Оқу-ағарту министрі Ғани Бейсембаев Сыр еліндегі білім саласының даму деңгейін өз көзімен көрді

Білім жолы ұзақ еңбек пен ізденісті талап ететін бағыт екендігі белгілі. Білімді адамның қоғамның бет-бейнесі болып, ықпалды тұлғалардың тізімін толтыра алатын қабілетке ие екендігі тағы бар. Әлем елдерінің дамушы елдер қатарына кіруге талпынысы дұрыс көзқарас. Алайда, «қалай еңселі елдің біріне айналамыз?» деген сұрақ кез-келген мемлекет басшыларын ойландырмай қоймайды. Қаншама қазба байлықты игеру, экономиканы ілгерілету, әлеуметтік саланың әлеуетін көтеру, елдің тыныштығы мен тұрақтылығы, салмақты сыртқы саясат, бәрін бір арнаға тоғыстыру үшін білімді де бәсекеге қабілетті елге айналу – қайбір мемлекеттің түпкі мақсаты. Тоқтаусыз жылдамдықпен жарысып жатқан уақыт белдеуінде бір-бірінің даму ырғағына қызыға да қызғана қарайтын мемлекеттер баршылық. Мемлекет тұтастығы мен болашағы үшін жоғары, бәсекеге қабілетті білімнің қажет екендігі тағы бар. Демек, өз ықпалыңды білдіру үшін де, қорғану үшін де, айналып келгенде, әлем алдында өз мемлекетіңнің мықтылығын дәлелдеу үшін де ең алдымен білімді дамытудың қажеттілігі алға шығады.

Оқу-ағарту министрінің аудандарға сапары

Білім саласы үнемі дамуды, тың өзгерісті қажет етеді. Үнемі бақылау­да ұстап, кем-кетігін жөндеп, тиісті қаржыны бөлу арқылы саланы көтеру – мемлекеттің басты міндеті. Мемлекетіміз білім жолында қаржыны аяған емес. Ауданнан бастап қаржы тайқазаны ең әуелі білім саласын көтеруге арналады. Деңгейі жоғары талапқа сай келуі үшін білім беру жүйесінің де күрделене түсіп, білім беруші педагогтардың қабілетін шыңдау мақсатында түрлі тәжірибе алмасу шараларын жүзеге асыру қолға алынды. Әйтпесе, қазақстандық білім мен ғылымның жаһандық бәсекеге қабілеттілігін арттыру және жалпыадамзаттық құндылықтар негізінде тұлғаны тәрбиелеу және оқытуды мақсат тұтқан ҚР білім беруді және ғылымды дамытудың 2020-2025 жылдарға арналған мемлекеттік бағдарламасы мен сапалы білім алуға қолжетімділікті кеңейтуге мүмкіндік беретін «Білімді ұлт» сапалы білім беру» ұлттық жобасы бекер қабылданған жоқ.

Екінші жағынан, мемлекет тарапынан жасалып отырған қамқорлық пен мүмкіндіктер арқасында білімді ұрпақ ел тізгінін ұстар болса, ел тұтастығын сақтау үшін бар күшін салады деп сенуге болады. Рас, қазіргі таңда мемлекет тарапынан қолдау жұмыстары қарқынды жүзеге асуда. Түрлі мемлекеттік гранттарды білімді жастарға ұсынып, олардың білім алуы үшін жағдай жасаудан билік бәсеңдік танытқан емес. Тереңдетілген білім беру жүйесі арқылы технократ маман шығару үшін де түрлі жұмыстар атқарылып жүр.

Білім беру нысандарын біртіндеп күрделі жөндеуден өткізіп, жаңа нысандарды да көбейту білім саласына деген көрсетіліп жатқан үлкен қолдау. Бүгінгі үйренуші бала – ертеңгі елдің абыройлы қызметкері. Алған білімі қаншалықты сапалы болған сайын елдің дамуы да соншалықты жоғары деңгейде болары сөзсіз. Астанадағы сала министрінен бастап ауылдағы мектеп мұғаліміне дейін оқушының білім деңгейін көтеруде талмай еңбек етсе, еліміз алдыңғы қатарлы дамыған мемлекеттер қатарынан орын алары сөзсіз.

Өткен аптада ҚР Оқу-ағарту министрі Ғани Бейсембаев Қызыл­орда облысына іссапармен келді. Көп жоспарды алға тарта келген министрдің бұл жолғы сапары бірнеше күнге созылды. Әрі тек облыс орталығы емес, бес бірдей ауданды аралады. Сыр еліндегі білім саласының даму деңгейін өз көзімен көрді.

Министр алғашқы қадамын облыстың оңтүстік аудандарынан бастады. Жаңақорған ауданындағы «Талдысу» облыстық олимпиадалар және қосымша білім беру орталығының жұмысымен танысқан министр таудың жағасында білім алып жатқан «Сыр дарыны» академиясының оқушыларымен кездесу өткізді. Білімді өміріне негіз еткен оқушылармен пікірлесті. Негізі 320 орындықтан тұратын орталық 2011 жылы пайдалануға берілген. Он екі жылдан бері жайлы демалыс орнына айналған орталық оқушылардың білім деңгейін арттырып, әсіресе, мектеп бітірушілер үшін ұлттық тесттен жоғары балл алуына көмегін тигізіп келеді.

Одан кейін министр жұмыс жоспарына сәйкес, М.Көкенов атындағы мәдениет үйінде білім саласындағы сыбайлас жемқорлықтың алдын алу бойынша мәжіліс өткізді. Мәжіліске Қызылорда қаласы мен барлық аудандардың әкiмдерi және білім беру ұйымдарының басшылары онлайн форматта қатысты. Басқосуда білім саласындағы сыбайлас жемқорлықтың алдын алу және тәуекелдерін болдырмау туралы екі мәселе қаралып, талқыланды.

Қай саланың болсын, дамуына кедергі келтіретін фактордың бірі әрі бастысы – коррупцияның белең алуы, парақорлықтың үстемдік құруы, жемқорлардың сапалы жұмыс жасауға кедергі келтіруі. Жемқор адамның мемлекеттің саясатын ысырып қойып, өз құлқын, жеке мүддесін ғана ойлайтыны айтпаса да түсінікті. Пара алушы да, беруші де сыбайлас жемқорлықты дамытушылар. Халықтың игілігі үшін бөлінетін қаражатты қалтаға басып, мемлекет қаржысын талан-таржыға салу қай салада да орын алу өкінішті, әрине. Оқу-ағарту министрінің осы жолғы сапарында қоғамның жегі құртына айналған дертті қозғап, тақырыпқа өзекті етіп, мәжіліс жасауы көңілге сенім ұялатады.

Күн тәртібіндегі мәселелер бойынша облыстық білім басқармасының басшысы Мейрамбек Шермағанбет, Сыбайлас жемқорлыққа қарсы іс-қимыл агенттігі облыс бойынша департаменті басшысының бірінші орынбасары Асылхан Ашиков, Оқу-ағарту министрлігі білім саласындағы сапаны қамтамасыз ету комитетінің төрағасы Ернұр Дәуенов бейнебайланыс арқылы хабарлама жасады.

Министр Ғани Бейсембаев жиын­да талқыланған мәселелер туралы өз пікірін білдіре келе Қызыл­орда өңірінде атқарылып жатқан істерге оң бағасын берді. Және де қуантарлық жағдай, Ғани Бектайұлы министрлік тарапынан білім алушылардың білім сапасы бойынша мониторинг жүргізілгенін, мониторинг қорытындысымен Қызылорда облысы респуб­ликада бірінші орынға шыққанын атап өтті.

