Баланың үні шыққан жер нағыз бақыттың мекені секілді. Қазақ халқында балаға «періште» деп қарап, «көз тимесін» деп түрлі ырымдар жасап отырған. Қыз бала дүниеге келсе, қонақ деп құрметтеп, төрге шығарып, ұл бала болса, әкесінің атұстары деп елеп, балаға қажетті барлық дүниені үйрететін болған. Күні бүгінге дейін әулеттің ата-әжесі үйдің кішкентайларына ертегі айтып, ерекше назар аударған. Бертін келе үйдің үлкендерінің ғибратты сөздерін, телефонның тылсым күші алмастырғандай. Бірақ қазірдің өзінде бала тәрбиесін жіті бақылайтын отбасылар да бар.
1 маусымда халықаралық балаларды қорғау күні республика көлемінде тойланды. Сыр өңірі, әсіресе Қызылорда қаласы бұл мерекені жоғары деңгейде атап өтті. Балаларға арналған түрлі іс-шаралар, концерттік бағдарламалар ұйымдастырылды. Қызылорда қаласының әкімі Асылбек Шаменов айтулы күні балаларды мерекесімен құттықтады.
— Бұл күн – әлемнің түкпір-түкпіріндегі балаларға қуаныш сыйлайтын мейрам ғана емес, олардың құқығын қорғап, үнемі қамқор болуға үндейтін мереке. Сондықтан бала қуанышын бағына балаған ата-ана үшін де, елдің мұраты мен мүддесін балалармен байланыстырған мемлекет үшін де осы мейрамның маңызы бөлек.
Ел Президенті Қасым-Жомарт Кемелұлы Тоқаев «Баланың күлкісі мен бақытынан артық ештеңе жоқ екенін осы мерекеде бәріміз айқын сезінеміз. Өскелең ұрпақтың жан-жақты дамуына қолайлы жағдай жасау — мемлекетіміздің басты міндетінің бірі. Өйткені жас ұрпақтың мықты азамат болып өсуі еліміздің тұрақты дамуына және баянды болашағына жол ашады» деген болатын. Бұл тұрғыда шаһарда балалар игілігі үшін көптеген ілкімді істер атқарылуда.
Дамыған елде өсіп келе жатқан бақытты ұрпақ ретінде алдарыңда тұрған үлкен міндет — зерделі де зерек, білімді де білікті болып ата-аналарыңды марқайту, сол арқылы мемлекетіміздің, Сыр өңірінің әлеуетін көтеру. Ол үшін елімізде барлық мүмкіндік жасалған. Жасампаз істердің барлығы сендердің жарқын болашақтарыңа салынған инвестиция деп білемін. Барлықтарыңа зор денсаулық, бақытты балалық шақ тілеймін. Жүректеріңе мейірім мен шапағат нұры ұялап, жүздеріңнен қуаныш пен бақыт күлкісі кетпесін,– деді қала әкімі Асылбек Өмірбекұлы.
Осы айтулы күнде М.Ералиева атындағы мәдениет Үйі жанынан құрылған үйірме өнерпаздарының мерекелік концерті өтті. Концертте «Бозторғай» хор, «Сандуғаш» және «Ақбаян» ән үйірмелері мен дәстүрлі өнерді насихаттайтын «Тәлім» жыр-терме, «Балбұлақ» домбыра, «Қоңыр саз» қобыз үйірмесімен қатар «Ақ қауырсын» көркемсөз үйірмелерінің өнерпаздары өнер көрсетті.
Жас дарындылардың мерекелік концертін тамашалауға келген Титов және Гагарин аймағының жас бүлдіршін тұрғындарына М.Ералиева атындағы мәдениет Үйінің ақылы қызметінен түскен қаржыға балмұздақтар, және тәттілер мен сусындар алынып, таратылды. Сондай-ақ, «Балаларға базарлық» атты мультфильм көрсетілімі мен тегін балмұздақ тарату акциясы өткізілді. Титов аула клубында өткізілген шараға 200-ден аса бүлдіршін мен олардың ата-аналары қатысты. Мереке қарсаңында бүлдіршіндер ойын ойнап, би билеп, караокеде түрді әуендер айтып, қазақы жанрдағы «Мұзбалақ» мультфильмін тамашалады.
Облыс орталығында өткізілген шаралар балалардың көңілінен шығып, қуанышты көңіл-күймен тарқасты. Жыл сайын айтулы күндер жоғары деңгейде өткізіліп келеді. Бұл жолы да балаларды қорғау күні назардан тыс қалмады. Қызылордалықтарға жайлы демалыс сыйлады.
Қазақбай ӘНДЕШ
