Дәстүрдің дәмін, тәрбиенің дәнін татқызған шара

Отбасылық құндылықтың қадір-қасиетін қазақ қашанда құйма алтыннан құнды деп қабылдаған. Иә, дәстүрі тірегіне, отбасы жүрегіне айналған еліміз үшін қарашаңырақтың ақадал бейнесі биікте бола бермек. Міне, осы бабамыз қалыптастырған дара жолдың бегздада бейнесі өмірлік жарқын түстерге боялып келеді.

Осыған орай, Абылай хан атындағы №140 орта мектебінде «Отбасы мектеп» штабының кезекті шарасы өткен болатын. «Отбасы мектеп» штабы 2020 жылы қараша айында бастау алып облыс әкімі жанындағы әйелдер істері және отбасылық-демографиялық саясат жөніндегі комиссия, Қорқыт ата атындағы Қызылорда университеті, облыстық Қазақстан халқы ассамблеясы жанындағы Аналар кеңесі, облыстық әйелдер кеңесі сынды әлеуметтік серіктес ұйымдар және ата-аналардың қатысуымен жүйелі жұмыс жүргізіп келеді. Бұл шараға арнайы қонақтар және бала тәрбиелеуде, оның бойына білім мен өнерді қатар сіңіруде өзіндік орындары бар отбасы ата-аналары қатысты. «Отбасы. Тәрбие. Мектеп: дәстүр тірегі» тақырыбындағы тәжірибе алаңының қонақтары да айтулы тұлғалар болды.

Отбасы мектеп штабының негізгі идеясы отбасы, оқушы, мектеп ынтымақтастығын нығайту. Сонымен қатар, бұл шара штабтың жүйелі, қалыпты дағды негізіндегі жұмысының нәтижесі іспеттес көрінді. Тәжірибе алаңы барысында «Ғажайып театры» мүшелері оқыған кітаптары желісімен қойылым ұсынып көрермен ықыласына бөленді.

Тағылымды тәжірибе алаңының ерекшелігінің бірі мектеп әжелері қазақ тарихының тереңінен орын алып, бүгінгі күні ұмытылып бара жатырған салтымыз, қыз баланың құлағын тесу рәсімін жасап, салт-дәстүрімізді жаңғыртты. Кеш қонақтары ҚР Президенті жанындағы әйелдер істері және отбасылық-демографиялық саясат жөніндегі Ұлттық комиссия мүшесі Қарақат Жақсылыққызы Әбден, облыстық Қазақстан халқы ассамблеясы жанындағы Аналар кеңесінің төрайымы, «Отбасы мектеп» штаб мүшесі Нұрсәуле Дүйсенбайқызы, облыс әкімі жанындағы әйелдер істері және отбасылық-демографиялық саясат жөніндегі комиссия мүшесі Гүлнар Хамзақызы және қалалық әйелдер кеңесінің төрайымы, Абай атындағы ДБА мектеп директоры Жаннат Мылтықбайқызы қыздардың құлақтарына сырға салып, бата берді.

Жас ұрпақ – біздің өміріміздің тікелей жалғастырушысы ғана емес, еліміздің тірегі, мызғымас болашағы. Бала тәрбиесіндегі міндетін бұлжытпай орындап, көпке үлгі болып жүрген мектеп ата-аналары да өз кезегінде «Отбасы штаб» жұмысына тоқталып, сөз алды.

Мектептің ата-анасы, қамқоршылық кеңесінің төрағасы, белгілі журналист Нұрлан Көбегенұлы отбасындағы бала тәрбиесіне тоқталып, балаларының өнерімен таныстырды. Жыршы, ұстаз Руслан Жұмабайұлының отбасы күйден шашу шашып, терме орындап қонақтардың қошеметіне бөленді. Ал, театр актеры, мәдениет саласының үздігі Ұғым Санақұлы отбасымен сахналық қойылым көрсетіп, шеберлігін тағы бір дәлелдеді.

Ата-аналар мектеп пен ата-ана ынтымақтастығының жұмысы жүйелі жүргізілетінін дәлелі ретінде «Кел, оқиық», «Қауырсын қалам» жобаларымен байланыстарын атады.

– Біз отбасы және мектеп болып ұрпағымыздың бойында ұлттық тәрбиені, имандылық қасиеттерді жетілдірсек, сонда ғана халқының салтын жақсы білетін, ата-анасын сыйлайтын, ел үшін еңбек ететін азаматты қалыптастырамыз,- деді мектеп директоры Айгүл Мұсабаева.

Ең ізгі үлгі – ата-ананың әрекеті. Ең тағылымды тәрбие де осы. Сондықтан ұтары көп ұтымды шараның шуағы мен шұғыласы бала жүрегіне нұр болып құйылары анық. Осы тұрғыда оң баға алған мерейлі мектептің ұйымдастырған шарасы көпшіліктің көңілінен шығып, жоғары бағаға ие болды.

А.ӘДІЛЖАНҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған