Облыс көлемінде шығармашылықпен жұмыс жасайтын озат тәжірибелі педагогтердің мәртебесін көтеруге, үздік тәжірибесін анықтауға және таратуға мүмкіндік беретін маңызды жобалардың бірі – «Тәжірибе алаңы». Бұл жоба 2002 жылдан бері дәстүрлі түрде өткізіліп келеді.
Жылдың басында Жаңақорған шипажайында Қызылорда облыстық білім және ғылым қызметкерлері кәсіподақ комитетінің демеушілігімен «Мақсатты мектеп» басшыларына арналған тәжірибе алаңы жұмысын бастады. Шараның ашылу салтанатында «Өрлеу» Қызылорда облысы бойынша филиалының өкілдері, қалалық, аудандық білім бөлімдерінің әдіскерлері мен 80-ге жуық мектеп басшылары бас қосты.
Тәжірибе алаңының ашылу салтанатында ұйымдастырушылар қатысушыларға үш күндік жұмыс бағдарламасы таныстырды. Сонымен қатар, түрлі бағыттар бойынша өткізілетін шеберлік сыныптары, конференциялар, кәсіби байқаулар, танымдық және спорттық сайыстар, сауық кештері, т.б. іс-шаралардың өткізілу форматы, сарапшылардың атқаратын міндеттері түсіндірілді.
Алдағы күндері өтетін іс-шаралар алаңға қатысушылардың өзара тәжірибе алмасуына, педагогикалық идеяларын ұсынуына мүмкіндік бермек.
«Өрлеу» Қызылорда филиалының тренері Жанар Жубауова «Сабақ талдау циклограммасы» тақырыбында мектеп басшыларына арналған кәсіби байқау өткізді. Байқауға қатысушылар ұсынған циклограмманың өзіндік ерекшеліктері орын алды. Циклограмма бірнеше кезеңдерден тұратын, нәтижеге бағытталған үдеріс екендігін көрсетті. Циклограмма сабақты нақты және жүйелі жоспарлауға, оның тиімділігін бағалауға және талдауға мүмкіндік береді.
Байқауға қатысқан мектеп басшыларының жұмысына сабақты талдаудың өзектілігі, дәлелділігі, практикалық қолданысы, әдістемелік құндылығы, инновациялылығы, сөйлеу мәдениеті және материалды ұсыну сапасы критерийлері бойынша талдау жасалып, бағыт-бағдар берілді, ұсыныстармен толықтырылды.
Келесі тренер Оразбай Орманов «SCAFFOLD құзыреттілікке бағытталған оқу сабақтарын әзірлеу» тақырыбында шеберлік сыныбын ұйымдастырды. Шеберлік сынып барысында қатысушылар «Педагогтерге негізгі құзыреттіліктерді практикалық тереңдетілген оқыту тәжірибесіне біріктірудің бірегей тәсілдерін дамытуға көмектесетін SCAFFOLD карточкалары арқылы практикалық тапсырмалар орындады.
Оқыту мен оқуды жетілдіруге оң ықпал ететін «Оқыту әдістемесін жетілдіру жолдары» тақырыбында педагогикалық идеялар аукционы өткізілді. Аукционға барлығы 14 жұмыс келіп түсті. Педагогтердің идеялары сарапталып, үздік жұмыстар анықталды.
Тәжірибе алаңының «трендіне» айналған «Брейн-ринг» танымдық ойыны өткізілді. Сайыс барысында командалар түрлі тақырыптағы логикалық сұрақтарға жауап беріп, нәтижесінде Шиелі ауданының командасы жеңімпаз атанды.
Алаңның дәстүрлі шарасы «Оқуға құштар мектеп» тақырыбында театрландырылған мәдени шарамен жалғасын тапты. Мәдени шараның мақсаты – өскелең ұрпақтың оқу мәдениетін дамыту, білім алушылардың кітап оқу белсенділігінің деңгейін арттыру, көпшілік алдында өз ойын еркін жеткізуге, тіл байлығын арттыруға ықпал ету, кітаптың адам өміріндегі маңызын түсіндіру, жас ұрпақ бойында жоғары азаматтық және рухани-адамгершілік бағдарларды қалыптастыру.
Қалалық және аудандық білім бөлімдерінің командалары ұлт зиялылары, ақын-жазушылары, мемлекет және қоғам қайраткерлері туралы, қазақ әдебиетінің жауһарлары – «Махаббат қызық, мол жылдар…», Әбдіжәміл Нұрпейісовтың 100 жылдығына орай «Қан мен тер», Шыңғыс Айтматовтың «Найман-Ана», Бердібек Соқпақбаевтың «Жұмабай» шығармаларының желісі бойынша және Абайдың қара сөздеріне негізделген «Қара» қойылымын көрсетті.
Жиын аясында әр күннің мазмұнды, қызықты өтуі үшін мәдени және спорттық шаралар ұйымдастырылды. Үстел теннисі, шахмат, дойбы, тоғызқұмалақ ойындары өткізіліп, жеңімпаздар анықталды.
Тәжірибе алаңының үшінші күні «Білім берудегі инновациялар: мақсатты мектептердегі сапаны жақсарту тәсілдері мен стратегиялары» тақырыбындағы ғылыми-практикалық конференциямен басталды.
Ғылыми-практикалық конференция мақсатты мектептерде білім беру сапасын арттыруда озық тәжірибені енгізуге бағытталған тиімді инновациялық тәсілдер мен стратегияларды талқылау және анықтау мақсатында өткізілді.
Конференцияның пленарлық тыңдалымына мектептегі білім беру үдерісіне жаңаша оқыту идеяларын ендіру тәсілдері, мектеп жағдайында педагогтің көшбасшылығын жетілдіру мәселелері, қазіргі білім берудің негізгі аспектісі ретінде білім алушылардың функционалдық сауаттылығын дамыту, табысты оқудың негізі ретінде эмоционалды қолайлы білім беру ортасын құру бағыттары бойынша келіп түскен жұмыстардың ішінен 8 баяндама ұсынылды. Конференцияның электронды жинағына 120-дан астам баяндама келіп түсті.
Облыстағы мақсатты мектеп директорлары бас қосқан тәжірибе алаңының жұмысын қорытындылау мақсатында «Облыстық тәжірибе алаңы: проблемалар, перспективалар» тақырыбында дөңгелек үстел өткізілді.
«Өрлеу» Қызылорда филиалының оқытушылары үш күн бойы өткізілген іс-шараларға сараптамалық талдау жасады. Шара барысында қала мен ауданнан келген қатысушылардың ұсыныстары тыңдалып, кері байланыс берілді.
Б.Бағдатұлы
