«2024 жылдың қорытындысы бойынша, 55,1 миллиард теңге көлемінде артық шығындардың алды алынды. Оның 26 миллиард теңгесі бюджетке қайтарылған, қалған соманы тапсырыс берушілер қайта қарап, жоспарланған бағаларды төмендеткен немесе сол сомаға сатып алынатын тауарлар санын көбейткен».
Дәл осындай Сыбайлас жемқорлыққа қарсы қызмет агенттігінің хабарламасына қарап, елімізде бюджет қаржысын әлі де таран-таражға салу көріністері бар екенін байқауға болады. Агенттік дерегінше, Солтүстік Қазақстан облысында 230 миллион теңгенің заңсыз шығынының алды алынған. Петропавл қаласындағы телемұнараға жарықдиодты жабдықтарды орнату жұмыстары төтенше жағдайларды жою сылтауымен жүргізілгені белгілі болған. Алайда бұл жұмыстардың төтенше жағдаймен еш байланысы болмаған. Соңында келісімшарт бұзылып, бюджетке қаражат қайтарылған.
Қарағанды облысындағы мамандандырылған музыкалық мектеп-интернат 18 мың бөтелке үстел сірке суын 9 миллион теңгеге сатып алуды жоспарлаған. Бұл көлем мекеменің (барлығы 460 адам) қажетінен әлдеқайда жоғары болған. Бұған қоса бір бөтелкенің құны нарықтағы 300 теңгенің орнына 500 теңгеге бағаланған. Бұл шығынды 3,5 миллион теңгеге арттырған. Антикордың араласуынан кейін сатып алу тоқтатылып, бюджетке 9 миллион теңге үнемделген.
Ал, Қызылорда облыстық филармониясы 300 қабырға картинасын 48 миллион теңгеге (әрқайсысы 160 мың теңгеден) сатып алуды жоспарлаған. Бір картинаның нарықтағы орташа бағасы 20 мың теңге тұрады, сонда артық шығын 42 миллион теңге болып тұр. Талдау барысында Қызылорда облыстық филармониясы картинаны сегіз есе қымбат бағаға сатып алмақ болғаны анықталған. Антикордың ұсынысынан кейін бұл сатып алу тоқтатылып, қаражат бюджетке қайтарылған. Бұл ақшаға кімнің тәбеті ашылғаны белгісіз, дегенмен ойлағаны болмай, «жерігі» басылмай қалғанға ұқсайды.
Р.Ғалин
