Экологиялық акцияның Сыр өңірінің жасыл қала атануына септігі мол

Адамзатты өздері мекен ететін аумақтың мәселесі алаңдатуы заңды құбылыс. Әр адам туған жері үшін жасайтын жақсылығын арттырса, жақсылыққа жауап та қайтады. «Пайдаң тимесе, зия­ның тимесін» деген ойдың төңірегінде ойланып қарасақ, кез келген адам ешкімге ыңғайсыз жағдай тудыратын іс-әрекет жасамау керектігін түсінеміз. Бірақ, барша адам баласы бір-біріне пайдасын тигізіп жүрсе екен дейміз.

Мемлекетке көрік беретін сұлу ғимараттары, адамдардың шоғырландыратын мәдени ошақтары бар қала екені белгілі. Ауылдан ағылып келген адамдар, білім іздеп қалада тіршілік етіп жатқан студенттердің қала сұлулығына тамсанатынын көреміз. Ұйықтамайтын қаланың сұлулығымен қатар, ажарына сызат түсіретін жағдайлар да кездеседі. Олар әрине табиғатты ластайтын факторлар. Көліктер көп болған сайын ауаға тарайтын зиянды заттардың толастамайтыны, улы газбен тыныстайтын адамдардың көбеюі де жиі кездеседі. Экологиялық жағдайға жататын бұл мәселемен күресу үшін ағаш егіп, табиғаттың ажарын қалпына келтіруге болады. Қала халқы жасыл қалаға айналу үшін жыл сайын тал егіп, табиғатты аялау мақсатында акциялар ұйымдастырып, халықты қала сұлулығына пайда тигізуге үндейді. Жергілікті басшылықтың назары осы мәселеге түсіп, халықпен бір бағытта жұмыс жасайтыны да жұртқа таңсық емес.

Осындай мәселелерге байланысты қаламызда «Тал егу – сауапты іс» облыстық экологиялық акциясы болып өтті. Облыс әкімі Нұрлыбек Нәлібаевтың қатысуымен акцияға орай орталық мешіт аумағында ағаш отырғызылды. Аталған іс-шараға қала тазалығына алаңдатушылық танытып, өңіріміздің таза ауамен тыныстауын қалайтын ардагерлер мен зиялы қауым өкілдері, жергілікті мемлекеттік мекеме және құқық қорғау органдарының басшылары, қаламыздың белсенді жастары да қатысты. Экоакция қатысушылары 500 көшет, ал қаламыздың аумағына 3500 ағаш отырғызды. Алдағы уақытта «Үздік аудан орталығы», «Үздік ауыл» және қала ішіндегі «Үздік мөлтек аудан» номинацияларын Қызылорда облысының тазалық, көркейту, абаттандыру сияқты жұмыстарды белсенді орындаған елді мекендерге табыстайтын болады.

Қаламызда болған бұл экоакцияның тигізер пайдасы мол. Ел жағдайын алаңдататын экологияға барлығымыз мән беруге тиістіміз. Рамазан айында болған акцияның сауапты іс екендігіне ешкім күмән келтіре алмайды. Исламда алдымен адамзатты Аллаға иман келтіруге шақырса, содан кейін иманның аясында игі істер жасауға шақыратын дін екенін барша мұсылман біледі. Экологиялық акцияның мешітте жасалуы бекер еместігі осыдан байқалады. Бұл игі істің тәлімін «Қандай да бір мұсылман ағаш отырғызса немесе егін ексе, ол егістіктен адамдар, жануарлар мен жәндіктер, құстар жесе, ол адам үшін садақа болып есептеледі» деген хадистен де байқауға болады. Экоакция әрі қарай жалғасын тауып, өңір халқы облысымыздың көркеюіне атсалысуы керек. Сырдың сұлулығын жоғары деңгейде ұстап тұру – әрбір қызылордалықтың парызы.

Қазақбай ӘНДЕШ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған