Соңғы уақытта жайлы мектеп жайында жиі айтыла бастады. Бұл қуанарық та, құптарлық та жаңалық. Ширегіне жетіп қалған ХХІ ғасырда қандай ел болмасын, тек қана біліммен, ғылымның дамып, озық технологияның өмірге дендеп енуімен өркениетті мемлекеттермен бәсекелесе алады. Заманауи ғылыми жетістіктерге жету үшін міндетті түрде терең білім керек. Тек білімнің арқасында ғылыми жетістіктерді дамытып, адам капиталын тиімді пайдаланып, ешқандай шикізат байлығынсыз-ақ өркениет көшін бастап отырған елдер қаншама?! Бүгінгі күні бүкіл адамзаттық деңгейдегі күрмеуі қиын мәселелердің туындап жатқаны, көбейіп кеткені ақиқат. Олар: дүние жүзіндегі климаттың жылынуы, үлкен өзгерістердің байқала бастауы, әр түрлі құрлықтардағы экологиялық ахуалдың шиеленісе түсуі, бүгінгі күні-ақ сезіле бастаған су тапшылығы, қоршаған ортаға әрбіріміздің келтіріп жатқан зиянымыз – мұның бәрін табиғатқа нұқсан келтірмей түйінін таба білу үшін ғылымды меңгеруміз қажет, технологиялық жаңалықтарға негізделген ғылым өркендесе проблемалардың шешімін табу да оңай болмақ.
Әртүрлі ақпарат көздерінен байқағанымыздай, 2025 жылға дейін елімізде 800 мың баланың заманауи мектепте білім алатыны айтылып жүр. Бұл жобаның аталуы «Жайлы мектеп». Биылғы жылдан басталатын жоба аясында мемлекетімізде заманға сай ғимараттар бой көтермек, осыдан соң апатты жағдайдағы және үш ауысымды мектептер проблемасы шешіледі.
Жоба бойынша 842 мың оқушыға арналған 401 мектеп салынбақ, ал республика бойынша 225 мың орын жетіспейді екен.
Жайлы мектептің жаңалығы көп, онда бастауыш сыныптарға арналған жеке блог болады, соңғы үлгідегі заманауи құрылғылармен жабдықталған зертханалар да осыдан табылады. Мұның бәрі оқушылар мен оқытушыларға қолайлы әрі қауіпсіздігін қамтамасыз ету, білім сапасын арттыру және білім беру процесін оңтайландыру үшін ойластырылған. Ал, оқушылардың химия, физика пәндерін зертханаларда практика жүзінде тәжірибемен ұштастыруы олардың пәнге қызығушылығын, білімге құштарлығын арттырары сөзсіз.
Жайлы мектептер 300, 600, 900, 1200, 1500, 2000 немесе 2500 орынды деп белгіленген жеті түрдің біріне сай салынады. Бұл мектептерде робототехника кабинеті, бірнеше зертхана, аумағы 88 шаршы метр болатын хореография залы, үш коворкинг залы болуы керек. Әр сыныпта арнайы интерактивті тақта мен мұғалімге арналған компьютер қарастырылған.
Жайлы мектептерде бастауыш сыныптар (9х18м) мен орта буын, жоғарғы сыныптар үшін (36х18м) бөлек спорт залдары болады. Ал, мектеп құрылысын бақылау қоғамдық негізде жүргізіледі. Қай мектептің болмасын, салынуын кез келген адам тәулік бойы бақылай алады. Тікелей бейнероликтер мен фоторепортаждары бар интерактивті карта жасалады.
Республикамыздағы мектептердің дені Кеңес Одағы кезінде салынғаны белгілі. Олар ерекше балаларға қолайсыз болды. Заманауи мектепте барлық оқушылардың қажеттілігі ескерілетін болады. Бұл мектептердің ұлттық нақышта безендірілуі жоспарланған. Ондай жұмыстарға инженерлер, сәулетшілер мен дизайнерлер жұмылдырылады.
Оқу-тәрбие іс-шараларын өткізу үшін көп функциялы акт залы, кітап қоймасы мен оқу залы бар кітапханаларға орын беріледі, электронды кітапхана, ғимараттың әр қабатында оқуға және бос уақытты мазмұнды өткізуге коворкинг аймағы болады.
Оқушыларға еңбек пәнін оқытуды ұйымдастырып, шығармашылық әлеуетін дамыту үшін жаңа буынның жабдығымен қамтылған әмбебап шеберханалар, шығармашылық студиялар, бастауыш кәсіптік білім беруге арналған кабинеттер (тігінші, аспаз, ІТ-маман, ағаш ұстасы және басқасы) қарастырылады.
Қорытындылай айтқанда, жайлы мектеп – заманауи мектеп болашақ ұрпақты тәрбиелеу жолында үлкен маңызға ие болғалы тұр. Жас ұрпақтың білімді, бәсекеге қабілетті, жаңа технология жетістіктерін меңгерген мамандық иелері болуы жолында бұл мектепте атқаратын міндет те зор болмақ.
Өтебай Серәлі,
Ақтөбе қаласы