Министр білім ордасына баруды да ұмытқан жоқ. Жаңақорған кентіндегі №110 мектеп-лицейіне барып, мектеп ұжымына жаңа автобустың кілтін табыстады. Оқушылардың мектеп пен үйлерінің арасында еркін қатынап, қауіпсіз жүруі үшін жаңа авто­бустардың пайдасы көп. 20 және 40 орынға шақталған автобус барлық талаптарға сәйкес келеді. Оқушыларға арналған жаңа автобустарда қауіпсіздік белдіктері, апатты жағдай болғанда шығу жолы, жылдамдық шектегіштер, сәйкестендіру белгілері бар және бала автобуста қалған жағдайда белгі беретін жүйемен жабдықталған. Негізі, Қызылорда облысы әкімінің қолдауымен Сыр өңірі ауыл аймақтарындағы білім ордаларына, атап айтсақ, мектепке қауіпсіз тасымалдау үшін өңірдегі 7 аудан мен мектебі жоқ 21 елді мекенге, барлығы 30 жаңа автобус табыстауды жоспарға алған болатын. Алғашқы автобустарға жаңақорғандық оқушылар ие болды.

Оқу-ағарту министрі Ғани Бейсембаев пен облыс әкімі Нұрлыбек Нәлібаевтың сапары Шиелі ауданында жалғасты. Ұстаздармен арнайы кездесу өткізіп, атқарып жатқан жұмыстарымен танысты. Ғани Бейсембаев Шиелі ауданындағы Ы.Алтынсарин атындағы №219 орта мектепке барып, ғимарат ішін толық аралап шықты. Асханасы мен спорт зал ішіндегі спорт үйірмелердің жетістіктерінен хабардар болды. Кітапхана, мектеп музейі мен акт залын аралап көрді.

Министр Жаңақорған мен Шиелі аудандарында болғанда педагог-шебер, педагог-зерттеуші ұстаздарымен кездесу өткізіп, білім саласындағы өзекті мәселелер талқылады.

Министрдің сапары Қазалыда жалғасты. Р.Бағланова атындағы мәдениет орталығында ведомство басшысы мен облыс әкімі Нұрлыбек Нәлібаев құқық қорғау органдары қызметкерлері, зиялы қауым өкілдері, ата-аналармен кездесу өткізді. «Бала тәрбиесі – баршамызға ортақ міндет» атты кәмелетке толмағандар арасындағы құқықбұзушылықтың алдын алу мәселесі бойынша бірлескен кеңес отырысы болды. Қызылорда облыстық полиция департаменті бастығының міндетін атқарушы Шамшидин Амитов, облыстық білім басқармасының басшысы Мейрамбек Шермағамбет және аудан әкімі Мұхтар Оразбаев баяндама жасаса, ата-аналар мен ұстаздар өз ойларын ортаға салды, ұсыныстарын жеткізді.

Қазіргі таңда мектеп жасындағы жеткіншектердің агрессияға бейім келетінін қоғамда кездесетін шулы жаңалықтардан көріп, байқап жүрміз. Өтпелі кезеңде ашудың тұтқыны болып, болашағын бүлдіріп алуға бейім жастармен қосымша жұмыстар жасалу қажеттігі жиі қозғалады. Мектепте яки қоғамдық орындарда тәртіпсіздікке бой алдырып, бейәдеп сөздерге құмар болып, білектің күшін көшеде көрсетіп жүрген жасөспірімдермен атқаратын шаруа шаш етектен. Ата-аналар мен ұстаздар бірлесе жұмыс жасап, тәртіпті бала санасында қалыптастыру керек-ақ. Идеологиялық саясат та баланың патриоттық тәрбие алуға бағытталуы тиіс.

Кеңесте тәртіпсіздік мәселесін сөз етіп, облыс әкімі балалардың құқықбұзушылығын қатаң қадағалап, атқарылуы керек іс-шараларды атап өтті.

– Қызылорда қаласы мен аудан әкімдері, облыстық білім бас­қар­масының және облыстық полиция департаментінің басшылығы оқу орындары басшыларымен бірлесе отырып, балаларға қатысты зорлық-зомбылықты, олардың өзара қарым-қатынасындағы келеңсіздікті болдырмауға бағытталған жедел жұмыстарды күшейтуі тиіс. Ол үшін оқушылардың бос уақыты дұрыс әрі пайдалы етіп ұйымдастырылуы керек. Жастар орталықтарымен бірлесіп, құқықбұзушылыққа бейім оқушыларды қоғамдық шараларға, мектеп жанындағы спорт, музыка, өнер үйірмелеріне кеңінен тарту жемісін береді. Сот, прокуратура және полиция өкілдерін шақыртып, жауапкершілік, жасөспірімдер жасаған қылмыстар мен тәртіп бұзушылықтардың салдары туралы оқу сағаттарын ұйымдастырсын. Балалар құқықбұзушылыққа бармауы үшін белсенді азаматтар, ардагерлер, ата-аналар комитеті, білім саласына жанашыр депутаттар ортақ іске азаматтық тұрғыда үн қосуы тиіс,– деді облыс әкімі Н.Нәлібаев.

«Батыл қадамды тек ересектер жасайды» десеңіз қателескеніңіз. Жүректі жастың да жанартаудай атқылап, қорқынышпен бетпе-бет келсе де, қайтпайтын қасиеті бар балалар жүр арамызда. Қазақ баласының рухы өр, қайсар болатынын, қайсарлығы жас талғамайтынын дәлелдейтін оқиға болды. Жуырда Ғ.Мұратбаев атындағы №17 орта мектебінің 4 сынып оқушысы Жансерік Әлім өртенген үйден бесіктегі сәби мен 2 баланы аман алып шыққан еді. Бұл жасалған іс ескерусіз қалмады. Отырыста ҚР Оқу-ағарту минис­трі Ғани Бейсембаев кішкентай балаларды өрттен құтқарып, бала батыр атанған Жансерік Әлімді, ата-анасын, сынып жеткшісін қабылдап, Алғыс хатпен марапаттады.

Өсіп келе жатқан өскелең ұрпақтың тәрбиесінің маңызды­лығын атап өтіп, ведомство басшысы әр түрлі салада үздік нәтижеге қол жеткізген жастар мен ата-аналарға айрықша құрмет көрсетілетінін айтты.

– Алдағы уақытта түрлі салада үздік нәтижеге қол жеткізіп, ел мақтанышына айналған жастарды «Ел үміті» медалімен марапаттаймыз. Оларды тәрбиелеген ата-анасы да «Мейірім» медалімен марапат­талады, сынып жетекшілеріне де құрмет көрсетіліп, арнайы марапаттар табысталмақ,– деді министр.

Министр Қазалыда да ұстаздар мен оқушыларды назарынан тыс қалдырған жоқ. Е.Бозғұлов атындағы №249 мектепте мектеп оқушылары және колледж студенттерімен кездесті. Ашық пікір алысты. Ал, заманауи автобустардың кілтін табыстау Қазалы ауданында да жалғасын тапты. Су жаңа көлік екі мектепке: Жанқожа батыр атындағы №70 мектептің интернатында жатып, білім алатын және Ж.Жабаев атындағы №234 мектептің инклюзив сыныбында оқитын балаларды күнделікті сабаққа тасымалдау үшін берілді.

Министрдің сапары Қармақшы ауданда жалғасын тапты. Қармақшы ауданы бойынша білім бөліміне қарасты №277 мектеп-лицейінде ұстаздармен кездесу өтті. Кездесуге ҚР Президентінің «Байқоңыр» кешеніндегі арнаулы өкілі Қ.Нұртай, Қызылорда облысының білім басқармасының басшысы М.Шермағанбет. Қызылорда облысының білім саласында сапаны қамтамасыз ету департаментінің басшысы Ғ.Дәулетова, Қармақшы ауданы бойынша білім бөлімінің басшысы Г.Абдазиева, сонымен қатар білім саласында қызмет етіп жүрген білім бөлімінің мамандары, қала мектептерінің басшылары қатысты. Ведомство басшысы Байқоңыр қаласындағы білім беру ұйымдарының жұмысымен танысып, ұстаздармен кездесіп, мәжіліс өткізді. Мәжілісте бітіруші түлектерге грант бөлу мәселесін шешуді, Байқоңыр қаласына арнайы бағдарлама жасауды тапсырды. Ұстаздарға шабыт беріп, жауапкершіліктің ауырлығын ұқтыра білген Ғани Бектайұлына ұстаздар алғыс білдірді. Өздері қолдан жасаған зымырандарды ұшырып көрсеткен №277 мектеп лицейінің «Зымыран модельдеу» үйірмесінің мүшелеріне министр сәттілік тіледі.

