Қызылорда жасыл желекке оранады

қалада тоғыз мыңға жуық тал отырғызылды

Дамыған заманда бір орында ештеңе де тұрмайтыны анық. Бір-бірімен жарысқан жалғанда үздік нәтижеге қол жеткізуге барлығы да талпынады. Адамның көз жанары айналадан тек сұлулықты көруге құмартып тұрады екен. Адамдардың әдемі болып жүруі, жылтыр киімнің жарнамаларының барлығы да көздің көңілінен шығатын іс-әрекеттер. Адам көркі – шүберек, ал табиғаттың көркі – жапырағы жайқалған талдар кез келген жерде ерекше рең береді. Ну орманның әдемілігін үнемі көру бақыты жабайы аңдарға бұйырған бақ. Ал, адамдар осындай сұлулықты көру үшін не істей алады? Барлық адам өзі өмір сүретін аймаққа жеміс ағаштарын, ыстықта көлеңке болатын талдарды егуді әдетке айналдыруы керек. Бізге дейінгілер «келер ұрпаққа» деп еккен ағаштарының жемісін біз жесек, бізден кейінгі ұрпаққа бізден қалатын сый ретінде жеміс ағаштарын көптеп егу сауапты іс болар еді.

Ауыл аймақтарда жайқалып өскен талдар жетерлік. Жасыл желекке бөленген ауыл, өмірге үлкен махаббатпен қарайтын адамдар, аңғал балалардың барлығы да ауылда мекен етеді. Тіршілігі шулы, көліктері түнімен ұйықтамайтын қаланың жағдайы қалай болып жатыр? Қала халқы да өз қаласының әдемілігі үшін түрлі істерді жасаудан тоқтаған емес. Бүгінде «Қызылордада тал жоқ» деп қаламызға қаратып айтылған мысқылдардың жауабын беруге қала басшылығы да, қала халқы да дайын десек болады. Қаламызды жасыл қалаға айналдыру мақсатында түрлі қоғамдық шаруалар атқарылып жүр. Өңір халқын жұмылдырып, қала басшылығымен бірлесе жасалып жүрген істер жемісін беруде. Еліміздің алдыңғы қатардағы қаласы болуы үшін әлі талай істердің атқарылу керектігін қала халқы да, қала басшылығы қызметкерлері де сезеді.

Алашқа қазақылығымен, ті­лі­нің тазалығымен үлгі бола білген Сырдың бас қаласы Қызылорда жыл өткен сайын әдемі келбет алып, құлпырып, тазалығымен де көз сүйсіндіріп келе жатыр. Қаланың осыншалықты көрікке ие болуына үнемі ұйымдастырылатын көгалдандыру жұмысы, тазалық шаралары өз нәтижесін беріп, септігін тигізуде. Жылдағы әдеттен жаңылмай, биыл да көктем шығысымен тазалық акциясының жұмыстары басталып, аталған акцияға он мыңға жуық қала тұрғындары, мекеме қызметкерлері қатысты. Арықтар аршылды, көшелер тазаланып, қаламыз­да тал егу жұмыстары қарқынды жүзеге асты. Қала әкімі Асылбек Шаменов Қызылорда қаласын жасыл желекке айналдыруды мақсат қылып, аталған акцияда өзі бастап тал екті. 3000 түп қара тал, Сыр талы, терек, үйеңкі, туя, ясин сияқты қала климатына төзімді көшеттер тағзым алаңынан бастау алып отырғызылды.

Қызылорда орман және жануарлар дүниесін қорғау жөніндегі мемлекеттік мекемесіне облыс әкімінің берген тапсырмасымен егілген талдарды күтіп-баптау үшін жұмысшылар алынған болатын. Техникалық су ұңғымалары арқылы отырғызылған жасыл желекке су жіберіле бастады. Былтыр­ғы жылы 33 жер асты су ұңғымасы қалада, қалаға қарасты кенттер мен ауылдық округтерде қазылып, іске қосылған еді. Биылғы жылы бұл іс жалғасын тауып, облыстық бюджеттен 337 млн. теңге бөлініп, 14 ұңғыма бұрғылану жұмыстары жасалуда. Тазалық акциясы басталғалы бері тоғыз мыңға жуық тал отырғызылды.

Қаламызда атқарылып жатқан осындай жұмыстар оң нәтиже беретініне қала халқы сеніммен қарайды. Жергілікті тұрғындардың таза ауамен тыныстауы үшін қалалық әкімдіктің ұйымдастырып жатқан акциялары игі бастама. Жылдан жылға қаламызды көркейту үшін әкімнің өзінен бастап шаһардың әсемдігі үшін білек сыбана жұмыстар атқаруға дайын екендігін көрсетті. Туған жердің топырағына бас иіп, қаланың көгалдануына үлес қосу – өңір тұрындарының да міндеті. Болашақта қаламыз жасыл желекпен жайқалып, Қызылордаға келетін туристерді таң қалдырады деп сенеміз.

Қазақбай ӘНДЕШҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған