Еліміздің демографиялық тұрғыдан дамуы үшін алтын құрсақты аналарымыздың орны ерекше. Дүниеге ел тізгінін ұстар батырларды әкеліп жүрген аналарға көрсетілетін көмек жалғасын табуға тиісті. Аналарға мемлекет тарапынан берілетін қаржы мөлшерінің де артуы маңызды.
Барлық адам бір жағдайда дүниеге келмейтіні белгілі. Тағдыр атты шешім дүние есігін ашқан әр перзентті өз жоспарларымен көмкеріп қоятындай. Денсаулығында кінәраты бар жарымжан жандар біздің қоғамда да кездеседі. Ерекше жандар мемлекет тарапынан еленіп, көмектер көрсетілуде. Түрлі жағдайдағы отбасылар бар екені жасырын емес. Еңбекке жарамсыз адамдардың өздері де алға ұмтылып, күш-жігерін жинап, жұмыс жасауға ұмтылады. Осындай әрекеттер көп адамдарға үлгі болса, адамның өмір сүру деңгейі де артар еді. Тағдырдың сынағына мойынсұнбай, өмір сүруді асқан белсенділікпен жалғастырып жүрген ерекше жандарға қолдау тоқтап қалмауы керек. Облыс бойынша төлем алушылар саны 27 мыңнан асып кеткен.
Әлеуметтік төлемдердің мөлшері осы жылдың 1 шілдесінен бастап ұлғаяды. Әсіресе, көп балалы аналар мен «Алтын алқа», «Күміс алқа» алқасымен наградталған және «Батыр ана» атағы бар, сондай-ақ, І және ІІ дәрежелі «Ана даңқы» ордендерін иеленген жандарға арналған жәрдемақы мөлшері 7,4 айлық есептік көрсеткішке дейін өспек. Бұл туралы Қызылорда облысы бойынша Еңбек және әлеуметтік қорғау департаменті басшысының орынбасары Төреахмет Жолымбетов айтып берді.
— Үстіміздегі жылдың 20 сәуірінен бастап ҚР Әлеуметтік кодекс қабылданып, 1 шілдеден бастап қолданысқа енгізілетін болады. Осыған сәйкес, бала туғаннан бастап кәмелет жасқа толғанға дейінгі әлеуметтік төлемдер, еңбекке қабілетті жастағы азаматтарды жұмыспен қамту, жасы ұлғайған шақтағы қолдаулардың барлығы осы құжат арқылы реттеледі. Мемлекет басшысының тапсырмасымен бала күтімі бойынша берілетін мемлекеттік жәрдемақы бір жастан бір жарым жасқа дейін ұзартылып, төленетін болды. Сондай-ақ, мүгедектігі бар адамдарға төленетін әлеуметтік жәрдемақы мөлшері мүгедектік тобына және мүгедектік алуының себебіне қарай арттырылады. Нақтырақ айтқанда, I топтағы мүгедектігі бар адамдарға берілетін жәрдемақы 89248 теңгеге дейін, II топтағы азаматтар 71398 теңгеге дейін, III топтағы жандар 48681 теңге көлемінде жәрдемақы ала алады. Ал, мүгедектігі бар баланы тәрбиелеп отырған қамқоршыға төленетін ай сайынғы мемлекеттік көмек мөлшері ең төменгі күнкөріс деңгейінің шамасында беріледі. Бұдан бөлек, өңірімізде 9 мыңнан астам асыраушысынан айырылған адам бар. Оларға төленетін мемлекеттік жәрдемақы арнайы санат бойынша берілетін болады. Сондай-ақ, саяси қуғын-сүргін құбандарына және одан зардап шеккен жандарға, мүгедектігі бар немесе зейнеткер болып табылатын адамдарға арнаулы мемлекеттік жәрдемақы көлемі 1,23 АЕК дейін өсті,- деді Жолымбет Сайлаубайұлы.
Жаңа Кодекстің негізгі мақсаты –халықтың түсінуін жеңілдету үшін осы саладағы қолданыстағы заңнаманың барлық нормаларын бір құжатта шоғырландыру. Бұл ретте әлеуметтік қамсыздандыруға қатысты қолданыстағы заңдар мен актілердің барлық нормалары біріктіріліп, Әлеуметтік кодекспен қамтылған. Кодекстің басты міндеті – халықтың осал топтарын қамқорлыққа алу және азаматтардың негізгі құқықтарын қамтамасыз ету. Сонымен қатар, Қазақстан Республикасына ерекше еңбек сіңіргені үшін зейнетақы тағайындалған адамдарға арнаулы мемлекеттік жәрдемақы мөлшері 1,07 АЕК-тен 1,23 АЕК-ке ұлғаяды.
Облыс бойынша төлем алушылардың жәрдемақыларының мөлшері қайта есептелініп, шілде айының қаражат қажеттілігіне енгізіліп, 1 шілдеден бастап көбейтілген мөлшердегі жәрдемақысы төленетін болады.
Әлеуметтік көмектің артуы қуантарлық жағдай, себебі мемлекет өз көзқарасынан жаңылмай, басты көмекке мұқтаж жандарды есінен шығармағаны жөн. Еліміздің әрбір тұрғыны бақытты өмір сүруге лайықты.
Қ.МАТАЙ