Облыс әкімі мен ведомство басшысы Жалағаш ауданындағы сапары Таң ауылында жалғасты. Жұмыс сапары барысында №118 орта мектеп жұмысымен танысып, оқушылар тасымалына арналған автобус табыстады. Ендігі кезекте Таң ауылы, Жаңақоныс елді мекенінің оқушылары мектепке заманауи жаңа көлікпен қатынайтын болады.

Жалағаш ауданында 2022 жылы Жалағаш кентінен 200 орын­дық оқушылар үйі мен 50 орындық өнер мектебі салынды. Ал, биыл «Жайлы мектеп» ұлттық жобасы аясында Жалағаш кенті орталығынан 300 орындық жаңа мектеп құрылысын салу жоспарлануда. Бұл бағытта 1,3 га жер телімі бекітіліп берілген.

Кездесу барысында ауылдың білімді балаларына арналған білім олимпиадаларын ұйымдастыру қолға алынып жатқанын, мектеп асха­насының мәзіріне ұлттық тағамдар кірістірілетінін, бұл білім ұясы мен балабақшадағы бүлдіршіндердің денсаулық жағдайын жақсартатынын жеткізді. Жұмыс сапарын қорытындылай келе министр Ғани Бектайұлы ауданның даму жолындағы жобаларға сәттілік тілеп, ел болашағын тәрбиелеуші бүгінгі мұғалімдер екенін баса айтты.

Білім беру жөніндегі өңірлік жол картасы

Білім беру мекемелерінің жұмыстарымен жіті танысып, саланың өзекті мәселелерін саралаған министр Ғани Бейсембаев пен облыс әкімі Нұрлыбек Нәлібаев 2023-2029 жылдарға арналған Қызылорда облысының білім беру жүйесін дамытудың өңірлік Жол картасына қол қойды. Ғани Бектайұлының сапары білім саласының дамуына ықпал ететініне, министрліктің қолдауы маңызды мәселелерді шешетініне аймақ басшысы сенім білдірді.

– Соңғы жылдары Мемлекет басшысы Қасым-Жомарт Кемелұлының бастамасымен елі­міз­дің білім саласында ауқымды реформалар жүзеге асырылды. Білім сапасын арттыруда, педагогтарды әлеуметтік қолдауда тың бас­тамалар қолға алынды. Бұл саланың сапа тұрғысынан өркендеуіне жасалған ерекше қамқорлық деп білеміз. Білім – күнделікті жүйелі жұмысты талап ететін күрделі әрі ауқымды сала. Оның маңызды құрамы – қаражат мәселесі.

Істің соңы адал қызметкерлерге және қаржыға келіп тірелетіні бар. Бөлінген қаржы дұрыс игеріліп, балалардың болашағы үшін жасалатын істі адалынан соңына дейін жеткізсе, еліміздің дамуы да қарқынды болар еді.

Биыл білім саласына бөлінген қаржы 262 млрд. теңгеге жетіп, облыс бюджетінің 44,2%-ын құрады. Бұл көрсеткіш былтырғы жылмен салыстырғанда 17%-ға артқан. Тиісінше, біз алдағы жылдары салаға бағытталған қаржы көлемін арттыра береміз. Білімге жұмсалған қаржы – болашаққа салынған инвестиция. Балаларымыздың болашағы бәрінен де маңызды, ол үшін барлық қажетті шараларды қабылдау – біздің бас­ты міндетіміз,- деді облыс әкімі.

