«Қанды қаңтарда» артын ойламай, құр атойлап жүрген жандардың басым бөлігі – өрімтал өрендер. Ойланбай от басып, отбасын, Отанын алаңға, тағдырын таразыға салғандардардың бүгінде салы суға кетуде. Ұзынқұлақтардың айтысы бойынша, бүлікшіл топтың өкілдері көше бұзақылары, NEEТ санатындағы, оқымаған жастар екен. Осы кезде қазақтың «Білім іздеген өсер, бүлік іздеген өшер» деген тәмсілі еске еріксіз оралады. Шынымен де, «оқимын, білемін, ізденемін» деген жасқа елімізде мүмкіндік мол. Иә, кемшін тұстар бар. Бірақ, көш жүре түзеледі. Тек сол көштің жүре бұзылып кетпеуін ғана тілеуден басқа шара жоқ. Сондықтан бүгінгі «Білім бағдаршамы» айдарында білім саласының бағыт-бағдарына бір сапар жасап шыққанды жөн санадық.
«Оpenbilimkzo» атты telegram-бот іске қосылды
Қызылорда облыстық білім басқармасы өтініш немесе арыз жолдаушының құқықтық мүмкіндіктеріне негіздей отырып, заманауи «OpenBilimKzo» атты Telegram-ботын іске қосты. Бұл туралы Өңірлік коммуникациялар қызметінде өткен брифингте облыстық білім басқармасының баспасөз хатшысы Бекбол Қаратайұлы айтып берді.
Аталмыш Telegram-Bot азаматтардың көкейінде жүрген сауалдарға және өзектілігі басым өтініш пен арыздардың жауап алу процесін одан әрі жеңілдетуіне септігін тигізбек. Қосымша арқылы азаматтар басқарманың барлық жұмыстары мен құрылымы жайында толық ақпарат алып, басқармаға және басшыға тікелей сауалдарын қойып, басшының онлайн жеке қабылдауына жазыла алады.
— Telegram-боттың негізгі мақсаты – азаматтардың арыз-шағымдары мен сауалдарын қашықтықтан қабылдап, жедел жауап беріп, мәселелерін оңтайлы шешу. Алдағы уақытта Telegram-ботты тиімді пайдалану және білім саласына қатысты ақпараттар мен сауалдарын осы қосымша арқылы оңай алудың жолын оңтайландырып, толықтырулар енгізіледі. Сондай-ақ, Telegram-ботта жұмысқа орналасушылар үшін бос орындардың тізілімі ашық түрде жарияланатын болады,- деді Бекбол Қаратайұлы.
«OpenBilimKzo» атты Telegram-боттың басты бетінде «Басқарма туралы», «Азаматтарға», «Арыз-шағымдар мен сауалдар», «Жаңалықтар», «Жедел сауалнамадан өту» атты 5 пәрмен батырмалары орналасқан. Алдағы уақытта аймақтағы білім беру ұйымдары мен директорларына, материалдық базасы мен мұғалім жұмыстарының сапасын анықтау мақсатында онлайн сауалнама аталмыш бот арқылы ұйымдастырылады.
Облыстық білім басқармасының ресми әлеуметтік желідегі парақшаларына ұсыныс-пікірлеріңіз бен сұрақтарыңызды, мәселелеріңізді мессенджер арқылы да жолдауға болады.
Ауқымды ребрендинг
Облыстық білім басқармасының медиа-контенттеріне жаңашылдықтар енгізіліп, оның ұғынықтылығы әрі қолжетімділігі одан әрі өрістетілмек. Бұл туралы да облыстық білім басқармасының баспасөз хатшысы Бекбол Қаратайұлы мәлімдеді.
Биылғы оқу жылынан бастап барлық орта білім беру ұйымдарының элективті таңдау курстарына “Медиасауаттылық” курсы қосылды. Бүгінде жоғары сынып оқушылары аптасына бір рет курста ақпарат ұғымын толық зерделеп, оның заңдылықтарын меңгеруде. Сонымен қатар қала орталығындағы 3 мектепте, аудандардағы бірқатар білім беру ұйымдарында заманауи технологиялармен жабдықталған медиа-студиялар да жұмыс жасауда.
— Облыстық білім басқармасы өтініш немесе арыз жолдаушының құқықтық мүмкіндіктеріне негіздей отырып, заманауи «OpenBilimKzo» атты Telegram-ботын іске қосты. Бұл Telegram-Bot азаматтардың көкейінде жүрген сауалдарға және өзектілігі басым өтініш пен арыздардың жауап алу процесін одан әрі жеңілдетуіне септігін тигізбек.
