Полицейлер түнгі рейдте 139 жасөспірімнің тәртібін қарады

Қоғамда жайлылық болмаса жайсыздық орын алып, тәртіп болмаса, тыныштық кетеді. Әсіресе, кәмелеттік жасқа толмағандардың түн ішінде көше кезіп, қалада өріп жүруі өрескел әрекеттің өршуіне ұласуы мүмкін. Текетірестен туындайтын төбелес, қыңырлықтан пайда болатын қиындық, дарақылық пен дөрекеліктен ушыққан дау-дамай көбіне жасөспірімдер арасында жиі орын алады. Сайып келгенде, мұндай ерсі қылықтың соңы ессіздікке апарып, сойқанның салдары сан соқтыруы мүмкін. Жасырып жабатыны жоқ, қазір жастар арасында спирттік өнімдерге қызығушылық, есірткіге жолай қоймағанымен, темекіге әуестік бар. Ал, мұндай зиянды әрекеттердің зауалы мен зардабы қатты болады. Осы орайда қалалық полиция басқармасы түнгі уақытта жасөспірімдерді жіті қадағалап, олардың амандығы үшін алаңдап, қоғам қауіпсіздігі үшін бақылау жүргізуден тынған емес.

Тәртіп сақшылары түнгі уақытта рейд жүргізуден бөлек, қырағылықпен құқық бұзушылықты анықтап, қылмысты алдын алумен қатар, арнайы кездесу өткізіп, жастарды жамандық пен жанжалдан аулақ болуға шақырады. Қазақстан Республикасы Ішкі істер министрінің нұсқауына сәйкес, 16-18 ақпан аралығында қала аумағында жасөспірімдер арасында қылмыстардың алдын алу аясында «Балалар түнгі қалада» жедел профилактикалық іс-шарасы негізінде мектеп-оқушылары және олардың ата-аналарымен кездесу өткізді. Іс-шараның мақсаты – кәмелетке толмағандар тарапынан жасалған құқық бұзушылықтар мен қылмыстарды анықтау және алдын алу, құқыққа қайшы әрекет ететін жасөспірімдер топтарын, спирттік ішімдіктерді, психотроптық және есірткі заттарын пайдаланатын кәмелетке толмағандарды, сондай-ақ, кәмелетке толмағандарға алкогольдік ішімдіктер мен темекі өнімдерін сататын ересек адамдарды анықтау. Кездесуге дін саласы бойынша облыстық ақпараттық түсіндірме тобы мүшесі және дін мәселелерін зерттеу орталығының маманы Сәкен Алдашбаев, «Сенім болашақ» республикалық ата- аналар қоғамдық бірлестігінің Қызылорда облыстық филиалының басшысы Шерхан Аралбай қатысты. Кездесу барысында оларға егжей-тегжейлі құқықтық сабақтар өткізіп, оларға заң бұзушылықтар жасамауды екертті. Сонымен қатар, полиция қызметкерлері ата-аналарға өз балаларына мұқият болуға, бос уақытын дұрыс ұйымдастыру, тиімді өткізу мәселелеріне назар аударуға, олардың қатысуымен, сондай-ақ оларға қатысты құқыққа қарсы әрекеттерді жасауға қатысты қарым-қатынастардан аулақ болуға шақырды. Сондай-ақ, Қызылорда қаласы полиция басқармасының жергілікті полиция қызметі ювеналды полиция бөлімшесінің бастығының орынбасары, полиция майоры Лязат Ахметова баяндама жасап, тиісті түсіндірме жұмысын жалғастырды.

Әлбетте, жастарды жамандыққа үйір деп сөкпейміз. Дей тұрғанмен, қажет кеңеске құлақ түрмей түн жарымында сыртта жүріп, бекітілген ережеге қырын қарауы қауіп пен қылмыстың екі ортасында қалуына түрткі боп жатады. Тіпті ата-анаға ескертуді есінен шығарып, сақтығына салғырт қарайтын кәмелеттік жасқа толмағандардың мұндай әрекеті айыппұл салумен аяқталады. Шоғырланған адам көп жерде шудың да болатыны бесенеден белгілі. Сондықтан, бұзақылықтың басталып, оқыс оқиғаның орын алуына жол бермеуге тырысатын полиция қызметкерлері дер кезінде әрекет етіп отырады. 16-18 ақпан аралығында «Түнгі қаладағы балалар» жедел-профилактикалық шарасы өткізіліп, рейд жұмыстары жүргізілді.

– Іс-шара барысында 139 жасөспірім жеткізіліп, 136 әкімшілік хаттама рәсімделінді. Сонымен қатар, 3 жасөспірім бейімдеу орталығына орналастырылып, 2 ата-ана қолайсыз отбасы санатында есепке алынды. Сондай-ақ, БДБ базасында есепте тұратын 36 отбасының іс-шара барысында 15 қолайсыз отбасы, 8 профилактикалық, 5 тізімдік есепте тұратындардың мекен-жайлары бойынша тексеріліп, профилактикалық түсіндірме жұмыс­тары жүргізілді. Яғни, 40 білім беру ұйымында оқушылар мен ата-аналарының қатысуымен 120 дәріс оқылды. Тағы бір айта кетерлігі, жыл басынан бері ҚР Әкімшілік құқық бұзушылық туралы кодексінің 127-бабы бойынша кәмелетке толмағандардың заңды өкілдеріне сот арқылы шара көрілді. Алайда, іс-шара кезінде 127-бабымен көрсеткіш анықталған жоқ,- деді Қызылорда қалалық полиция басқармасының ювеналды полиция бөлімінің бас­тығы, полиция капитаны Айдос Прежекенов.

Асылында, тәртіпке бағынғанның, талапты орындағанның жаман болатыны жоқ. Бұл жастардың да қаперінде жүрсе дейміз. Әйтпегенде, алысу мен жұлысу толастамаса абырой жоғалып, бұзақылық тоқтамаған жерден береке кетеді. Осы ретте қауіпсіздікті назарда ұстайтын тәртіп сақшылары қоғам тыныштығын қалыпта ұстап келеді.

Замира ҚОНЫСЖАН

Пікір үстеу

Э-пошта мекенжайыңыз жарияланбайды. Міндетті өрістер * таңбаланған