Қалада жанданған тіршілік бар

Биыл Қызылорда қаласында әлеуметтік және инженерлік инфрақұрылымды жақсартуға Ұлттық қордан, республикалық және облыстық бюджеттерден 54 млрд. теңге бөлініп, бірқатар жоба басталды. Атап айтар болсақ, Неке сарайы, Өнер орталығы, Қан орталығы секілді ірі нысандар Қызылорда қаласында салынып жатыр. «Қазгермұнай» БК» ЖШС заманауи үлгідегі Оқушылар сарайының жобасын қолға алды. Облыс орталығында сәулетті, еңселі нысандар салуға жеке инвесторлар да қомақты үлес қосып отыр. Осының бәрі орындалу үшін алға нақты жоспар құрылып, дұрыс үйлестіруде.

Қызылорда қаласының әкімі Асылбек Шаменов қаланың өркендеуі жолында аянып жатқан жоқ. Қай салада мәселе туындасын, жанынан табылады. Ал, тұрғындардың ұсынысын тыңдап, жылы сөйлесіп, шаруаларын орындауда белсенді. Жыл басынан бері өткізілген жеке қабылдауда 250-ге жуық азаматтың мәселесі сараланғаны көп жайды аңғартады.

Тұрғындарды кезекті қабылдауда Асылбек Өмірбекұлы олардың жеке мәселелері бойынша сұрақтарына жауап берді. Тұрғындар тарапынан қойылған сауалдар жұмысқа орналасу, кәсіп ашу, тұрғын үй кезегі, жер, әлеуметтік көмек алу бағыттары қамтылса, мәселелерге сала басшыларының талқылауымен заң аясында жауаптар берілді. Сауалдардың бірқатары жедел шешімін тауып, сол жерде үміт етіп келгендердің жүзіне қуаныш ұяласа, кейбірі уақыт талабын қажет етеді.

Асылбек Шаменовтың төрағалығымен өткен аппарат мәжілісінде де маңызды үш мәселе қаралды. Алғашқы тақырып – суға түсу маусымына дайындық жұмыстары және қала бойынша төтенше жағдайлардың алдын алу бағытында атқарылып жатқан шаралар туралы. Қалалық төтенше жағдайлар басқармасының бастығы Жасұлан Түйменов қала аумағындағы су айдындарында, әсіресе Сырдария өзенінде азаматтардың түрлі себептермен қайғылы жағдайларға ұшырап, оның ішінде суға түсу маусымында судағы адам қазасының жиі орын алатындығын жеткізді. Мәлімет бойынша, өткен жылы 12 адам суға кеткен, оның 6-уы бала. «Суда адамдардың қаза болуының негізгі себебі – қауіпсіздік ережелерін өрескел бұзуы» дейді басқарма басшысы. Бұл жағдайларға байланысты халық арасында және WhatsApp желісі арқылы күнделікті түсіндірме жұмыстары жүргізіліп отырғанын барлық мектептің оқушылары мен ата-аналары біледі. Қала әкімі Асылбек Шаменов түсіндірме жұмыстарынан бөлек, барлық сала өзен жағалауларына, каналдар бойына күнделікті рейдтік шараларын ұйымдастыруы керектігін айтты. Оған байланысты арнайы кесте бекітуді тапсырды.

Бүгінде қалада әскерге барудан жалтарып жүрген жастар жетерлік. Статистикалық мәліметке сүйенсек, әскерге 7453 азамат шақырылса, оның 189-ы іздеуде екен, яғни олар биылғы көктемгі әскерге барудан жалтарып жүргендер. Қалалық қорғаныс істері жөніндегі басқарма басшысы Бауыржан Асанов бұл бағытта ішкі істер органдары қызметкерлерімен бірлесе жұмыс жасап жатқандығын жеткізді. Шаһар басшысы Асылбек Өмірбекұлы басқарма басшысына нақты шараларды қолға алып, түсіндірме жұмыстарын күшейтуді міндеттеді.

Оқу жылының аяқталды. Енді алдағы каникулда балалар демалысын қалай өткізеді? Осы мәселе бойынша қалалық білім бөлімінің басшысы Ерлан Боданов баяндама жасады.

Бала қауіпсіздігі үшін үйлер мен мейрамханаларда, ойын-сауық орындарында мектеп бітіру кештерін өткізу және бітірушілердің автокөліктермен кортежге шығуына, білім алушылардың табиғат аясына серуендеуіне, өзен-көлдерге, шағын су алаптарына суға түсуіне жол берілмейді. Қазірде ата-аналардың барлығына түсіндірме жүргізілуде.

Алдағы уақыттағы балалар мен жасөспірімдердің жазғы маусымдағы демалысын ұйымдастыру бойынша іс-шаралар жоспары бекітілген. Бірінші кезекте мемлекеттік атаулы әлеуметтік көмек алуға құқығы бар, мемлекеттік атаулы әлеуметтік көмек алмайтын, жан басына шаққандағы табысы ең төменгі күнкөріс деңгейінің шамасынан төмен отбасылардан, жетім балаларға, ата-анасының қамқорлығынсыз қалған, төтенше жағдайлардың салдарынан шұғыл жәрдемді талап ететін отбасылардан шыққан балалар  қамтылады. Балаларды сауықтыру «Дария», «Зерентай» және «Аңсар-Кәусар» ЖК, «Сыр Төресі», Жаңақорған ауданында орналасқан мемлекеттік кәсіпорын «Талды су» тынығу лагерьлері арқылы ұйымдастырылады. Жалпы міндетті оқу қоры есебінен 2500 баланы демалдыру жоспарланып отыр.

Ал, демеушілер мен инвесторлар есебінен аз қамтамасыз етілген отбасынан шыққан 200 бала «Арай-санрайз» лагеріне барады. Сонымен қатар, мектептер жанынан күндізгі тынығу лагерлері ашылып, 2386 оқушы 2 ауысымда жатын орынсыз, ыстық тамақпен қамтылады.

Қала әкімі Асылбек Шаменов сала басшысына балалардың жазғы демалысын ұйымдастыруда жұмыстарды жүйелеп, бақылау шараларын күшейтуді жүктеді.

Н.МЕҢДІБАЙ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған