«Шынықсаң шымыр боласың» деген тәмсілдің мәні тереңде. Себебі, шынығу бойда шаршап-шалдығуды болдырмай, мазасыздықты жойып, күш-жігерді қалыптастырады. Әлбетте, жастардың спортпен шұғылданатыны қалыпты жағдай. Алайда, қарттыққа қарай қадам басқан ересектердің де әлі ептілік танытарлық қайраты бар. Қайткенмен де, қартайған шақта күш-қуатты сақтауға көмектесетін спорт екенін санаға сіңіргендер көп. Осы орайда, Қызылорда қалалық дене шынықтыру және спорт бөлімі облыстық спартакиада үшін сала ардагерлері арасында іріктеу өткізіп, жеңімпаздарға келесі кезеңге жолдама берген еді. Төрешілер байқауда байыптылық танытып, сайыста сүрінбегендердің ойынын сүзгіден өткізіп, қатысушыларды қырағы көзбен бақылады. Бүгінде спартакиада өз мәресіне жетіп, қорытындыланды.
Аталған бөлімнің бастамасымен алаңға жиналған 50 жастан асқан ардагерлер түрлі спорттан сынға түсіп, өз қабілетін көрсетті. Спартакиада спорттың 6 түрінен өткізіліп, бәсекеде бап та сыналды. Яғни, Қызылорда қаласының құрама командасы шахмат ойынынан шалыс баспай, қарсы топқа есе жібермеуге тырысты. Қатысушылар ақылдың амалына жүгініп, түрлі тәсілдің тілін тауып, ойға арналған ойында омақаса құлауға жол бермеген сыңайлы. Ой-өрістің дамуына машықтандыратын тағы бір ойын тоғызқұмалақта тосырқап қалмағандар ережені ескеріп, қағиданы қаперде ұстап, шыншылдықпен шыңға шықты. Нәтижесінде, ардагерлер жеңіске жақындау үшін осалдыққа бой бермеді.
Ойдың ойынында орға жығылмағандар ала доптың аламанында да абдырап қалмады. Қарсыластың қақпасына гол салып, қызу ойында оң нәтиже көрсеткен қатысушы командалар шағын футболды да тәмамдады. Келесі кезең волейболда үздік ойын көрсеткен ардагерлер әлі де спорт саласында бағындырар шыңы биік болатынын дәлелдегендей. Әлбетте, спортпен тұрақты шұғылданудың маңызы зор. Сайып келгенде, ардақты ардагерлердің ойында мықтылық пен жылдамдық танытуы икемділігі мен спортқа қызығушылығы деп анық айтуға болады.
Негізінен, күрес – қазақ халқының ертеден қалыптасқан спорт түрі. Жиын-тойларға жиылған жұртшылық балуандардың белдесуін көріп, сынға түскен қос білектіге қолдау білдіріп, қолпаштап отырған. Сондықтан кей мереке, жиын-той, шараларды қазақ күресінсіз елестету мүмкін емес. Сайып келгенде, мұны еңкейген қарттан, еңбектеген балаға дейін қызықтайтындықтан, үлкенге де, кішіге де таңсық дүние емес. Қазір жас буын күресте кері бұрылып кетпей, керісінше күш сынасуға бек дайын тұрады. Осы ретте, ардагерлер де қазақ күресінде жүлдені жолда тастамайтынын көрсеткендей. Әр ауданнан келген кіл мықтылар бәсекеде басып озып, батылдығымен көзге түсті.
Ардагер қатысушылар қалалық спорт бөлімінің ұйымдастыруымен өткен спартакиадада спорттың қай-қайсысында тыңғылықты дайындығын аңғартты. Қанша дегенмен ой жарысында озғандардың, қимыл-қозғалыс бағытында да қалыс қалмайтыны даусыз. Мәселен, үстел теннисіне үстірт қарамаған қатысушылар аталған ойында алғырлық танытып, үздік болуға ұмтылды. Ең мықтылар, жүз жүйріктер жиналған жарыста көштің соңында қалмай, қарым-қабілетін көрсетіп, жеңіске жету оңай емес.
Түйіндей келе, тамыз айының 18-21 аралығында өткізілген спартакиада жалпы командалық есеп бойынша ІІІ орынды Қазалы ауданы, ІІ орынды Шиелі ауданының командасы иемденсе, І орынды Қызылорда қаласының командасы жеңіп алды. Жеңіс жолында жүлденің бұйыруы – зор жетістік һәм мақтаныш. Ал, жан-жақтылықпен жетістікке жетуде жасқанбайтын жастармен қатар ардагерлердің де спорт алаңында жоғары көрсеткіш көрсетуі – жақсы нәтиже.
Замира АХМЕТ