Адам қай нәрсеге қаржы құйса, соңында сол бағыттағы дүние­нің жемісін жейді. Қаржының көмегімен білім саласындағы түрлі мәселені шеше аламыз. Сыр өңірінде балалардың болашағы үшін білім саласына құятын қаржының дұрыс игеріліп жатқанын жұмыс нәтижесінен байқаймыз. Білім беру нысандарының талапқа сай болуы үшін күрделі жөндеу жұмыстарына қаржы бөлу құптарлық іс. Себебі, білім алушы жеткіншектің қауіпсіздігін міндетті түрде ойлауымыз керек.

Өңірлік Жол картасы білім беру процесінің 8 бағыты бойынша жасақталған 107 іс-шараны қамтиды. Бұл құжат бойынша алдағы 7 жылда жергілікті, республикалық және инвесторлар қаржысы есебінен проблемалық мәселелер өз шешімін таппақ. Атап айтқанда, мектепке дейінгі білім беретін 12 ұйымға күрделі, 160 нысанға ағымдағы жөндеу жүргізіледі. Жоғары оқу орындары базасында мектепке дейінгі білім беру ұйымдары педагогтарын қайта даярлау, біліктілігін арттыру қолға алынады. 80 балабақша компьютерлік техника мен интерактивті панельдермен, 40 балабақша ойын алаңдарымен жарақталып, шағын сәулет нысандары жаңартылады. Үш ауысыммен білім беру, орын тапшылығы мәселелері шешіліп, «Жайлы мектеп» ұлттық жобасы шеңберінде 15100 орындық 21 мектеп құрылысы жүргізіледі. Сонымен бірге, «Білім беру инфра­құрылымын дамыту» қоры есебінен жаңадан 10 мектеп салынады.

Үкімет басшысының Сыр еліне сапары кезінде 300 орындық жатақханасы бар 400 орынға лайықталған физика-математика бағытындағы мектеп-интер­нат салу жобасы қолдау тауып, құрылысы басталуда. Білім ошақ­тарына 447 робототехника, химия, биология физика, математика, STEAM пәндік кабинеттері сатып алынып, әдістемелік көмек көрсету үшін «Назарбаев зияткерлік мектептері» АҚ-мен бірлесіп «Жетекші мектептер» жобасы іске асырылады.

Қызылорда қаласында ерекше мүмкіндіктері бар балалар үшін 1 психологиялық-медициналық-педагогикалық консультация, 14 инклюзивті білім беру кабинеті ашылады. Ең бастысы, 2023 жылдан бастап бастауыш сынып оқушыларын түгелдей тегін ыстық тамақпен қамтамасыз ету өз шешімін таппақ. Бұл жұмыстар алдағы жылдары да жалғасады.

ҚР Оқу-ағарту министрі Ғани Бейсембаевтың Сыр өңіріне бағытталған жұмыс сапары облыс орталығында қортындыланды. Облыс әкімі Нұрлыбек Машбекұлымен бірге Қызылорда қаласындағы бірқатар білім беру ұйымдарының жұмыстарымен танысып, оқушыларды тасымалдайтын 19 автобус­ты табыстады.

280 орындықтан тұратын «Бегім ана» балабақшасына министр бірінші кезекте барып танысты. Бұл балабақшада 76 қызметкер, оның ішінде 36 педагог жұмыс жасайды. «Мобилді кітапхана», «STEAM» дамытушы орталығы, «KIDS City» балалар ойын қалашығы, «Ұлттық ойындар алаңы» дамытушылар орталығы бүл­діршіндердің жан-жақты дамуына арналған. Кабинеттерді ара­лаған ведомство басшысы, бір топта күні бойы екі тәрбиеші болатын «Айгөлек» пилоттық жобасымен танысты.

Әрі қарай Ғани Бейсембаев Б.Момынбаев атындағы №278 IT мектеп-лицейіне барды. Мектепте оқу­шылар білім алғаннан бөлек, «Hitech» шеберханасы» сандық бағ­дар­ла­масымен басқарылатын термо­престе, төсбелгі дайындайтын біл­декте, 3D станоктарда түрлі опе­ра­ция жасайды. Осылайша өзін за­­ман талабына сай дамыта алады.

