Оқушыны жеке тұлға етіп тәрбиелеу – үлкен жауапкершілік

Еліміз егемендікті еншілеген сәттен бастап білім саласына ерекше көңіл бөлінуде. Мемлекет басшысы Қасым-Жомарт Кемелұлы Тоқаев Қазақстан халқына арнаған «Жаңа Қазақстан: жаңару мен жаңғыру жолы» атты Жолдауында ел дамуында негізгі бағдар болатын бірнеше саяси реформаға кеңінен тоқталды. Соның ішінде, ұлттың жаңа болмысы мен сапасын айқындайтын ең басты қағидат ретінде терең білім тұжырымын ұсынды. Сонымен қатар еліміздің алдында тұрған басты міндеттің бірі – сауатты һәм саналы, білімді, ақыл-парасаты мол және ғылыми-мәдени өрісі кең ұрпақ тәрбиелеу екендігін де ерекше атап өтті. Расында, білім барлық уақытта жоғары құндылықтардың бірі болған. «Ұрпағы білімді халықтың болашағы бұлыңғыр болмайды» демекші, жаңа әлемдегі жаңа Қазақстанды озық біліммен қаруланған, бәсекеге қабілетті жастар, білікті мамандар ғана құра алары сөзсіз.

Ұлт ұстазы Ыбырай Алтынсарин: «Маған жақсы мұғалім бәрінен де қымбат, өйткені мұғалім – мектептің жүрегі» деген. Мұғалім мектептің жүрегі ғана емес, ұлт болашағының ең үлкен тірегі. Қазірде ұстаздар қауымына мемлекет тарапынан ерекше көңіл бөлініп жатыр. Өйткені, әрбір мемлекеттің өсіп-өркендеуінің, бәсекеге қабілетті болуының ең басты ошағы – ұстаз берген білімде. Осы орайда мұғалім беделін көтеру мақсатында қабылданған «Педагог мәртебесі туралы» заң мұғалімдерге тың серпіліс әкелді. Неге десеңіз, заң ұстаздардың жеке дамуына және жалпы оқу үдерісін жетілдіруге мүмкіндік беруде. Мәселен, ғылыми педагогикалық бағыттағы магистр дәрежесі үшін мектеп мұғалімдеріне үстемеақы төленуде. Екіншіден, халықаралық олимпиада, түрлі байқау және спорт жарыстарының жеңімпазын әзірлеген мұғалімге де үлкен қолдау көрсетіліп, бір реттік сыйақы берілуде. Сонымен қатар, ұстаздарға педагогикалық шеберлігі үшін лауазымды жалақыдан 30-50 пайыз аралығында қосымша қаржы төленуде. Ұстаздар жалақысының көтерілуі мұғалімдердің әлеуметтік жағдайының жақсаруына септігін тигізіп, жұмыс істеу белсенділігін арттыруға да ықпал ететіні анық.

Баланы заман талабына сай жеке тұлға етіп тәрбиелеу, білім беру – бастауыш сынып мұғаліміне жүктелетін негізгі жауапкершіліктің бірі. Жаңа оқу жылындағы ең өзекті жаңалықтардың бірі, орыс тілі пәні 2-сыныптан, ал шет тілі пәні 3-сыныптан бастап оқытылады. 1-сынып оқушысы тек қазақ тілін меңгереді. Иә, мектептегі ана тілі – барлық білімнің негізі.

Жасыратыны жоқ, соңғы жылдары жиі көтеріліп, қайта-қайта айтылып жүрген өзекті проблеманың бірі – мектеп оқулықтарының сапасы мен олардың сауатты жазылуы. Оқулық түзелмесе, білім сапасының артпайтыны да белгілі. Атақты француз педагогы А.Шоппе: «Оқулық – ұлтты қалыптастырушы феномен» деп атап көрсеткендей, оқулық білім саласында жетістікке жетудегі әрі ел болашағы үшін жауапты қызмет атқаратын бірден-бір құрал. Асылында, ертеңгі күннің бүгінгі күннен асып түсуіне ықпал етіп, адамзат қоғамын алға қарай жетелеуші құдіретті күш тек білімге ғана тіреледі.

«Мұғалім әрдайым ізденісте болса ғана, шәкірт жанына нұр құя алады» деп ұлт ұстазы А.Байтұрсынұлы айтқандай, мен де арнайы іріктеуден өтіп, республикалық «Арман-ПВ» баспасының ұжымымен, соның ішінде, филология ғылымдарының докторы Руда Зайкенова бастаған ғалымдарымен бірге жыл бойы жұмыс жасап, негізгі орта және жалпы білім беретін мектептің 8-10-сыныптарына арналған «Абайтану» оқулығы авторларының бірі болдым. Жаңа оқу жылында ұсынылып отырған «Абайтану» оқулығының ерекшелігі ұялы байланыс құрылғысына тегін «сканер QR» қосымшасын жүктеп алып, сол арқылы «Абайтану» оқулығының қосымшасын және барлық ақпаратты көре аласыз. Сонымен қатар барлық тапсырмалар ойлау деңгейінің дағдыларына негізделіп, функционалдық сауаттылықты қалыптастыруға бағытталған. Бұл мен үшін жаңа оқу жылындағы тағы бір жағымды жаңалықтың бірі болды. Ең қуантарлығы, қазіргі таңда Оқу-ағарту министрлігі ұсынған оқулықтар мектептерге жіберілуде. Бұл қуанышты хабар жаңа оқу жылын жаңа серпінмен бастап, жаңа белестерді бағындыруыма жігер берері сөзсіз.

Сөзімді түйіндей келе, білікті ұстаздан білімді шәкірт тәрбиеленіп шығатынына күмән жоқ. «Тегінде, адам баласы адам баласынан ақыл, ғылым, ар, мінез деген нәрселермен озбақ. Онан басқа нәрсеменен оздым ғой демектің бәрі де – ақымақтық» демекші, болашақта білімі мен білігі үйлескен мамандардың бәсі басым болмақ. Жаңа оқу жылында сапалы білім, саналы ұрпақ тәрбиелеу жолындағы жұмыстарыңызға сәттілік тілеймін.

Салтанат ОРЫНТАЙҚЫЗЫ,

Т.Жүргенов атындағы №123 мектеп-лицейінің мұғалімі,

гуманитарлық ғылымдар магистрі

Пікір үстеу

Э-пошта мекенжайыңыз жарияланбайды. Міндетті өрістер * таңбаланған