Біз өз болашағымызға жауаптымыз
Қазіргі қоғамда есірткі мәселесі мені ерекше алаңдатады. Себебі есірткі – бір адамның ғана емес, тұтас ұрпақтың болашағына қауіп төндіретін үлкен дерт. Әсіресе, өмірге енді қадам басып, арманы мен мақсаты қалыптасып келе жатқан жастардың осы жолға түсуі өте өкінішті.
Мен студент ретінде бұл мәселеге бейжай қарай алмаймын. Өйткені біз – еліміздің ертеңін қалыптастыратын жас буынбыз. Менің ойымша, әрбір жас өз өмірінің қадірін түсініп, саналы таңдау жасай білуі керек. Қандай қиындық кездессе де, оны есірткі арқылы ұмыту мәселенің шешімі емес. Керісінше, адам өзіне сеніп, алға қойған мақсатына жетуге ұмтылуы қажет. Өзім білім алатын М.Мәметова атындағы Қызылорда педагогикалық жоғары колледжінде бұл тақырыпта үнемі сала мамандарымен кездесулер ұйымдастырылып, кәсіби кеңес алып отырамыз.
Өз басым, жастардың бос уақытын тиімді өткізіп, спортпен айналысуын, білім алуын және қоғамдық жұмыстарға белсенді қатысуын қолдаймын. Сонымен қатар студенттер бір-біріне қолдау көрсетіп, зиянды әдеттердің алдын алуға атсалысуы тиіс. Себебі кейде бір ауыз ақыл мен шынайы қолдаудың өзі адам өмірін өзгертуі мүмкін.
Мен есірткісіз қоғам құру тек ұранмен жүзеге аспайтынына сенімдімін. Ол әр адамның саналы әрекетінен басталады. Біз өз болашағымызға жауаптымыз. Менің таңдауым – салауатты өмір, жарқын болашақ және есірткісіз қоғам.
А.Аманбаева,
М.Мәметова атындағы Қызылорда педагогикалық жоғары колледжі,
«Өнер» бөлімінің 2-курс студенті