Қосымша арқылы азаматтар басқарманың барлық жұмыстары мен құрылымы жайында толық ақпарат алып, басқармаға және басшыға тікелей сауалдарын қойып, онлайн жеке қабылдауына жазыла алады. Сондай-ақ, алдағы уақытта Telegram-ботта жұмысқа орналасушылар үшін бос орындардың тізілімі жарияланатын болады,- деді Б.Қаратайұлы.
Сонымен қатар жуық арада білім басқармасының “YouTube” арнасы ашылады. Мамандардың іс-тәжірибелерін тарату, насихаттау, білім ордаларының тыныс-тіршілігін ақпараттандыру, ондағы білім алушылардың шығармашылық мүмкіндіктерін таныту мақсатында жұмыс жасайтын «YouTube» арнасына бүгінде арнайы бағдарламалар топтамасы дайындалуда.
Сондай-ақ, басқарманың әлеуметтік желілерінің жұмысы қайта жандандырылып, жаңадан медиа және контент-жоспар даярланады. Мұнымен қоса, әр күн сайын аймақта жетістікке жеткен педагогтар мен дарынды оқушыларды насихаттайтын түрлі айдарлар арқылы посттар шығып отыратын болады.
Ребрендинг жасаудың алғашқы қадамы ретінде жыл басында басқарманың негізгі логотипіне байқау жарияланған болатын. 31 қаңтарға дейін кез келген ынталы азаматтар байқауға жұмыстарын ұсынды. Арнайы комиссия байқаудың қорытындысын шығарып, үздік шыққан туынды басқарманың төлтаңбасы есебінде таңдалады.
ҰБТ: ұлттың білімдегі толқуы
Ұлттық бірыңғай тестілеуді ЖЖОКБҰ-ға түсуге арналған іріктеу емтихандарының бір нысаны ретінде, яғни оқушының білім сапасын білім беру ұйымынан тәуелсіз бағалайтын мемлекеттік жүйе ретінде түсінуіміз қажет-ақ. Кезінде «Ұлы Біркүндік Төңкеріс» болса, қазір бір емес, бірнеше күнге созылып, толқу мен толқынысқа айналды.
Бұл шараны кез келген мектеп бітіруші түлектің өзі қалаған мамандығына сәйкес жоғары оқу орнын таңдап, тестілеу негізінде иеленген баллдық көрсеткішінің шегінде ғана таңдаған мамандық иесі атануына берілетін мүмкіндік деп қарастыру қажет. Өткен 2021 жылдан бастап елімізде ҰБТ-ны электрондық тұрғыда үйлестіру жолға қойылды. Ол үшін ресми сайттарда «ҰБТ тапсыру үшін Қазақстанның барлық өңірінде 56 тестілеу орталығы ашылады» деген ақпарат айтылған болатын. Қызылорда облысының өзінде 4 аймақтан ҰБТ орталығы ашылды. Бұл арқылы мектеп бітірушілердің өз өтініштерімен орталықтарды таңдауына әрі қалаған мерзімінде барып тапсыруына қолжетімдік арттырылып отыр. Дегенмен де өңір үшін төрт қана орталық аздық ететіні, өзге аудандағы мектеп бітірушілердің ата-аналарының жол қатынасы үшін қалталарына салмақ түсіретіні белгілі. Сол үшін де орталық санын арттыру мәселесі күн тәртібіне қойылған жөн.
Жоғарыда атағанымыздай, ҰБТ шарасын мектеп қабырғасында жүргізілетін ағымдық және қорытынды бағалау жүйесімен шатастырып алуға болмайды. Дегенмен, әрбір шәкірт мұғалім мен мектеп үшін еліміздің ертеңі, болашағы. Сондықтан ұстаздар бар қарым-қабілетін пайдаланып, ата-аналар мен оқушылардың өтініштерін ескере отырып, қосымша психологиялық және педагогикалық дайындық жұмыстарын үйлестіруі мүмкін. Сонымен қатар, қазірдің өзінде мектеп бітірушілер үшін түрлі орталықтардың дайындық жұмысын жүргізуге және сынама тестілеумен қамтуға арналған ақылы негіздегі онлайн қызметтері жұмыс жасайды. Оған әрбір оқушының өз қалауымен тіркелуіне, дайындық жұмыстарына қатысуына құқығы бар. Ал, оқушыларды таңдаған тестілеу орталықтарына жеткізу, олардың өмір қауіпсіздігі мен денсаулығын сақтау шаралары әрбір ата-ананың тікелей міндетіне жатады.
