Қызылорда қаласы бойынша білім бөлімінің ұйымдастыруымен Абылай хан атындағы №140 орта мектепте сыбайлас жемқорлыққа қарсы мәдениет деңгейін қалыптастыру және алдын алу шараларының әсерін күшейту мақсатында «Адалдық. Заң. Ашықтық» тақырыбындағы ашық-форсайт өтті. Жиынға Қызылорда қаласы бойынша білім бөлімінің басшысы Ерлан Теңізбайұлы, ҚР Президенті жанындағы мемлекеттік басқару Академиясының Қызылорда облысы бойынша филиалының профессоры Ақзада Алайдарқызы, ҚР Президенті жанындағы мемлекеттік басқару Академиясының Қызылорда облысы бойынша филиалының доценті Алмагүл Жанділдақызы, Қорқыт ата атындағы Қызылорда университетінің Сыбайлас жемқорлыққа қарсы комплаенс қызметінің комплаенс-офицері Әлібек Бахытжанұлы, «Aманат» партиясы облыстық филиалы жанындағы Сыбайлас жемқорлыққа қарсы іс-қимыл жөніндегі Кеңес төрағасы Мақсұт Ыбрайханұлы, Қызылорда облысы бойынша адам құқықтары жөніндегі уәкілі Дәурен Сақтапбергенұлы, ҚР-ның Сыбайлас жемқорлыққа қарсы агенттігінің Қызылорда облысы бойынша департаментінің бас маманы Жанар Жалғасбайқызы, мектеп басшылары мен балабақша меңгерушілері қатысты.
Комплаенс қызметінің негізгі міндеттері – сыртқы нормативтік талаптар мен сыбайлас жемқорлыққа қарсы іс-қимыл бойынша озық халықаралық тәжірибенің сақталуын қамтамасыз ету, сыбайлас жемқорлық тәуекелдерін бағалау және қайта бағалау, сыбайлас жемқорлыққа қарсы іс-қимыл жөніндегі шаралар жүйесін тиімді жүзеге асыру. Қазақстан Республикасының «Сыбайлас жемқорлыққа қарсы іс-қимыл туралы» заңының 8-бабы, 5-тармағы негізінде Қазақстан Республикасы Мемлекеттік қызмет істері және Сыбайлас жемқорлыққа қарсы іс-қимыл агенттігі төрағасының 2016 жылғы 19 қазандағы №12 бұйрығымен сыбайлас жемқорлық тәуекелдеріне ішкі талдау жүргізудің үлгілік қағидалары бекітілген. Қағиданың негізінде мемлекеттік органдардың, ұйымдардың және квазимемлекеттік сектор субъектілерінің сыбайлас жемқорлық тәуекелдеріне ішкі талдау жүргізу тәртібін айқындай отырып, оның нәтижелері бойынша сыбайлас жемқорлық құқық бұзушылықтар жасауға ықпал ететін себептер мен жағдайларды жою жөнінде шаралар қабылдануы тиіс.
Аталған негіздер бойынша білім бөлімі мен оған қарасты барлық білім беру ұйымдарында ағымдағы жылдың 1 сәуірінен бастап ішкі талдау жүргізіледі. Осыған байланысты басқосуда білім бөлімінің басшысы Ерлан Боданов түсіндіріп берді.
— Қазақстанда сыбайлас жемқорлыққа қарсы іс-қимыл бойынша түрлі шаралар жүйелі түрде орындалып келеді. Ұлттық тәжірибе мен сыбайлас жемқорлыққа қарсы халықаралық озық іс-тәжірибелерді тарту бойынша нақты істер қолға алынды. Қазіргі таңда парақорлықты жоюдың бірегей үлгісін қалыптастыру мақсатында сыбайлас жемқорлыққа қарсы комплаенс бойынша оқыту жүзеге асырылған. Елімізде бұл сала бойынша түрлі іс-шаралар ұйымдастырылып, ел мүддесі үшін сыбайлас жемқорлыққа қарсы комплаенс қызметін жете түсінуге кірісті. Сондықтан 2024 жылға арналған жұмыс жоспары негізінде білім бөлімінің ұйымдастыруымен барлық білім беру ұйымдарының басшылары мен ішкі талдауды жүргізу функциясын іске асыратын комплаенс қызметкерлерінің қатысуымен сыбайлас жемқорлыққа қарсы мәдениет деңгейін қалыптастыру және алдын алу шараларының әсерін күшейту мақсатында «Адалдық. Заң. Ашықтық» тақырыбындағы ашық-форсайт құқықтық семинар ұйымдастырылып отыр, – деді білім бөлімінің басшысы Е.Теңізбайұлы.
Жиын барысында комплеанс қызметкеріне «Заң нормалары», «Адалдық принциптері», «Комплеанс функциялары» тақырыптарында арнайы мамандар түсіндірме жұмыстарын жүргізді. Алдағы уақытта әр саладан келген қызметкерлердің дәрісін алып, білімін толықтырып, олармен пікір алмасып, білім саласында сыбайлас жемқорлық тәуекелдерін болдырмауға тиісті жұмыстар жүргізілетін болады.
Е.Ерболұлы
