Түрлі уақыттан, сан қилы кезеңдерден өткен жаһан елдері тек қана прогрессті түрде алға жылжыды. Қазіргі шақ білімнің, білімділердің кезеңі. Бұл пікірді даму жолына түскен мемлекет басшылары, ғұлама ғалымдар айтып келеді. Адамның физикалық күшін ысырап етпей, адам баласына қызмет ететін роботтарды ойлап табудың өзі білімнің, сол білім мен еңбектің байланысуынан туған ғылымның жемісі. Бәсекеге қабілетті елге айналып, өзге алпауыт мемлекеттердің бір-бірінің ойын құрметтеп, санасуы үшін білім, білімнен пайда болған ғылымның ықпалы зор. «Әлемді күштілер басқарады» деген сөзді естігенде, көзге тәні мығым, сырт мүсіні ірі адам елестеуі мүмкін. Алайда қазіргі таңда нағыз күш миға жиналған пайдалы ақпараттарды құрайды. Қазақ халқы да «білекті бірді жығар, білімді мыңды жығар» деп бекерге айтпаса керек.
Еліміздің әлемдік бәсекені байқай отырып, назарды осы жолға аударғаны жайдан жай емес. Ел болашағы жарқын болуы үшін осы кезден бастап даму жолына түсу пайдалырақ. Сондықтан да мемлекеттік қолдаудың облыс орталығынан бастап ауылдағы білім ошақтарына дейін сезініп жатқаны көңілге сенім ұялатады. Тереңдетіп оқытатын мектептер, жоғары оқу орындарының саны артып, оқушылардың өсіп-жетілуіне пайдасы тиюде. Мектепті үлкен жетістікпен, жоғары нәтижеде бітірген түлектерге шетелде оқуға мүмкіндік қарастырылған. Еліміздің ішінде де жан-жақты маман дайындайтын білім ошақтары жетерлік.
Қазақ халқының дара ұлы Ғани Мұратбаев «Жастардың бүгінгі міндеті – оқу, білім, тәрбие жұмыстары. Жастар бүгін сөзден іске көшетін заман. Білімсіз істің реті болмайды. Сондықтан жастардың жалпы назары мектепке аударылуы керек» деп, білімнің болашағы жайында пікір білдірген.
Қызылорда облысының да білім саласына көзқарасы ерекше. Облыс әкімдігінің білім басқармасымен бірлесе атқарған жұмыстары мектептерге қолдау көрсетіп келеді. Оқушылардың білім алуы үшін жаңа мектептер де бой көтермек. Осы кезге дейін Қызылорда қаласында бір ғана Оқушылар үйі болса, енді сол жағалауда 350 орынға арналған заманауи үлгідегі екінші Оқушылар сарайының құрылысы басталуда.
Сонымен қатар, биыл дарынды балаларды қолдау мақсатында Қызылорда қаласы мен Қармақшы ауданында 150 орынға арналған мамандандырылған мектеп-лицей ашылды. Оған қоса Жезқазған трассасы бойында 600 орындық, Жаңақорған ауданы, Майбекет мөлтек ауданында 300 орындық, Шиелі ауданы, Байсын ауылында 250 орындық, Қазалы ауданы, Әйтеке би кентінде 250 орындық мектептер ел игілігіне беріледі. Ал, Арал ауданы Тоқабай елді мекеніндегі жеке инвестор есебінен салынып жатқан №248 апатты мектеп жаңарып, биыл пайдалануға берілмек.
«Жайлы мектеп» ұлттық жобасы аясында облыста алдағы 3 жылда 15100 орынға арналған құны 100 млрд. теңгеден асатын 21 мектеп салынады. Биыл 10 мектептің құрылысы басталады. Бұл 2025 жылы өңірдегі үш ауысымды және апатты мектептер мәселесінің толығымен шешім табуына, балалардың сапалы білім алуына берік негіз қалайды.
Сыр өңірінде білім саласында атқарылып жатқан жұмыстар ауыз толтырып айтарлықтай. Оқушылардың жетістіктері, ұстаздардың да түрлі байқаулардан жүлделі орындармен оралып жатқандығы тағы бар. Облыстық білім басқармасының басшысы Мейрамбек Шермағанбет облысымыздың биылғы жылғы білім саласына тоқталып өткен болатын.
— Мемлекет басшысының қолдауымен бүгінде білім саласы жаңа деңгейге көтеріліп, білімді ұрпақ қалыптастыруда оқушылар үшін барлық мүмкіндіктерге жол ашылуда. Осы ретте басқарма да өңіріміздегі әрбір оқушының сапалы білім алуымен қатар білім бәсекелерінде жоғары көрсеткіштерге қол жеткізу үшін қолдау жасалуда.
Лайықты қолдаудың нәтижесінде бүгінде Сыр өрендері білім бәсекелерінде топ жарып, аймақ абыройын еселеуде. Оқушыларымыз халықаралық байқаулар және республикалық олимпиадалар мен ғылыми жобаларға қатысып, жеңіс тұғырынан көрініп келеді. Мұнымен қоса, жалпы білім беретін пәндер бойынша республикалық олимпиадада облысымыз командалық есепте жаратылыстану бағытында ІІ, гуманитарлық пәндер бойынша ІІІ орынды иемденді. Бұл – өте жақсы көрсеткіш. Бұдан бөлек, 4 және 9-сынып оқушылары арасында өткен білім жетістіктерін бағалау мониторингі бойынша өңіріміз республикада үздік үштіктің қатарына кірді,- деді басқарма басшысы Мейрамбек Зинабдинұлы.
Халықаралық, республикалық олимпиадалар мен ғылыми жобалар конкурсында жеңімпаз атанып, облысымыздың абыройын асқақтатып жүрген дарынды оқушыларды марапаттау рәсімі Достық үйінде өткізілген болатын. Облыс әкімнің орынбасары Нұрымбет Сақтағанов, облыстық білім басқармасының басшысы Мейрамбек Шермағанбет дарынды оқушыларды қолдау мақсатында өткізілген салтанатты шараға қатысты.
— Мемлекет басшысының қолдауымен бүгінде білім саласы жаңа деңгейге көтеріліп, білімді ұрпақ қалыптастыруда оқушылар үшін барлық мүмкіндіктерге жол ашылуда. Осы орайда біздің өңірімізде де әрбір оқушының жоғары деңгейде және сапалы білім алуына лайықты қолдау жасалуда. Соның нәтижесінде бүгінде Сыр өрендері білім бәсекелерінде топ жарып, аймақ абыройын еселеуде. Атап айтар болсақ, 13 оқушы халықаралық байқауда топ жарса, 90 оқушы республикалық олимпиадалар мен ғылыми жобаларға қатысып, жеңіс тұғырынан көрінді. Ал, 2 оқушы әлемдік деңгейдегі олимпиадаға қатысуға жолдама алғандығын мақтанышпен айтуға болады,- деді Нұрымбет Аманұлы.
«Сыр дарыны» медалі мен бағалы сыйлықтар халықаралық, европалық, евразиялық олимпиадалардың, Өмірбек Жолдасбеков атындағы математикадан және механикадан зерттеу жұмыстарының халықаралық конкурсынан және жалпы білім беретін пәндер бойынша республикалық олимпиада мен зерттеу жобалар конкурсының 85 жеңімпазына табысталды. Еліміздегі беделді жоғары оқу орындарына білім гранты мен сертификаты 8 жеңімпаз оқушыға ұсынылды.
Осындай жетістіктердің артында ұстаздардың шәкірттеріне деген еңбегі мен толассыз шығармашылығы, ата-аналардың ыстық ықыласы тұрғандығын басқарма басшысы Мейрамбек Шермағанбет айтып, арнайы Алғыс хатпен жеңімпаздардың ата-аналары мен жетекшілерін марапаттады.
