Білім ошақтарының саны көбеймек

«Қазақтың тағдыры, келешекте ел болуы да мектебінің қандай негізде құрылуына барып тіреледі. Мектебімізді таза, берік һәм өз жанымызға, қазақ жанына үйлесетін негізде құрай білсек, келешегіміз үшін тайынбай-ақ серттесуге болады» деп Мағжан Жұмабаев айтпақшы, білім ошағының дамуына бағытталған жұмыстар қарқынды болса, қоғамға қажеттісі де сол болмақ. Баланың санасына сауаттылықты сіңіріп, әдеп әліпбиін негіз етіп, балалықтан даналыққа жөн сілтейтін рухани орын – мектеп десек артық айтқандық емес. Облыстағы білім ордаларының саны артып, тұрпатынан сапалылық сезілсе, киелі мекеннен түлеп ұшар саналы шәкірттер көп болмақ. Сайып келгенде, білгір һәм білімді оқушылардың қалыптасуы жарқын болашақтың келбетіне айналып, ел сенімін ақтайтын жанашырдың көп болуына себеп болады. Осы ретте, облыстық білім басқармасы «Жайлы мектеп» жобасы аясында жұмыстарды жүзеге асыру бағытында, жүйелі жоспарлар негізінде жұмыс жасауда.

Тоқталып өтсек, Мемлекет басшысы Қасым-Жомарт Кемелұлының тапсырмасына орай өңірде 2025 жылға дейін «Жайлы мектеп» ұлттық жобасы аясында 21 білім ошағы бой көтермек. Атап айтсақ, Қызылорда қаласында – 8, Арал ауданында – 4, Қазалыда – 2, Қармақшыда – 2 және Жалағаш, Сырдария, Шиелі, Жаңақорған аудандарында бір мектептен салынады. Соның ішінде 10 мектептің құрылысы биыл басталмақ.

Осы орайда жұмыстың барысын бақылап, басы-қасында жүрген басшылардың жа­на­шырлығы көңіл қуантады. Облыс әкі­мі­нің орынбасары Нұрымбет Сақтағанов КБИ мөлтек ауданында болып, биыл құ­рылысы жанданбақ жаңадан салынатын білім нысанының орнын көрді. Сол маңда тұратын тұрғындармен кездесті. 600 орындық мектептің құрылысы биыл басталатынын, алаңдауға еш негіз жоқ екенін айтты. «Жайлы мектептің» ерекшелігі – бастауыш және жоғары сынып оқушылары ғимараттың жекелеген блоктарында оқиды. Сәйкесінше, олардың өз оқу кабинеттері, әжетханалары, спортзалдары болады. Сондай-ақ, бейнебақылау, дыбыстық дабыл сияқты қауіпсіздік құрылғылары орнатылады. Физика, химия, биология, робототехника заманауи кабинеттермен қамтамасыз етіледі. Бұның бәрі – білім сапасын арттыруда өскелең ұрпақтың болашағы үшін жасалып жатқан жұмыстар.

З.ДАСТАНҚЫЗЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған