Біздің заманымызда ғылым өте жылдам қарқынмен дамып келеді. Күн сайын ғылымның әр саласынан әртүрлі технологиялар мен жаңа құралдар, күнделікті тұрмысқа керекті заттар шығарылуда. Тың деректер табылуда. Ғылымның ашып жатқан жаңалықтары адамдардың өмірін жеңілдетуге арналған неше түрлі нысандарды ойлап табуда. Ғылымның дамуы адамзаттың өмірі мен тіршілігінің өзгеруіне әсер етті деп айтсақ, қателеспейміз.
Сейсенбіде ғылым қызметкерлері күніне орай Абылай хан атындағы №140 орта мектебінде «Білім. Ғылым. Ата-ана» тақырыбында ашық есік күні өткізілді. Ғылыми-зерттеу орталығында қолданылатын шығармашылық жұмыстар, жобалық іс-шараларды дарынды балалардың қызығушылығына негіздеп, оларды қолдау, басшылыққа алу және әрбір оқушының қабілетіне қарай дарындылығын дамыту, оның ішінде ғылыми іздеу қызметімен ұштастыру, оқушылардың ғылыммен айналысуға деген әлеуетін арттыру кездесудің басты мақсаты болды.
Шараның бірінші бөлімінде «Science faсtory» ғылыми-зерттеу орталығында мектеп оқушыларының ғылыми жобалары, ғылыми ізденіс жұмыстары көрсетілді. «Метеорология» тәжірибелік-зерттеу алаңында 11-сынып оқушысы Жаппасбай Парасат «Метеорологиялық алаңда бақылаулар жүргізу арқылы ауа райы өзгерісін зерттеу» тақырыбындағы зерттеу жұмысын жетекшісі, география пәні мұғалімі Жазира Ахметовамен бірге таныстырды.
«Green study» жылыжай ғылыми-зерттеу орталығында 9-сынып оқушысы, мектеп президенті Аружан Қадырбай “Жылыжайды зең саңырауқұлақтарынан құтқару жолдары” тақырыбындағы жоба жұмысына таныстырылым жасады. Аружанның жетекшісі, биология пәні мұғалімі Жанат Бошайбек.
Ал, екінші бөлімде «Онлайн мектеп» кіші мектеп жұмыстары негізінде ғалым ата-аналардың шебер сыныптары көрсетілді. Қазақ тілі мен әдебиеті пәні бойынша 7-сынып оқушыларына М.Шахановтың «Нарынқұм зауалы» поэмасы тақырыбында «Болашақ» университетінің аға оқытушысы, филология ғылымдарының кандидаты Нұрлан Нұрмаханов сабақ өткізді.
Химия пәні бойынша 8-сынып оқушыларына “Оксидтер, жіктелуі, аталуы” тақырыбында Қорқыт ата атындағы Қызылорда университеті, экология және химия технологиялар кафедрасының қауымдастырылған профессоры, химия ғылымдарының кандидаты Нұрлыбек Ахатаев шебер сыныбын жүргізді.
Ал, құқық негіздері пәні бойынша 10-сынып оқушыларына “Қылмыстық іс жүргізу құқығындағы сот талқылаушының негіздері” тақырыбында Қорқыт ата атындағы Қызылорда университеті, құқықтану кафедрасының аға оқытушысы, заң ғылымдарының магистрі Алия Муйденова тәжірибесімен бөлісті.
Ғалым ата-аналар мектеп оқушыларының білімге, ғылымға деген қызығушылықтарын байқап, үлкен өмірге сәттілік тіледі.
Үшінші бөлім «Science faсtory» ғылыми-зерттеу орталығындағы тәжірибе алаңымен жалғасты. Өз ісінің майталмандары, ғалым ата-аналар мектептің жас ғалымдарымен, магистр дәрежесіндегі ұстаздармен пікір алмасты. Ғылыми ізденіс жұмыстарымен сонымен қатар, ғылыммен айналысудың маңызды тұстарымен бөлісті.
Білім ордасының белсенділері, мектеп парламентінің мүшелері көкейтесті сұрақтарын қойып, әңгіме өрбітті. Болашақ стипендиялық бағдарламасы арқылы Ұлыбританияның, Борнмут университетінің, «Халықаралық қонақ үй бизнесі және туризм менеджменті магистрі», «Мемлекеттік және жергілікті басқару» білім беру бағдарламасының докторанты Бекзат Шәкімұратқызы магистр ұстаздарға ғылыммен айналысу, Scopus журналдарына ғылыми мақалаларын жариялау кезеңінде көмек беруге әзір екенін айтты. Келелі ой, сүбелі сөз айтылған шара мектеп театры оқушыларының “Ұлпан бейнесі” қойылымымен қорытындыланды. Оқушылар қонақтарға сахналық қойылым көрсетіп, рухани демалыс сыйлады.
Кеш соңында “Өрлеу” БАҰО АҚ директорының орынбасары Сәкен Кәрібозұлы ғалымдарды кәсіби мерекемен құттықтап, ғалым ата-аналарға алғыс хаттар табыстады. Мектеп директоры Айгүл Нажмадинқызы шараға қатысушыларға жылы лебізін білдіріп, мектеп ұжымы атынан алғысын жеткізді.
А.ӘДІЛЖАНҰЛЫ
