Газетіміздің өткен нөмірінде (№27, 25.07.2025) «Балабақша дауы: арба да сынбау керек, өгіз де өлмеу керек!» деген мақала жариялаған болатынбыз. Мақаланы оқыған балабақша иелері ризашылығын білдіріп, мәселені аяқсыз қалмауын сұрады. Және облыс әкімінің міндетін атқарушының өткізген жиналысынан кейін әңгіме көбейіп, тіпті талап күшейіп жатқанын айтты. Кей тәрбиелеушілер негізсіз қысқарту жүргізгені үшін балабақша иелері үстінен Еңбек қорғау инспекциясына шағым түсіретінін айтып, заңды талап етіпті. Балабақша иелері бұл қадамға амалсыздан барып отырғанын және облыс әкімінің қаулысын алға тартқан.
Кәсіпкерлердің де қарап жатпасы белгілі, осы күндері жан-жаққа облыста болып жатқан жайтты ескертсе керек, «Қызылорда облысында мемлекеттік білім беру тапсырысына мониторинг жүргізу кезінде нормативтік құқықтық актілерді бұзу және өкілеттіктерін асыра пайдалану, сондай-ақ, қаржыландырудың қысқаруы салдарынан 90-нан астам балабақша жабылды» деген мәлімет біраз жерге барған сыңайлы. Сонымен не болды десеңіз, әрі қарай оқыңыз.
2025 жылғы 24 шілдеде Қазақстандық үздіксіз білім беру қауымдастығының өтініші бойынша «Атамекен» Ұлттық Кәсіпкерлер палатасының алаңында Қызылорда және Түркістан облыстарында адал бәсекелестік және білім беру нарығына қол жеткізуге тең жағдай жасау мәселелері бойынша Zoom-жиналыс өтті. Жиынға Бас прокуратураның, Оқу-ағарту министрлігінің, Қызылорда және Түркістан облыстарының жергілікті атқарушы органдарының, Ұлттық Кәсіпкерлер палатасының өкілдері және Қазақстандық үздіксіз білім беру қауымдастығының (ҚҮБҚ) мүшелері қатысты.
Кездесуге қатысушылардың айтуынша, Қызылорда облысында 90-нан астам мектепке дейінгі мекеме жан басына шаққандағы мемлекеттік қаржыландырудан айырылып, жабылуға мәжбүр болған. Мониторинг жүргізу кезінде бұзушылықтардың себебі комиссия мүшелері қызметкерлердің жеке істері, балалардың денсаулық паспорттары, медициналық кітапшалар және жалақы ведомостары сияқты заңнамада көзделмеген құжаттарды сұратқан. Сонымен қатар, №381 бұйрыққа сәйкес тексерушілер нысан бойынша өтінішті, камералар мен дабыл түймесі туралы мәліметтерді, медициналық мекемемен жасалған шартты, штат кестесін және жалдау шартын қоса алғанда, құжаттардың шектеулі тізбесін ғана талап ете алады.
«Мемлекеттік органдардың мұндай әрекеттері рейдерлік басып алуға және осы бизнестен бәсекелестерді ығыстыруға ұқсас. Нәтижесінде кәсіпкерлер ғана емес, балалары бар ата-аналар да зардап шекті, олар бір түнде балабақшалардағы орындарынан айырылды», — дейді Қазақстандық үздіксіз білім беру қауымдастығының төрағасы Лейла Куленова.
Сонымен қатар, басқосуға қатысушылар балаларды биометриялық есепке алу жүйесін енгізу мәселелерін және ваучерлер таратылатын «SmartNation Балабақша» платформасының жұмысын талқылады. Қазіргі уақытта жаңа жүйені іске қосу үшін құқықтық базаның жоқтығы айтылды. Бұл балабақшалардың жұмысына кедергі келтіреді.
Жиын қорытындысы бойынша Оқу-ағарту министрлігінің, Бас прокуратураның және жергілікті билік органдарының өкілдері жағдайды мұқият түсініп, бұзушылықтарды жоюға уәде берді. Қазақстандық үздіксіз білім беру қауымдастығы мемлекеттік органдарды бір ай ішінде мемлекеттік қызмет шарттарына сәйкес мектепке дейінгі мекемелерді толық қаржыландыруға шақырды.