Оқушыларды ынталандыру мақсатында халықаралық балаларды қорғау күніне орай еліміздің барлық өңірінен келген 70-ке жуық оқушыға «Ақорда» резиденциясында экскурсия ұйымдастырылған болатын. Олардың арасында Сыр өңірінен халықаралық және республикалық байқаулардың жеңімпаздары, оқу үздіктері Нұрислам Сырғабаев, Нұрахмет Мансұров, Ерсұлтан Қыпшақбаев бар. Аталған шара аясында оқушылар резиденцияның бірінші қабатындағы салтанатты холл мен ресми қабылдаулар өткізуге арналған «Салтанат» залын, түрлі жиындар өтетін «Шығыс», «Мрамор», «Алтын» «Доғал» және басқа да келіссөздер залдарын тамашалады, сондай-ақ кітапхананы аралап көріп қайтты. Бұдан бөлек, оқушылар еліміздің бас ғимараты туралы қызықты деректермен танысты.
Сондай-ақ, ҚР Экология және табиғи ресурстар министрлігі “Үздік экологиялық білім беру ұйымы” атты ұлттық конкурс ұйымдастырып, өткізген-ді. Аталған бәсі биік бәйгеде қаламыздың Әли Мүсілімұлы атындағы №101 мектеп-лицейі экологиялық білім берудің озық тәжірибелерін қалыптастыруды мақсат еткен додада жеңімпаз атанды. Жүлдені ҚР Экология және табиғи ресурстар министрі З.Сүлейменова табыстады.
Айта кетейік, Сыр өңірінде алғашқылардың бірі болып Ә.Мүсілімов атындағы №101 мектеп-лицейі «Жасыл мектеп» жобасын қолға алып, оқушылардың ғылыми жобаға әзірлігін шыңдау үшін таптырмас ресурсқа айналған жылыжай ісін жандандырып отыр.
Балалардың жазғы демалысы уақытында жаздық лагерьлер жұмыс жасайтын болады. Облысымыз бойынша 100 мыңнан астам бала жазғы тынығу лагерьлерінде демалады. 2 ауысымнан бастап 7 мемлекеттік және 3 жеке жазғы тынығу лагерьлерінде 7 ауысымда 8890 бала тынығады деп жоспарланды. Сонымен қатар, аймағымыздың барлық мектептерінің жанынан күндізгі тынығу лагерьлері ұйымдастырылып, 98 мыңға жуық оқушы қамтылмақ.
— Жазғы тынығу лагерьлеріне бірінші кезекте ата-анасының қамқорлығынсыз қалған, көп балалы және аз қамтылған отбасылардан шыққан балалар жазғы демалыспен қамтылады. Бұдан басқа, 1326 бала жергілікті жердегі меценаттар мен кәсіпкерлердің демеушілігімен облыстан тыс жердегі лагерьлерде демалады. Сонымен қатар ҚР Оқу-ағарту министрлігі «Қазақстан халқына» қоғамдық қорымен бірлесіп, дарынды ауыл балаларының интеллектуалдық, шығармашылық қабілеттерін жетілдіру және қолдау көрсету мақсатында 2023 жылғы жаз мезгілінде «Жаздық жолдама» әлеуметтік жобасы аясында облысқа 600 орынға квота бөліп отыр.
Жазғы тынығу кезеңінде оқушыларға қосымша Сыр өңірінің тарихи орындарына және еліміздің басқа қалаларына Астана қаласы, Байқоңыр ғарыш айлағы, Шымкент, Тараз қалаларына және Сауран, Сығанақ қалашығы мен Түркістан облысының киелі жерлеріне, Қорқыт ата ескерткішіне экскурсиялар мен арнайы турлар ұйымдастырылып, музейлерге 17300 бала саяхаттайтын болады,- деді басқарма басшысы Мейрамбек Зинабдинұлы.
Облысымыздағы білім сапасы, оқушылардың білімге деген құштарлығы артып келеді. Шәкірт пен ұстаздардың байланысы нығайып, оқушылар түрлі деңгейдегі байқау, жарыстардан биіктен көрініп жүр. Аймақтың барлық мектептеріне жоғары деңгейдегі жағдай жасалу көзделген. Бүгінгі шәкірт – ертеңгі елдің тізгінін ұстайтын маман. Сол себепті оқушы кезден балалардың бойына сапалы білімді дарытып, болашақтың есігін сенімді қағуына бар мүмкіндікті жасауымыз қажет-ақ.
Қ.ӘНДЕШҰЛЫ