Қазақстан Республикасы Білім және ғылым министрлігі Ұлттық тестілеу орталығы Қазақстан Республикасы Білім және ғылым министрінің 2017 жылғы 2 мамырдағы №204 бұйрығымен бекітілген Ұлттық бірыңғай тестілеуді өткізу және «Ұлттық бірыңғай тестілеу тапсырғаны туралы сертификат беру» мемлекеттік көрсетілетін қызмет қағидаларына сәйкес қалауы бойынша ЖЖОКБҰ-ға ақылы негізде оқуға қабылдану үшін орта білім беру ұйымдарының бітіруші сынып оқушылары қатыса алады. Тестілеушілер ҰБТ-ға тіркелу кезінде емтихан өтетін орынды, күнді және уақытты өз еркілері бойынша таңдайды.
Екі миллион көркем әдебиет
Қазақстанда оқу жылының басынан мектеп кітапханаларының қоры екі миллион көркем әдебиетпен толықтырылды. 2020 жылы елімізде Мемлекет басшысының тапсырмасы бойынша «Оқуға құштар мектеп» жобасы басталды. Оған мектеп кітапханаларын көркем әдебиетпен қамтамасыз ету, оқушыларды кітап оқуға тарту үшін іс-шаралар өткізу, кітапханаларда қолайлы жағдай жасау, жөндеу және жабдықтау, кітапханашылардың біліктілігін арттыру сияқты бірқатар шаралар кіреді. Бірқатар мектептер күн сайын міндетті түрде 20 минут кітап оқуды дәстүрге айналдырды. Мектеп кітапханаларының жанынан 440 заманауи коворкинг-орталық ашылып, жұмыс істеп жатыр.
Көптеген қазақстандық жоғары оқу орны кітапханаларын автоматтандырады және қайта жабдықтайды. Бұл бағытта белсенді жұмыс студенттерге кітап іздеу және алу бойынша ыңғайлы сервис ұсыну, сондай-ақ кітапханашыларға кітапхана қорымен жұмыс істеу үшін ыңғайлы құрал жасау үшін жүргізіледі.
Енгізіліп жатқан жаңашылдықтар оқырман санын арттыруға, қызмет көрсету сапасын жақсартуға және жұмыс уақытын қысқартуға мүмкіндік берді. Мысалы, жаңа технологияларды енгізудің және ЖОО-ның қалалық мектептермен белсенді жұмысының арқасында Қарағанды техникалық университетінде оқырман саны 17 мыңға дейін артқан.
Торайғыров университетінде студенттердің кітап оқуға деген қызығушылығын арттыру мақсатында кітапханада ауданы 1560 м2 коворкинг-орталық, конференц-зал және студенттерге арналған демалыс аймағы ашылған.
— Білім және ғылым министрлігі жоғары оқу орындарының, мектептер мен колледждердің алдына білім алушылардың оқуға деген қызығушылығын арттыру, мектептермен жұмысты жандандыру, жағдайды жақсарту және қажетті ақпаратты іздеудің тиімді жолдарын қамтамасыз ету міндетін қойды. Сондықтан қазір ЖОО-лар автоматтандырылған жүйелер мен өзгерістер енгізу, талаптарға сәйкес жүйелерді пысықтау және персоналды оқыту бойынша шаралар қабылдап жатыр. Сонымен қатар университеттер кітапхана қорын жаңа басылымдармен толықтыруда. Ең бастысы, университет кітапханалары мектеп оқушылары үшін ашық болады. Медиаресурстар саны да артты: электронды оқулықтар, энциклопедиялар, әдістемелік құралдар және басқа да әдебиеттер көбейді. Электрондық кітапханалардың толық мәтінді және мультимедиялық ресурстары, соның ішінде Web of Science және Scopus халықаралық базалары қолжетімді болды. Бұл шаралар студенттеріміз үшін барлық жағдайды жасау үшін қабылданып жатыр,– деді Білім және ғылым вице-министрі Қуаныш Ерғалиев.
Оқуға құштар ұлт – нақты мерзімде орындалатын тағы бір мақсат. БҒМ атқарып жатқан жұмыстардың арқасында қазірдің өзінде сапалы өзгерістер енгізіле бастады. Ал, осынша мүмкіндікті өзіңнің, еліңнің дамуы жолында жұмсаған жандардың бағы өшпейтіні, мерейі өсетіні белгілі.
Айдар САЙЛАУОВ