Оқушылардың игілігіне берілген автобустарды табыстау рәсімі мектеп ауласында өткізілді. Ардагерлер және білім саласының қызметкерлері салтанатты іс-шараға қатысты. Өңір басшысы жаңа көлікті иеленген мектеп ұжымын құттықтап, тілек білдірді.

– Мемлекет басшысы Қасым-Жомарт Кемелұлының «Орта білімнің сапасы – табысты ұлт болудың маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс» деген тапсырмасы саланы дамыту бағытына батыл қадам қосты. Президент қолдауымен соңғы жылдары еліміздің білім саласында ауқымды реформалар бастау алды. Педагог мәртебесін көтеруде көп жұмыс атқарылды. Оның ішінде, Сыр өңірінің білім саласында ауқымды жобалар жүзеге асуда.

Біз адами капиталды дамыту және білім саласын жетілдіру мемлекеттің негізгі міндеттерінің бірі екенін әрдайым айтып жүрміз. Бүгін, міне, көптен күткен ақжолтай жаңалық – Президенттің балаларды тасымалдауды ұйымдастыру тапсырмасына сәйкес, облысқа бөлінген жаңа үлгідегі автобус­тарды тапсырудамыз. Көп жылдан бері өзекті болған тасымал мәселесі Мемлекет басшысының, Үкіметтің пәрменімен оң шешімін тапты. Бұл – көптен күткен қуаныш,- деді облыс әкімі.

Оқушыларды мектепке қауіпсіз тасымалдау өзекті тақырып еді. Осы себепті де мектептерді автобустармен қамтамасыз ету Жол картасы жасалды. Жол картасының нәтижесінде алынған, барлық талаптарға сай 30 жаңа автобустың кілтін табыстау осылайша Қызылорда қаласында қорытындыланды.

Министр сапарының соңында Т.Есетов атындағы №264 мек­теп-лицейінің обсерватория, киностудия, BIOMASTER, BIOFLOWERS, STEM лаборатория каби­неттерін аралап көрді. «Ғылыми идеялар аллеясы» жұмысымен де танысты. Білім ордасының жетістігін өз көзімен көрді. Білім беру ұйымдарындағы барлық басшыларымен кездесіп, өзекті мәселелерді талқыға түсті. Ашық пікір, ұтқыр ұсыныстар айтылды.

ҚР Оқу-ағарту министрінің Сыр еліне сапары нәтижелі қорытындыланды. Қызылорда облысындағы аудандардың білім саласындағы жұмыстарымен танысып, ұстаздармен кері байланыс орнатып, алдағы жоспарларынан толықтай хабардар болды. Алдағы уақытта да Сыр өңірінің білім саласының деңгейі өсіп, балалардың білім ошақтары түгел талапқа сай болатынына сеніммен қараймыз. Білімді ұрпақ – ел болашағының жарқын болуына әсер ететін негізгі күш. Балалардың өз үйлерінен еш кедергісіз мектепке келуі үшін мектептерге берілген жаңа автобустар – оқушылар қауіпсіздігінің кепілі. Мемлекет тарапынан көрсетілетін көмектер тоқтап қалмақ емес. Білім саласына көрсетілетін көмектің бұл басы ғана. Оқушылардың білікті маман болып қалыптасып, өмірге нық қадам аттауы жолында мектептен бастап қолдау көрсету маңызды. Қазақстан мемлекеті алпауыт елге айналуы үшін білім деңгейін көтеруге талпынып, түрлі нәтижелі істер атқару жалғасады деп үміттенеміз. Сыр өңірінің білімге құй­ған капиталының нәтижесін болашақта көретінімізге сенім мол.

Қ.ӘНДЕШҰЛЫ,

Е.АСАНҰЛЫ,

А.ӘДІЛЖАНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған