Ұстаз – ұлттың шамшырағы, болашаққа жол сілтер темірқазығы. Осындай ұлағатты ұғымды өз өмірімен дәлелдеп өткен абзал жанның бірі – география пәнінің мұғалімі, ардақты ұстаз Айтжан Ізмағанбетұлы Шоқпаров.
Өмір жолы терең тарихпен сабақтас Айтжан Ізмағанбетұлы 1934 жылдың қытымыр қысы – қаңтар айында дүниеге келіп, ауылдың қуанышына айналды. Бала кезінен зерек, алғыр болып өскен ол ерте жастан білімге құштарлығын танытып, ұстаздық жолды саналы түрде таңдады. Уақыттың талабына сай білім алып, Ақтөбе қаласында мұғалім мамандығын меңгеріп, елге қызмет етуге бел буды.
Айтжан ұстаздың еңбек жолы – адалдық пен табандылықтың айқын үлгісі. Ол ондаған жыл бойы география пәнінен сабақ беріп, талай шәкірттің жүрегіне білім нәрін септі. Әр сабағында тек пәндік біліммен шектелмей, оқушыларды отансүйгіштікке, адамгершілікке, еңбекқорлыққа тәрбиелей білді. Ұстаздың қарапайымдылығы мен талапшылдығы шәкірттерінің өмірлік бағытын айқындауға зор ықпал етті.
Ұстаз еңбегінің шынайы бағасы – оның шәкірттері. Бүгінде Айтжан ұстаздан тәлім алған түлектер елдің әр саласында еңбек етіп, қоғамның дамуына өз үлестерін қосуда. Шәкірттерінің үнемі іздеп келуі, жылы лебіздері мен алғысы – ұстаз үшін ең үлкен марапат.
Зейнет жасына жетсе де, Айтжан ұстаздың ел алдындағы абыройы мен беделі кеміген емес. Ол – саналы ғұмырын білім мен тәрбиеге арнаған, артында өшпес із қалдырған дара тұлға.
Біздің мектебіміз үшін Айтжан Шоқпаров – үлкен мақтаныш, жас мұғалімдерге үлгі, оқушыларға өнеге. Осындай ұстаздардың еңбегін дәріптеу – әрбір білім ордасының қасиетті міндеті.
Айтжан ұстаздың зейнет жасына жетіп, артына мол мұра қалдырғаны туралы сахналық қойылым ерекше тебіреніспен жетеледі. Ол – сан шәкірттің жүрегінде қалған дара тұлға, өнегелі өмірдің үлгісі.
№283 орта мектебі ұжымы ардагер Айтжан ұстазға деген құрметтің, ризашылықтың көркем көрінісін ауызбіршілікпен, үлкен жауапкершілікпен ұйымдастыра білді. Мектеп директоры Гүлнар Рахатқызының еңбегі зор. Айтжан ұстаздың өмір жолы туралы орыс тілі мен әдебиеті пәні мұғалімі Ерболат Нағашыбаев толғау ретінде қалам тартқан болатын. Жас ақынның туындысы сахналық қойылым арқылы көпшілік көңілінен шықты. “Жақсы ұстаз – елдің байлығы” деген ойды терең жеткізе білді. Мұндай шығармалар жас ұрпақты қадір-қасиетке, ұлағатты ұстазды сыйлауға тәрбиелейді. Мектебімізге берілген А.Шоқпаров атындағы география кабинетінде білім алған шәкірттердің талай білім шыңын бағындыра алатынына сеніміміз мол.
Г.Ерімбетова,
№283 орта мектебінің директоры.
Арал ауданы
