Мердігерлерге кімнің сөзі өтеді?..

Күз мезгілінің бірінші айының соңына да жақындадық. Өткен жолы қаладағы бір мектепке баратын жолдың алдына жер қазу жұмыстары жүргізілуіне байланысты оқушылардың жүруіне мүмкіндіктің болмай қалғаны туралы әлеуметтік желіде жазба жарияланып, лезде кем­шіліктер жөнделген болатын. Біздегі әдет сондай, міндетті түрде ескерту айт­қаннан кейін қалпына келеді. Осыған әбден бойымыз үйреніп қалыпты.

Бүгін қоғам белсендісі Болат Нұрхожаев әлеуметтік желі арқылы Қызылорда облысының әкімінің назарына жазба қалдырды. Жазбада: «УАД мекемесі атқарып жатқан Әбдуали Спанов көшесін абаттандыру жұмыстарын аяғына шейін атқарып, қоқысын тазалап, көшенің ойлы-қырлы жерін тегістеп кетуін сұраймыз. Бұндай жұмыстардың аяқсыз қалуының талай куәсі болғандықтан және кейін оны тұрғындар қолмен тазалап тегістеуге мәжбүр болуымыздан хабарлап отырмыз» дейді қоғам белсендісі.

Осылайша ол сегіз пункт бойынша ескертпесін жазған. Біріншіден, шығарған көлік шөп-шалам және бетон қалдықтары қоқысын тегістеп тазаламай кетуі мүмкін, екіншіден, жердің ойдым-қырдым қалуынан кейін бұл жерлердің шөбін техникамен шауып тазалау мүмкін болмайды, оның үстіне арасы қоқыс, бетон қалдықтары, үшіншіден, қоқыс үйілген жер ит жатағы, стихиялық қоқыс орнына айналады, төртіншіден, жиегі топырақпен бекімеген тротуар бордюрлары құлап, ертең шашылып қалады, бесіншіден, «лотоктар тесігін тесіп кете ме» десек, қайта бітеп кету жағдайы болып жатыр, ал ол ондағы судың сасуына әкеледі, алтыншыдан, асфальтпен қаптап тастаған аймақта келешек тал егетін жер де қалмаған, жетіншіден, Бейбарыс көшесі бойындағы талдарды (мәселен, КТЛ алды) суару мүмкіндігі жоқ, ал бұл талдардың қурауы, өлуіне әкеліп соқтырады, сегізіншіден, КРЭК трансформаторы жанындағы екі бірдей жоғары кернеулі кабель балалар жүретін жерде ашық жатыр.

«Қыруар қаржыға жасаған соң бірден, жерін тегістеп бәрін дұрыс­тап жасап кетуге болмай ма? Бұл мердігердің кінәсі ме әлде жоба­лаушылардың кемшілігі ме? Ертең бұл жерлерді топырақпен толтырып тегістеуге тағы да бюджет қаржысын жұмсаймыз ба?» деп, күдігін де жасырмапты.

Жазба жарияланған кейін көпшілік әрқалай пікір қалдырған. Бірі «біздің көшені де солай тастап кеткен, судың бетін тегістеп, көміп кеткен» десе, екіншісі «Сол жағалауда да осы тірлік. Тротуар салған мердігерлік мекемелер жан-жағын қоқысқа толтырып кеткен. Бетон қалдықтарын лотоктерге төгіп, онысы қоқыс боп қатып жатыр» депті. Ал, тиісті мекеме Ә.Спанов көшесінде қайта жаңғырту жұмыстары толық аяқталмағандығын, осыған орай аталған кемшіліктер толық қалпына келтірілгеннен кейін нысан қабылданатынын айтқан.

Н.Меңдібай

Пікір үстеу

Э-пошта мекенжайыңыз жарияланбайды. Міндетті өрістер * таңбаланған