өкілдері мерекелік шараның концерттік бағдарламасында өнер көрсетті. Халықтың көңіл-күйі әуезді әннің, әсерлі бидің себебінен көтеріңкі болды. Патриоттық әндер бірлік пен татулыққа шақырып, әннің мағынасы айщықтала түскендей қонақтарға әсер берді.
Қазақ даласын мекен ететін көптеген ұлттың халқымызбен біте қайнасып, бейбіт өмір сүріп жатқаны тату елдің тұрғындарының көрінісі. Қаншама ұлттың қазақ даласынан дәм татып, тіршілік етіп жатқаны да мемлекетіміздің ұтымды ұстанымдағы саясатының арқасында. Жүзден аса ұлтты бірлікке шақырып, бір тудың астына жұмылдыра білген халқымызбен мақтануға толық негіз бар. Мемлекет басшысы да жерімізде мекендеген ұлттардың елімізде тату өмір сүруіне жағдай жасап жүр. Сыр өңіріндегі өзге ұлттар, жергілікті қазақ ұлтымен тату болып, көбі дерлік мемлекеттік тіліміз қазақ тілін игеріп алған. Сыр өңірінде өзге ұлт өкілдері қазақпен бірлесе бірлік мерекесін тойлау арқылы татулықтың жоғары деңгейін көрсеткендей. Жылда тойланатын мерекенің биылғы бағдарламасы да халықтың көңілінен шықты. Бірлік мерекесі кешке орталық паркте жалғасын тапты.
Қазақбай ӘНДЕШ
