Оқушылар сапалы да қауіпсіз жерде білім алады

Сыр өңірінде заманауи жаңа білім ошақтары бой көтеріп, жас ұрпақтың сапалы білім, саналы тәрбие алуына баса мән берілген. Аймақта 3-6 жастағы балаларды мектепке дейінгі тәрбиемен қамту үлесі 100 пайызға, ал 2-6 жастағылардың қамтылуы 88,9 пайызға жетті. Мемлекет пен жекешеменшік әріптестіктің ынтымақтастық аясы кеңейіп келеді. Бүгінде облыстағы 613 балабақшаның 453-і немесе 73%-ы жеке сектордың үлесінде.

Білім күні қарсаңында қалалық №101 мектеп-лицей және Абай атындағы үш тілде оқытатын дарынды балаларға арналған мамандандырылған сыныптары бар мектептің жанынан салынған оқу ғимараттары пайдалануға берілген еді. Осылайша облыс орталығындағы 4 мектептің 1850 балаға арналған қосымша ғимараттары жаңа оқу жылында балаларды қабылдады.

Жаңа оқу жылының алғашқы күндері дәл осындай қуанышты ұстаздар мен оқушыларға тағы да сыйлады. Қызылорда қаласындағы Т.Есетов атындағы №264 мектеп-лицейдің және С.Толыбеков атындағы №3 ІТ-мектеп-лицейінің жанынан салынған қосымша ғимараттар пайдалануға берілді. С.Толыбеков атындағы №3 ІТ-мектеп-лицейінің ауласындағы 375 орындық ғимаратта бастауыш сыныптар оқиды. Ал, Т.Есетов атындағы №264 мектеп-лицейдің қосымша ғимараты 550 орындық.

Салтанатты ашылу рәсіміне облыс әкімі Нұрлыбек Нәлібаев қатысып, жиналған жұртшылықты құттықтады.

— Мемлекет басшысы Қасым-Жомарт Кемелұлы Тоқаев «Әділетті Қазақстанның экономикалық бағдары» атты дәстүрлі жолдауында адал азамат және тұғырлы тұлға болудың негізі бала кезден қалыптасатынын айтты. Ол үшін жас ұрпақтың қауіпсіз әрі алаңсыз өмір сүруін қамтамасыз етуіміз керек. Балаларға қауіпсіз орта қалыптастыру – ортақ міндет, маңызды бағыттарымыздың бірі.

Кейінгі жылдары оқушы санының артуына байланысты бірнеше білім ошағы қосымша құрылысты қажет етті. Өздеріңіз білетіндей, орталықта жаңа мектеп салуға ыңғайлы жер жоқ. Жаңадан ашылған жерге салынған мектепке қатынау қиын. Әсіресе, қыстың қысқа күндері ата-аналар балаларына алаңдайды. Тағы бір айтарлығы, қосымша ғимарат бюджетке аса ауыр салмақ салмайды, жаңа мектепке қарағанда арзан. Ең маңыздысы — балаларымыздың қауіпсіздігі, олар үйіне жақын, үйренген мектебінде оқиды. Үш ауысымдық мектептер ауласына қосымша ғимарат салу барлық жағынан да тиімді болғандықтан, осы шешімге тоқталдық, – деді аймақ басшысы.

Облыс басшысы мектеп директорларымен бірге білім ошақтарын аралап көрді. Жаңа ғимараттарда оқу кабинеттері, шығармашылық бөлмелер талапқа сай жабдықталған. Оқушыларға ыңғайлы болу үшін оқу құралдарын сақтауға, шығармашылық дамуы мен демалуына барлық жағдай қарастырылған. Бейнебақылау, дыбыстық хабарлау және басқа да қауіпсіздік жабдықтары орнатылған.

Мемлекет басшысының бастамасымен қолға алынған «Жайлы мектеп» ұлттық жобасы шеңберінде 100 млрд. теңгеге жуық қаражатқа Сыр өңірінде 21 заманауи мектеп салынбақ. Биыл 10 мектептің іргетасы қаланады. Қаланың сол жағалауында «ҚазГерМұнай» компаниясының қаржылай қолдауымен 350 орындық заманауи Оқушылар сарайы бой көтермек. Бұл қосымша білім беру ордасында озық ойлы, өнерге құштар, спортқа бейім дарынды балалар тәрбиеленбек.

Білім саласының дамуына, оқушылардың сапалы да қауіпсіз жерде білім алуына жасалып жатқан жұмыстар көз қуантады. Осы қарқынмен жұмыс жүре берсе, педагог мамандардың өз шәкірттерінің биік белестерді бағындыру жолында аянбай еңбек ететініне сенімдіміз. Білім саласында өңірдің имиджін әлем деңгейінде көтеретін ұл-қыздарымыздың қатары да көбейе бермек.

Н.Меңдібай

Добавить комментарий

Ваш адрес email не будет опубликован. Обязательные поля помечены *