Сыр спортының үздіктері марапатталған мерейлі күн

Қуатты арттыратын артық күш – спортта. Адамның өзін қорғауға қауқарлы етіп, денсаулыққа да тигізер жәрдемі шексіз. Сайып келгенде, тізбелесең зардабынан гөрі пайдасы мол спорттың адам өмірінде алар орны ерекше. Бүгінде, спортпен айналыспайтын адам кемде-кем. Таңғы жүгіруден бастап, жаттығуларды да белсенділікпен жасап, өзіне күтіммен қарауда кідіріп қалмайтындардың төгер тері де көп. Еңбектенуде есені жібермей, нәтижеге қол жеткізгендер тұрақты спорт түріне ден қойып, үздіксіз жаттығудан кейін жеңіске жететіні даусыз. Асылында, тұғырынан таймаған, жеңіс жолын жалғастырушы жастар елімізде спорт саласының өркен жайып, дамуына үлесін қосуда. Сондықтан, жасалған қарышты қадамдар ілгерілеудің іргесін қалап, дамудың даңғыл жолына тусуге негіз болуда. Иә, тамыздың үшінші жексенбісі – Қазақстан Республикасының спорт күні боп бекітілгені баршаға мәлім. Осы тұста, аталған мерекеде спорт саласын жандандырып һәм жетістіктерді ынталандыруға жұмыстар жүргізіліп, түрлі шаралар ұйымдастырылады. Мерейлі мереке облысымызда да атап өтіліп, Сыр спорты жұртшылығы «Мұз айдыны» спорт кешенінің алдында арнайы шара өткізді.

Иә, ауқымды жиында жас буынға жөн сілтуде және қолдауда қарап отырмайтын басқарма басшылығы, өңіріміздің атын әлемдік аренаға танытып жүрген спортшылар мен белдескенде бел, күрескенде тізе бүкпеуге, жеңілістің қиыр жолын кесіп өтуге машықтандыратын жаттықтырушылар бас қосты. Яғни, салтанатты шараға облыс әкімінің орынбасары Сақтағанов Нұрымбет Аманұлы, облыстық мәдениет және спорт басқармасының басшысы Рүстемов Руслан Рүстемұлы, спорт ардагерлер кеңесінің төрағасы,  ҚР-ң құрметті спорт қайраткері, профессор, Жақсыбек Егізбаев, спорт саласының ардагерлері, жанашырлары, спортшылар мен жаттықтырушылар және спорт мекемелерінің қызметкерлері қатысты. Н.Сақтағанов салтанатты шараны ашып, құттықтау сөз сөйлесе, Ж.Егізбаев барша спорт ардагерлері атынан жүрекжарды лебіз білдіріп, Сыр спортының өсіп-өркендей беруіне тілектестік батасын берді.

Атаулы мерекеде түрлі сайыста сүрінбеген, небір додаларда жығылмаған, облыстың атын абыроймен арқалап жүрген спортшылар марапат мінберінен көрінді. V Ислам ойындарында ауыр атлетикадан қола жүлде иеленген  Бектай Асылжан Серікұлы облыс әкімі орынбасарының алғысына ие болса, еңбегі сіңген жаттықтырушылар мен спортшыларға ҚР Мәдениет және спорт министрлігі, Спорт және дене шынықтыру істері комитетінің спорттық атақтар беру туралы куәліктері тапсырылды. Сонымен қатар, саланың сапалы дамуында өзіндік үлесін қосып, елеулі еңбек етіп жүрген жанашырлар да еленбей қалмады. Өз міндетін абыроймен атқарып жүрген бірқатар қызметкерлер облыс әкімінің, облыс әкімі орынбасарының, басқарма басшысының алғыс хаттарымен марапатталды. Осы ретте, салалық мәдениет, спорт және ақпарат қызметкерлерінің  кәсіптік одағы қоғамдық бірлестігі облыстық филиалының төрайымы Умбетова Раушан Балтабайқызы да Сыр спортын дамыту жолында еңбек еткен қызметкерлерге «еңбек даңқы» төсбелгісі мен алғыс хат табыстады. Негізінен, Сыр жастары спорттың кез келгенінен үздік атанып, мәртебені асқақтатып жүргені көпке аян. Тіпті, әлемдік және халықаралық деңгейдегі жарыстарда да жеңіліспен емес, жүлдемен оралып, қоржынды медальмен толтырып келеді. Мерекеге орай өткізілген шарада жеңімпаздарды жеңісімен құттықтау рәсімі жалғасып, облыстық жеңіл атлетика федерациясының президенті Шәукенбаев Асхат Қасымұлы жеңіл атлетикадан биылғы ҚР чемпионаттары мен Халықаралық жарыстардың жеңімпаздарына алғыс хат және арнайы дайындалған сыйлықтар табыстады. Әлбетте, мерекелік мезетте марапаттың артқаны қуаныштың көбеюіне де нақ себеп. Олай болса, жеңіс пен жеңілістің жіңішке жолында сенім жүгін арқалап, жер қаратпауға тырысатын жерлестер мақтауға лайық.

Спорт мерекесі қарсаңында шаралар мен кезекті жарыстардың өткізілетінін тілге тиек еттік. Өйткені, бұл күні саламатты өмір салтын ұстанудағы әрбір қимыл-қозғалыстың маңыздылығы айқындалып, саулық кепілі екендігі дәлелді дәріптеледі. Облыста да орайын тауып, спорт мекемелерінің арасында ұйымдастырылған жарыста жеңімпаз атанғандар бар. Волейболдан 3-орынды №5 олимпиадалық резервтің мамандандырылған балалар-жасөспірімдер мектебінің командасы алса, 2-орынды облыстық мәдениет және спорт басқармасы, облыстық олимпиадалық резерв даярлау орталығының, 1-орынды Ұлттық және ат спорты түрлері бойынша спорт клубының ұжымдары иеленді. Шағын футболдан 3-орын қалалық дене шынықтыру және спорт бөлімі командасына тиесілі болса, 2-орын Қайсар ойын түрлері бойынша спорт клубына, ал жеңімпаз команда, яғни 1-орын «Қайсар» футбол клубының командасына бұйырды. Осы орайда, Нұрымбет Аманұлы шеберлігі мен ұшқырлығын ұштастыра білген волейбол және футбол ойынының жүлдегерлерін марапаттады. Жеңімпаздарды жігерлендеріп, сала мамандарының да еңбегін ескеріп сый-құрмет көрсетумен шектелмеген шара соңы көтеріңкі көңіл-күймен концерттік бағдарламаға ұласты. Мәдениет және спорт басқармасына қарасты мекемелердің мерекеге арнайы дайындаған кеші жоғары деңгейде өтіп, әсем ән мен мың бұралған бишілердің өнері көпшілік назарына ұсынылды.

Қорытындылай келе, дүбірлеген думанды мерекелерді өткізу, қуанышты көппен бөлісу қазақ халқының қанына сіңген қасиет. Сайып келгенде, өңірімізде де атаулы күндердің бәрі алдын-ала тыңғылықты ұйымдастырылып, көлемді өткізіледі. Бұған Сыр жұртшылығы да куә. Олай болса, біз де ел намысын биік ұстайтын спортшыларға жеңіс пен жетістік тілейміз!

З.ДАСТАНҚЫЗЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған